Rogo gi wirikapai nga ga Baibiri re naabaha, mo ima wirika dungu apai tipa Yekova. Agu apai mo nawirikihe ima sa ro mo kpinyemuko ni bakerehe gbe na si nawira wa mo ima kpara gamo raka fuko na ki zi bapatiza. Ka si du nga mo ata manga nga ha wo te, isoke, mo naberãpa mangaha wo barambeda. Ono gamo sonakumbatayo adigonga ti bapatiza te. Mo ima rengba kaa mbeda na Yekova nyeanye kindi. Rogo gine gene?

1. Tipagine si aida mo nindu kindi kumbatayo ti ni kaa nyakasa gamo pabakure na Yekova?

Ani du wa ka ani mangi ome nyanyaki kaa ndu kindi kumbatayo kaa nyakasa gaani pabakure na Yekova. Tipagine? Tipa ‘ka ani bitikpanga’ kusayo tiko ya. (AEbere 2:1) Ginipai rengbe ka undo rani ani naairiso Yekova kindi ni rururani? Ani ima rengba ka nye kaa mangasunge tungusapai na kini ngere tipa kura agene kaa mangasunge fu gaani Mbori ni bakerehe gbe. (Mo gedi AFiripoio 3:16.) Iriso Yekova nga gu yangara wene gene raka ki susi!—Atambuahe 84:10.

2. Ginipai berewe si aida mo nindu kindi kumbatayo kaa mangaha?

Wa vura duhe nga gi wirikapai nga ga Baibiri re nandu ka digo awere, gamo raka ni Kristano nikaa ndu kindi kumbatayo. Baibiri nape gupai nga, si naida ani ‘ukadi vovo boro.’ (AEfeso 4:23, 24) Wa mo nikaa ndu kindi kumbatayo kaa wisigo Fugo Mbori na kini ndu tipa agu adunguratise nga ga dungurati, mo nika wirika vovo apai tipa Yekova na gako asino. Mo ngere tipa agene nga gu rengbe mo ka wirika gako asino ni bakerehe gbe rogo gamo raka yo ngbaha. Mo nindu kindi kumbatayo kaa manga agu aariapai si aidaha tipa ka sa Yekova ko du na ngbarago.

3. Waigu Yekova nika undo ro mo mangi sonakumbatayo?

Baibiri naya: ‘Mbori . . . asá roni tigako oni du teketeke, ki nyakasi roni, ki ngarasi roni.’ (1 Petero 5:10) Ani dunduko nagbia tirani agbia na aasada. Yekova nafu gu ome furani si aidaha tipa ka ru nyanyaki. (Atambuahe 139:23, 24) Ko kidohe tipa ka fu nyemupai foro gbiati ome tipa mo irisi ko niruru ro.—Mo gedi AFiripoio 2:13.

 MO WIRIKI KURA DUNGU APAI

4. Mo nifura afura kindi na wene Bakureamo

Kparakpee gbiati wisigo Baibiri ima undo ro mo da ni bakurea Yekova. Waigu rengbe agu apai re ka undo ro mo mbedi na ko gbe?

Mo gedi Atambuahe 62:8, na tifuoho, mo ki sakipai tipa gi sanahe re:

• Tipa ka nyakasa gamo pa bakure na Yekova, waigu rengbe mo ka mbakada gu gene mo amanga gamo kparakpee ngbaha?

Mo gedi Atambuahe 1:2, na tifuoho, mo ki sakipai tipa gi sanahe re:

• Tipa ka nyakasa gamo pabakure na Yekova, waigu rengbe mo ka manga ariapai rogo gamo geda Baibiri?

Waigu rengbe mo ka manga gamo wisigopai nisase ngba gu gene mo nika gbia undo ngbaha ti ni? Tipa ka bi bete aberãpai, mo bi gu VIDIO re, na tifuoho, mo ki sakipai tipa agu asanahe ngbefuoho.

• Gini aberãpai rogo gu vidio re rengbe mo ka mangaha?

• Gini riiapai mo aida ka wisigoho?

 GINIPAI MO NAWIRIKIHE?

Mo nindu kindi kumbatayo kaa nyakasa gamo pabakure na Yekova na kini moi agu asásá nga ga toro. Sidu, mo ima rengba ka raka nyeanye kindi na ngbarago!

Fugöpai

• Tipagine rengbe mo ka du ti ni na gu kido nga Yekova nika undo ro aundo mo irisi ko ni ruru ro?

• Waigu rengbe mo ka nyakasa gamo pabakure na Yekova?

• Waigu rengbe agu asásá nga ga toro ka undo ro mo mangi sonakumbatayo?