Boor ban’en ni kam fil u murung’agen Jehovah u nap’an e re fol Bible ney. Pi n’en kam fil e ke k’aringem ni ngari t’uf Jehovah rom ma sana kam ognagem ngak kam un ko taufe. Ma faanra dawor, ma sana ga be lemnag ni bay mu rin’. Machane nap’an ni ga ra un ko taufe ma dawori mus rogon e mon’og ni ga be tay, ya ka rayog ni nge chugur thilmew Jehovah ndariy n’umngin nap’an. Ni uw rogon?

1. Mang fan nsusun e ngam ulul ni ngam gelnag e tha’ u thilmew Jehovah?

Thingar da ululgad ni ngad gelnaged e tha’ u thildad Jehovah. Mang fan? Ya “nge siy da man’gad” rok nga orel. (Hebrews 2:1) Mang e rayog ni nge ayuwegdad ni ngad ululgad ko pigpig ngak Jehovah u fithik’ e yul’yul’? Rayog ni ngad fanayed e tayim rodad ni fan ko fare maruwel ni machib, mu kud gayed yugu boch e kanawo’ nrayog ni ngad yoornaged e tayim ni gad be pigpig riy ngak e Got rodad. (Mu beeg e Filippi 3:16.) Pigpig ni yima tay ngak Jehovah e aram e bin th’abi fel’ kanawoen e yafos!​—Psalm 84:10.

2. Mang e susun ni ngkum ulul ni ngam rin’?

Yugu aram rogon ni aram e nge mus e re fol Bible ney, machane ka ra ulul e pi n’en ga ma rin’ ni gur reb e Kristiano. Be yog e Bible nib t’uf ni nga ‘don’ed nga dakendad e bin nib beech i gadad.’ (Efesus 4:23, 24) Nap’an ni ga ra ulul i fil e Thin rok Got ma ga be un ko muulung, ma aram e ga ra fil boch ban’en nib beech u murung’agen Jehovah nge pi fel’ngin. Mu gay boch e kanawo’ nrayog ni nge m’ug rarogon rom nib fel’ rogon. Mu ulul ni ngam thilyeg e tin nib t’uf ni ngam thilyeg u rarogom ya nge yag nim felfelan’nag Jehovah.

3. Uw rogon nra ayuwegem Jehovah ni ngam mon’og?

Be gaar e Bible: “Got . . . e ir e bayi yal’uwegmed, me ta’med ni gimed mmudugil, me gelnagmed me ta’med nga daken e def nib mudugil.” (1 Peter 5:10) Gad gubin ni ma yib e lumel ngodad. Machane ma pi’ Jehovah e n’en nib t’uf rodad ya nge yag nda siyeged e pi lumel nem. (Psalm 139:23, 24) Ke micheg nra ayuwegem ni ngam adag ni ngam pigpig ngak u fithik’ e yul’yul’ miki pi’ gelngim ni ngam rin’ e re n’ey.​—Mu beeg e Filippi 2:13.

 KUM FIL BOCH BAN’EN U MURUNG’AGEN

4. Um non ma ga be motoyil ko bin th’abi fel’ e Fager rom

Meybil nge fol Bible e aram e n’en ke ayuwegem ni ngam mang fager rok Jehovah. Uw rogon nrayog ni nge ayuwegem e gali n’ey ni ngki chugur boch e tha’ u thilmew?

Mu beegew e Psalm 62:8, mi gimew weliy e fulweg ko re deer ni baaray:

• Uw rogon ni ngam mon’og u rogon e meybil ni ga ma tay ya nge yag ni gel e chugur ko tha’ u thilmew Jehovah?

Mu beegew e Psalm 119:97, mi gimew weliy e fulweg ko re deer ni baaray:

• Uw rogon ni ngam mon’og u rogon e beeg Bible ni ga ma tay ya nge yag ni gel e chugur ko tha’ u thilmew Jehovah?

Uw rogon ni ngari yib angin ngom e fol Bible ni ga ma tay ni yigoo gur? Mu yaliyew e re VIDEO ney ni be weliy boch ban’en nrayog ni ngam rin’, mi gimew weliy e fulweg ko gal deer ni baaray.

• Bin ngan ko fapi n’em ni kan weliy ko re video ney e rayog ni ngam rin’?

• Mang boch ban’en ni ga baadag ni ngam fil murung’agen?

 N’EN KAN FIL

Um gelnag e tha’ u thilmew Jehovah mag nameg boch ban’en ni fan ko tirok Got. Ga ra rin’ e re n’ey, ma aram e rayog ni ngam par ndariy n’umngin nap’an ni gab felfelan’!

Ngan Sul u Daken

• Mang fan nrayog ni nge pagan’um ngay nra ayuwegem Jehovah ni ngam pigpig ngak u fithik’ e yul’yul’?

• Uw rogon nrayog ni ngam gelnag e tha’ u thilmew Jehovah?

• Ga ra nameg boch ban’en ni fan ko tirok Got, ma uw rogon nra ayuwegem ni ngaum mon’og i yan?