Teʼ libroaʼ tsʼoʼok a kanik yaʼab baʼaloʼob yoʼolal Jéeoba. Yoʼolal leloʼ tsʼoʼok a maas yaabiltik yéetel maʼ xaaneʼ tsʼoʼok a kʼubik a kuxtal tiʼ letiʼ yéetel a wokjaʼ. Pero wa maʼ okjaʼanakecheʼ maʼ xaaneʼ táan a tuklik a beetik. Le kéen okjaʼanak máakeʼ kʼaʼabéet u seguer u tsʼáaik ichil u kuxtal baʼax ku kanik, beyoʼ yaan u biskuba yéetel Jéeoba utiaʼal mantatsʼ. Koʼox ilik bix jeʼel u beetik máakeʼ.

1. ¿Baʼaxten maʼ unaj u xuʼulul k-bisikba yéetel Jéeobaiʼ?

Kʼaʼabéet k-beetik tuláakal le ku páajtal utiaʼal k-maas bisikba yéetel Jéeoba. ¿Baʼaxten? «Utiaʼal beyoʼ mix bikʼin ka náachkuntaʼakoʼon tiʼ le fejoʼ» (Hebreos 2:1). ¿Baʼax jeʼel u yáantkoʼon utiaʼal maʼ u xuʼulul k-meyajtik Jéeobaeʼ? Kʼaʼabéet k-tsʼáaik k-óol k-kaʼans le baʼax k-kanikoʼ yéetel k-ilik bix jeʼel k-maas meyajtik Jéeobaeʼ (xok Filipenses 3:16). ¡Jach táaj jatsʼuts u meyajtaʼal Jéeoba! (Salmo 84:10).

2. ¿Baʼax maʼ unaj u xuʼulul a beetkiʼ?

Kex táan u tsʼoʼokol a xokik le libroaʼ kʼaʼabéet u seguer a tsʼáaik ichil a kuxtal baʼax ka kanik. Le Bibliaoʼ ku yaʼalik: «Unaj a búukintikeʼex le túumben modos[oʼ]» (Efesios 4:23, 24). Wa ku seguer a xokik le Biblia yéetel a bin teʼ reuniónoʼoboʼ yaan a maas kaanbal tiʼ Jéeoba bey xan tiʼ u modosoʼob. Ilawil a weʼesik le jatsʼuts modos yaan tiʼ Jéeobaoʼ yéetel kiʼimakkúunt u yóol.

3. ¿Bix ken u yáantilech Jéeoba utiaʼal a beetik baʼax ka kanik?

Le Bibliaoʼ ku yaʼalik: «Dios [...] kun kaʼanskeʼex yéetel letiʼ kun beetik a noʼojaʼantaleʼex tubeel. Dioseʼ yaan u beetik a muʼukʼaʼantaleʼex, yaan u tsʼáaik a muukʼeʼex yéetel yaan u beetik a waʼataleʼex tubeel» (1 Pedro 5:10). Jéeobaeʼ mantatsʼ ken u tsʼáatoʼon u muukʼil utiaʼal maʼ k-lúubul tiʼ le pruebaʼob k-aktáantkoʼoboʼ (Salmo 139:23, 24). Tsʼoʼoleʼ yaan u tsʼáaiktoʼon u tsʼíibolalil yéetel u páajtalil utiaʼal maʼ u xuʼulul k-meyajtik (xok Filipenses 2:13).

 UTIAʼAL A MAAS NAʼATIK

4. Maʼ u xuʼulul a orar tiʼ Jéeoba

A orar yéetel a xokik le Bibliaoʼ tsʼoʼok u yáantkech a wil Jéeoba bey a amigoeʼ. Wa maʼ tu xuʼulul a beetik le baʼaloʼobaʼ, ¿jeʼel wa a maas biskaba yéetel Jéeobaeʼ?

Xokeʼex Salmo 62:8, kéen tsʼoʼokkeʼ ka tsikbaltikeʼex lelaʼ:

• ¿Baʼax jeʼel a beetik utiaʼal a maas maʼalobkíintik bix a orareʼ?

Xokeʼex Salmo 1:2, kéen tsʼoʼokkeʼ ka tsikbaltikeʼex lelaʼ:

• Jeʼel u páajtal a maas biskaba yéetel Jéeoba wa ka maas maʼalobkíintik bix a xokik le Bibliaoʼ. Chéen baʼaleʼ, ¿bix jeʼel a beetkeʼ?

¿Baʼax jeʼel a beetik utiaʼal u maas maʼalobtal bix a xakʼalxookeʼ? Utiaʼal a wojéeltikeʼ chaʼanteʼex le VIDEOOʼ. Kéen tsʼoʼokkeʼ ka tsikbaltikeʼex lelaʼ:

• ¿Baʼax ta wilaj teʼ video jeʼel u yáantkech a maas maʼalobkíint bix a xakʼalxookeʼ?

• ¿Baʼax maas taak a xakʼalxoktik teʼ Bibliaoʼ?

 BAʼAX TSOʼOLI

Ilawil maʼ u xuʼulul a biskaba yéetel Jéeoba yéetel tsʼáa metas ichil a kuxtal. ¡Beyoʼ yaan a disfrutartik le kuxtal utiaʼal mantatsʼoʼ!

Baʼax ta kanaj

• ¿Baʼax eʼesiktech Jéeobaeʼ jach tu jaajil yaan u yáantkech utiaʼal maʼ u xuʼulul a meyajtik?

• ¿Baʼax jeʼel a beetik utiaʼal a maas biskaba yéetel Jéeobaeʼ?

• ¿Bix jeʼel u yáantkech a tsʼáaik metas ichil a kuxtaleʼ?