DILONGI 60
Tatamana yonzuka mu kipheve
Mu nzila ndongokolo ya yi Bibila, mezaba mambu mawombo momo matadidi Yehova. Ayi luzolo luaku kuidi niandi bukiedika lueka lungolo ayi lume kutuma wukivana kuidi niandi ayi wubaka mbotama. Ti buawu ko buididi, mananga wulembo yindula wubuvangila mu bilumbu bio bilembo yizi kuntuala. Vayi yonzuka kuaku ku kipheve, kubika be sukila mu lumbu kio wela baka mbotama. Bukiedika, wulenda tatamana fikama Yehova luzingu luaku loso. Bue wulenda nungina butudila?
1. Bila mbi wufueti tatiminina yonzula kikundi kiaku ayi Yehova?
Fueti tatamana tula zingolo mu yonzula kikundi kiaku ayi Yehova. Bila mbi? “Mu diambu di wedi zimbala.” (Ebelewo 2:1) Mbi bilenda kutusadisa tutatamana ba bakuikama kuidi Yehova? Kukivana mu kisalu kitsamununu ayi tomba maluaku mankaka masadila Nzambi buwombo. (Tanga Filipi 3:16.) Sadila Yehova, yawu phila yizingila yilutidi yimboti!—Minkunga 84:10.
2. Mambu mbi mankaka fueti tatamana vanga?
Ndongokolo’aku yi Bibila yimeni, vayi luzingu luaku lu bukristu lutonini. Bibila kikembi ti “tuvuata bumutu bumona.” (Efeso 4:23, 24) Ngeyo tatamana longuka mbembo Nzambi ayi kutakananga mu zikhutukunu, mawu zaba mambu mawombo mamona matadidi Yehova, ayi bikadulu biandi. Tomba buzabila bue fueti luta sokudila bumutu bu Yehova mu luzingu luaku. Tatamana balula luzingu luaku mu phila yimboti muingi wuluta yangidika Yehova.
3. Bue Yehova kela kusadisila wutatamana yonzuka mu kiphevi?
Bibila kitubidi ti: “Nzambi [. . .] wela kulufuanisa, kulukindisa, kuluvana zingolo, ayi wela kulutelimisa mu kambu nikuka.” (1 Piela 5:10) Betu boso tueta dengana zithotolo. Vayi Yehova weta tuvana zingolo zio zifueni muingi tubika vonga. (Minkunga 139:23, 24) Wutuveni tsila yi kutuvana phuila ayi zingolo muingi tunsadila mu kuikama koso.—Tanga Filipi 2:13.
TUVISA MBOTI MBOTI
Tutala bue tulenda tatiminina yonzukila mu kipheve ayi bue Yehova kela kutusakumunina.
4. Tatamana solula ayi nkundi’aku nio lutidi bakundi baku boso
Lusambulu ayi ndongokolo’aku yi Bibila bimekusadisa wuba nkundi Yehova. Mbi wulenda vanga, muingi mambu beni momo masadisa wuluta ba thangu zioso pfika pfika kuidi niandi? Tanga Minkunga 62:8 ayi vana mvutu mu kiuvu kiaki:
-
Mu zindombolo ziaku, mbi wufueti bongisa diaka, muingi wuluta kindisa kikundi kiaku ayi Yehova?
Tanga Minkunga 1:2 ayi noti ayi vana mvutu mu kiuvu kiaki:
-
Bue wulenda bongisila ndongokolo’aku yi Bibila, muingi wuluta kindisa kikundi kiaku ayi Yehova?
Mbi wufueti tula muingi wuluta yangalala mu ndongokolo’aku yi Bibila? Mosi wuzaba mambu momo malenda kusadisa, tala VIDEO. Ayi vana mimvutu mu biuvu biabi bilandikini.
-
Mayindu mbi wulenda sadila mu mambu mo memona mu video?
-
Mintu mi masolo mbi mawu yangalala longuka?
5. Wukitudila zikhanu zi kipheve
Kukitudila zikhanu zi kipheve yela kusadisa wutatamana kuenda kuntuala. Tala VIDEO ayi vana mvutu mu kiuvu kiaki kilandikini.
-
Mu thangu Cameron kakitudila zikhanu zikipheve, mamboti mbi kayiza baka?
Batu boso basi ko diluaku dikue samuna mu zitsi zinkaka. Vayi betu boso tulenda kitudila zikhanu zio zifueni. Tanga Zingana 21:5 ayi yindudila zikhanu zio lenda kitudila . . .
-
mu kimvuka.
-
mu kisalu kitsamununu.
Bue tsikudukusu yidi mu verse yoyi yilenda kusadisila wudukisa zikhanu ziaku?
Lukanu lo lenda kitudila
-
Bongisa phil’aku yitudila lusambulu.
-
Tanga Bibila kia kioso.
-
Longuka zaba batu boso ba kimvuka kiaku.
-
Tona ayi tuadisa ndongokolo yi Bibila.
-
Ba n’zibudi nzila wunsadisi voti n’zibudi nzila wu thangu ka thangu.
-
Tula zingolo muingi wuba wufuana mu diambu di ba sadi mu kisalu enati widi khomba wubakala.
6. Zinga mu mayangi mvu ka mvu!
Tanga Minkunga 22:26 ayi vana mvutu mu kiuvu kiaki:
-
Mbi wulenda vanga muingi wuba mu luzingu lumboti tona lumbu kiaki ayi mu bilumbu binkuiza?
MU BUKHUFI
Tatamana yonzula kikundi kiaku ayi Yehova ayi kukitudila zikhanu zi kipheve. Buawu bobo wulenda zingila mvu ka mvu!
Phutukulu
-
Bila mbi kikinini ti Yehova wela kusadisa wunsadila mu kuikama koso?
-
Bue wulenda yonzudila kikundi kiaku ayi Yehova?
-
Bila mbi kukitudila zikhanu zikipheve yilenda kusadisila wenda kuntuala mu kipheve?
TALA MAMBU MANKAKA
Mbi bilutidi mfunu kuidi Yehova, vanga diambu dimosi dinyitukisa, voti ba wukuikama kuidi niandi mu luzingu luaku loso?
Sadi ki Yehova kio ki kuikama kilenda kuandi phe zimbisa zikhini. Mbi bitula mu diambu di wu bue vutukila zikhini ziaku?
Bue wulenda kitudila zikhanu zi kipheve ayi kuzidukisa?
“Zalá na mikano ya elimo mpo na kokumisa Mozalisi na yo” (Linɔ́ngi ya Mosɛnzɛli ya 15/07/2004)
Yonzuka mu kipheve mfunu mbi kuidi? Ayi mbi bitula muingi wuba mukristu nio wuyonzuka mu kipheve?
