1.  ¿Iñi am tati Bütra Babilonia?

2.  ¿Chumül eipicünongi ñi peubaluhual tati Mesías?

3.  Lahuentun dungu mu pünengequelu mollbüñ

4.  Quiñe cristiano, ¿elcünopeabüi mai tañi büta cam cure?

5.  Billque fiesta bemngequelu

6.  Tul cutran (enfermedad contagiosa)

7.  Negocio dungu mu ca billque dungu nüucülelu tati ley mu

 1. ¿Iñi am tati Bütra Babilonia?

Tati Bütra Babilonia pengeli com pu coilaque religion, ¿chemu eipiabüiñ tüba? (Apocalipsis 17:5). Pebinge tübachi dungu:

• Com huall Mapu mu müli tati Bütra Babilonia. Biblia eipi tati Bütra Babilonia anüli reque huente bentren pu che mapu mu. Cabei ngünenebi com pu loncolelu mülelu Mapu mu (Apocalipsis 17:15, 18).

• Tati Bütra Babilonia pengelnelai pu politico cam pu negociante ngillaquelu ca vendequelu. Apümcangele hula tati Bütra Babilonia, pu lonco ülmen Mapu mu ca pu negociante petu mülecaaingün (Apocalipsis 18:9, 15).

• Tati Bütra Babilonia inayentuquelabi Chau Dio. Tati Bütra Babilonia quiñeucüli pu che tañi ngünenel mu, bemngechi ñi llohual plata cam ñi bürenengeal. Beimu pobo piuquengechi domüche reque beli, prostituta ca eipingequi (Apocalipsis 17:1, 2). Cabei ngünencaquebi bentren che com huall Mapu mu ca bentren che langümngi quidu tañi duam mu (Apocalipsis 18:23, 24).

Huiñotuaimi dungu 13 ñi dungu huirilelu 6

 2. ¿Chumül eipicünongi ñi peubaluhual tati Mesías?

Biblia eipi upale hula 69 semana, peubaluhuai tati Mesías (papiltoiñ Daniel 9:25).

• ¿Chumül coni ñi raquingeal beichi 69 semana? Beichi tripantu poulu Nehemías Jerusalén mu “ñi cüme elcünongetual ca huiño deumangetual Jerusalén”, coni ñi raquingeal beichi 69 semana (Daniel 9:25; Nehemías 2:1, 5-8).

• ¿Chumteñmai beichi 69 semana? Quiñeque mu Biblia mu quiñe antü pengelneabüi quiñe tripantu (Números 14:34; Ezequiel 4:6) Beimu quiñe semana pengeli 7 tripantu. Beimu 69 semana pengeli 483 tripantu (69 x 7).

• ¿Chumül bentepoi beichi 69 semana? Raquiliiñ 483 tripantu beichi Nehemías aculu Jerusalén mu, pohuaiñ beichi tripantu Jesús tañi bautizahun ca Mesías ngepoi (29 t.m.a.) (Lucas 3:1, 2, 21, 22). 

Huiñotuaimi dungu 15 ñi dungu huirilelu 5

 3. Lahuentun dungu mu pünengequelu mollbüñ

Lahuentungele quiñe che pünengeabüi quidu tañi mollbüñ. Cristianongequiiñ, beimu bemquelaiñ quiñeque dungu: hulquelaiñ taiñ mollbüñ tañi tuculelngeal caque che mu. Ca nentulelngelaabüiñ mollbüñ tañi huiño tuculelngeal upale quiñeque antü operangen mu (Deuteronomio 15:23).

Quiñeque mu llohuabüiñ taiñ lahuentuñmangeal quiduque iñchiñ taiñ mollbüñ. ¿Chuchi am llohuabüiñ? Examen de sangre, hemodiálisis, hemodilución, pünengeal maquina llouquebilu mollbüñ tripamequelu cam maquina circulación extracorpórea cam bomba de derivación cardiopulmonar pingelu. Com pu cristiano ngümintuabüi (dulliabüi) chumngechi pünengeabüi tañi mollbüñ operangele, bemngele billque examen ca lahuentuñmangele. Pu doctor caqueumeabüi tañi lahuentuñmaabel pu cutrancülelu. Beimu petu ñi operangenon ca lahuentungenon, com pu cristiano raquiduamabüi chumngechi ñi pünengeal tañi mollbüñ. Beimu ramtuunge:

• Pünengele quiñe maquina ñi llohual tami mollbüñ ca huiño tuculelngeal tami cuerpu mu, huelu püchüñma mu müten catrürumele mollbüñ, tami raquiduam ¿elupeabeimu mai tami llohual beichi mollbüñ? Cam ¿tami raquiduam mu eipiabüimi beichi mollbüñ tripalu cuerpu mu huitrungeabüi mapu mu? (Deuteronomio 12:23, 24).

