In questo libro, te ghè imparà tanto sora Geovà. Par quela, te ghè fato ancora pi forte el to amor par lu. Fursi te ghè belche fato la to dedicassion a Geovà e te sì stà batesà. Se no te ghè gnancora fato questa dessision, pol esser che te vol farla suito. Magari, anca dopo del batésimo, te gavarè de seitar a sforsarte par far pi forte la to amicìssia con Geovà. Come che te pol farlo?

1. Parché che te ghè de seitar a far pi forte la to amicìssia con Geovà?

Ghemo de seitar a sforsarse par far pi forte la nostra amicìssia con Geovà. Parché? Parché no volemo ‘mai perder la strada giusta’, o sia, perder la amicìssia che ghemo con lu. (Ebrei 2:1) Cossa che pol giutarne a seitar a servir a lu de maniera fedele? Ghemo de seitar a predicar e a far de pi par Geovà de diverse maniere. (Ledi Filipensi 3:16.) Sicuro che servir a Geovà l’è la meio roba che podemo far nela vita! — Salmo 84:10.

2. Cossa che ancora te ghè de far?

Anca se te sì drio finir de studiar questo libro, te seitarè a servir a Geovà. La Bìblia la dise che ghemo de ‘seitar a meter su la nova personalità’, o sia, far el meio che podemo par mostrar le medèsime qualità de Geovà. (Efesi 4:23, 24) Alora, seita a studiar la Bìblia, ndar ale riunion e a imparar cada volta de pi sora Geovà e le so qualità. Cossita, te sarè bon de cambiar quel che te ocore nela vita e contentar el nostro Pare, Geovà.

3. Come che Geovà el ndarà giutarte a far pi forte la to amicìssia con lu?

La Bìblia la dise: ‘Dio el ndarà pareciarve del tuto par servir ai altri. Lu el ve farà forti, el ndarà giutarve a mantegnerve fedeli e el ve meterà nte un posto firme.’ (1 Piero 5:10) Tuti noantri infrontemo dificoltà, ma Geovà el ne dà el aiuto che ne ocore. (Salmo 139:23, 24) Lu el promete darne la voia e el poder par seitar leai a lu. — Ledi Filipensi 2:13.

 IMPARA DE PI!

4. Seita a discorer col to meio Amigo

Pregar e studiar la Bìblia te ga giutà a esser amigo de Geovà. Parché che seitar a far queste robe ndarà giutarte a gaver una amicìssia ancora pi forte con lu?

Ledé Salmo 62:8, e dopo, parlé sora questo:

• Come che te pol cambiar la maniera che te preghi a Geovà e quel che te ghe parli?

Ledé Salmo 1:2, e dopo, parlé sora questo:

• Come che te pol studiar la Bìblia ancora meio?

Come che te pol imparar ancora de pi intanto che te ledi la Bìblia? Par veder arquante robe che te pol far, vardé el VÌDEO, e dopo, parlé sora questo.

• Che robe del vìdeo te podarissi far intanto che te studi la Bìblia?

• Che robe te piaseria studiar de pi?

 COSSA CHE TE GHÈ IMPARÀ?

Seita a far pi forte la to amicìssia con Geovà e sfòrsate de far de pi par lu. Cossita, te podarè viver felice par sempre!

Sito bon de ricordarte?

• Come che te pol esser sicuro che Geovà el ndarà giutarte a esser leal a lu?

• Come che te pol far pi forte la to amicìssia con Geovà?

• Come che far de pi par Geovà ndarà giutarte a far pi forte la to amicìssia con lu?