• Quiñeque lahuentun mu nentungequi pu che tañi mollbüñ, cümelcünongequi ca huiño tuculelngequi cutran che tañi cuerpu mu cam tañi allben mu. Tami raquiduam inaquelu Biblia tañi ngülam, ¿elupeabeimu mai tami bemngechi lahuentungeal cam bemlaabüimi?

Huiñotuaimi dungu 39 ñi dungu huirilelu 3

 4. Quiñe cristiano, ¿elcünopeabüi mai tañi büta cam cure?

Biblia eipibi pu curehuen tañi elcünounoal. Cabei eipi quiñe domüche elcünole tañi büta cam quiñe huentru elcünole tañi cure, huiño curehuetulaai ca che mu (1 Corintios 7:10, 11). Huelu quiñeque mu pu cristiano hueya upamequelu, raquiduamabüi tañi elcünoal tañi büta cam cure. Tübachi dungu upaabüi:

• Ayüquelai eluabel tañi pu che com tañi duamnel: Huentru piquenolu tañi eluabel tañi pu che ñi duamnel, beimu nielaingün chem dungu no ume tañi mongeleam (1 Timoteo 5:8).

•   Mülequi nalben dungu ca hulelcangen: Bente hulelcangequelu quiñe che curehuen mu, cutranpoabüi cam lapoabüi (Gálatas 5:19-21).

• Hueniyehuelaabüi Jehová: Quiñe cristiano bente tañi catrütumequetu tañi büta cam cure tañi huenupüramabel Jehová, beimu bemhuelaabüi (Hechos 5:29).

Huiñotuaimi dungu 42 ñi dungu huirilelu 3

 5. Billque fiesta bemngequelu

Pu cristiano conquelaiñ com pu fiesta Jehová ayüquenolu. Beimu, caque quiñeque iñchiñ inaneaiñ taiñ raquiduam nielu Biblia tañi ngülam taiñ quimal chumabüiñ upale quiñeque dungu nüucülelu billque fiesta mu:

• Quiñe che eipiabeimu: “Felices fiestas”. “Chaltumai” eipiabüimi müten. Ayüle tañi doi quimal, quimelelabüimi chemu conquelaimi beichi fiesta mu.

• Bemngele quiñe fiesta, tami büta cam cure huenupüramquenobilu Jehová mangelabeimu tami quiñeñtrür iyal tañi pu che engün. Tami raquiduam eluelmu tami amual, eipiabüimi: “Bemngele hueyaque huimtun beichi fiesta mu, iñche bemlaan”.

• Bülcülepale quiñe fiesta, tami ngen cüdau cüpa eluelmu quiñe bono. Eimi, ¿lloupeabüimi mai? Bemabüimi. Cabei ramtuhuabüimi: “Tañi ngen cüdau, ¿eluanu tati bono tübachi fiesta tañi duam mu? Cam ¿eluanu tañi mañumcülen iñche tañi cüme cüdaubengen mu?”.

• Bülcülepale quiñe fiesta, quiñe che cüpa eluelmu quiñe regalo. Eipiabeimu: “Iñche quimnen tami concülequenon tübachi fiesta mu, huelu cüpa elueyu tübachi regalo”. Elupeabeimu beichi regalo cüme duam mu. Cabei ramtuhuabüimi: “¿Elupenu mai beichi regalo tañi quimal chumten maneluucülen tañi mupitun mu cam tañi conal beichi fiesta mu?”. Loncontuculmi hula com tübachi dungu, ngümintuaimi (dulliaimi) tami lloupeal mai tübachi regalo. ¡Beli tati! Ayüquiiñ tüng raquiduam nieal ca nor piuqueyeabel Jehová (Hechos 23:1).

Huiñotuaimi dungu 44 ñi dungu huirilelu 1

 6. Tul cutran (enfermedad contagiosa)

Iñchiñ piuqueyebiiñ tati pu che. Beimu quimliiñ cam raquiduamliiñ taiñ niel quiñe tul cutran, cuñiutucuhuaiñ taiñ ulpalelnoabel caquelu pu che. Iñchiñ inanequiiñ Biblia ñi ngülam eipilu: “Piuqueyebinge caque che chumngechi piuqueyehuimi eimi” (Romanos 13:8-10).

Pu che tul cutran nielu, ¿chumngechi inaabüi tübachi ngülam Biblia mu? Cuñiutucuuquingün tañi mabülnoabel, trepetunoabel cam mancuhunoabel pu che. Cabei quiñeque peñi cam lamngen mangel-laabüi quiñe che nielu tul cutran tañi ruca mu tañi cuñiutucuabel tañi pu che. Upale tüba, beichi che tul cutran nielu lladcülaabüi. Ca bemngechi petu tañi bautizaunon, tati nielu tul cutran quimelelabi tañi cutrancülen tati adcünoquelu pu loncolelu trahunche mu. Bemngechi bautizahuabüi ca cuñiutucungeabüi caquelu pu che. Cabei quiñe che ayübüle tañi conal quiñe noviazgo mu, huelu raquiduamle quidu tañi nieabel quiñe tul cutran, hunelu mu cümeabüi tañi bemngeal quiñe examen de sangre. Com tüba bemliiñ, pengelaiñ taiñ “duam müten hunencülelai, doi mai caque che ñi duam cabei” (Filipenses 2:4).

Huiñotuaimi dungu 56 ñi dungu huirilelu 2

 7. Negocio dungu mu ca billque dungu nüucülelu tati ley mu

Chem negocio dungu conliiñ ume, cüme huirintucuabiiñ chem taiñ ngütramcapel. Ca bemngechi bemaiñ taiñ pu peñi ca pu lamngen mu (Jeremías 32:9-12). Huelu quiñeque mu taiñ pu peñi ca pu lamngen trabtuhuabüi huelulcan dungu mu tati plata cam caquelu dungu ñi duam mu. Bemngechi upaliiñ, quidulen mu cüme ngütramcaabiiñ taiñ peñi cam lamngen, bemngechi taiñ cümelcautual.

Huelu huedalcangeliiñ coilatudungun mu cam ngünencangeliiñ, ¿chumabüiñ? (Papiltunge Mateo 18:15-17). Jesús elueiñmu cüla ngülam taiñ inaal:

1. Hunelu mu cümelcautuabüiñ (pebinge Mateo 18:15).

2. Pepi cümelcautunoliiñ, yemeabüiñ trahunche mu quiñe cam epu che cüme hueniyebilu Jehová taiñ quelluatu (pebinge Mateo 18:16).

3. Amulecale tati hueyaque dungu, bei hula quimelelabiiñ pu loncolelu (pebinge Mateo 18:17).

Bemngechi dungu upaliiñ, yemelaabiñ taiñ pu peñi ca lamngen juzgado mu, bemngechi hueya dunguyengelaai Jehová ca tati trahunche (1 Corintios 6:1-8). Huelu quiñeque mu duambalngeabüi ñi ngüneduamngeal taiñ upan quiñe juicio mu. ¿Chumül? Hudaule quiñe che tañi büta cam cure mu, ngümintungeai (dullingeai) iñi nieabi pu püchüqueche cam tati pension alimenticia. Cabei juicio mu ngüneduamngeabüi quiñe testamento, quiñe che ayüle cobraal quiñe seguro cam quiñe empresa cullinole tañi deben eipiquelu am tañi nienon plata, declaracion de bancarrota ca pingequelu. Quiñe cristiano ayüle tañi quelluatu tati ley tañi cümelcünotol beichi dungu, caiñetulaabi Biblia tañi quimelelquel.

Ca bemngechi quiñe cristiano caiñetulaai Biblia tañi eipin, quimelelbile pu autoridad ñi nüntucangel cam huedalcangel quiñe che cam püchüche. Cam ñi hueñeñmangen cam langümngen quiñe che.

Huiñotuaimi dungu 56 ñi dungu huirilelu 3