1.  Ise do Babel na Banggal Ai?

2.  Nantigan do Parroh ni Mesias Ai?

3.  Perawatan Kesehatan na Manggunahon Daroh

4.  Suami Istri na Padaoh-daoh

5.  Hari Raya pakon Perayaan

6.  Naborit na Menular

7.  Masalah Bisnis pakon Hukum

 1. Ise do Babel na Banggal Ai?

Hunja do ibotoh hita anggo “Babel na Banggal” ai manggambarhon ganup agama palsu? (Pangungkabon 17:5) Pardiateihon hita ma aha na ihatahon Bibel pasal ai:

• Banggal tumang do pengaruhni i sab dunia on. Bibel mangkatahon, Babel na Banggal ai hundul i atas ni “ganup bangsa pakon ganup jolma”, janah irajai ia do “ganup raja na i tanoh on”.​—Pangungkabon 17:15, 18.

• Sedo manggambarhon organisasi politik atap pe organisasi perdagangan ia. Adong ope “ganup raja na i tanoh on” pakon “ganup partiga-tiga” sanggah iripaskon Babel na Banggal ai.​—Pangungkabon 18:9, 15.

• Ibahen ia do sambor goran ni Naibata. Isobut do ia “boru jalang” halani marhasoman janah rup marhorja do ia pakon pamarentah ase boi dapotan duit pakon dukungan. (Pangungkabon 17:1, 2) Ipakahou ia do ganup halak na i tanoh on, janah bahat do halak na matei ibahen ia.​—Pangungkabon 18:23, 24.

Mulak hu parlajaran 13 nomor 6

 2. Nantigan do Parroh ni Mesias Ai?

Bani Bibel ihatahon dong 69 minggu dokahni ronsi parroh ni Mesias.​—Basa Daniel 9:25.

• Nantigan do 69 minggu ai imulai? Bani tahun 455 SM. Sanggah ai ma das Gubernur Nehemia i Jerusalem laho “pajongjongkon janah padearhon” kota ai.​—Daniel 9:25; Nehemia 2:1, 5-8.

• Piga dokah do 69 minggu ai? Saminggu dokahni pitu ari. Jadi 69 minggu (69 x 7 ari) ai ma 483 ari. Adong do piga-piga hatorangan bani Bibel na mangkatahon sarupa do sada ari pakon satahun. (4 Musa 14:34; Hesekiel 4:6) Jadi 483 ari sarupa ma ai pakon 483 tahun.

• Nantigan do 69 minggu ai marujung? Anggo ibilangi hita 483 tahun humbani tahun 455 SM, marujung ma ai bani tahun 29 M. a Sanggah ai ma Jesus ididi janah gabe Mesias!​—Lukas 3:1, 2, 21, 22.

Mulak hu parlajaran 15 nomor 5

 3. Perawatan Kesehatan na Manggunahon Daroh

Adong do perawatan kesehatan na manggunahon darohta sandiri na lang boi ijalo halak Kristen. Umpamani, donor darah atap pe manimpan darohta paima operasi.​—5 Musa 15:23.

Tapi, adong do perawatan kesehatan na mungkin boi ijalo halak Kristen. Umpamani, tes darah, cuci darah (hemodialisis), pengenceran darah (hemodilusi), manggunahon mesin penyelamat sel atap manggunahon mesin jantung-paru. Bani perawatan kesehatan sisonai, maningon nasiam do na mamutuskon sonaha daroh ni nasiam igunahon sanggah dong operasi, pemeriksaan medis, atap proses pengobatan. Ra do marlegan-legan cara ni dokter mangkorjahon ai. Jadi paima iputuskon nasiam laho manjalo operasi, pemeriksaan medis, atap proses pengobatan, porlu do tangkas ibotoh nasiam sonaha daroh ni nasiam ai igunahon. Pingkirhon ma on:

• Sonaha do pangahapku anggo ipakaluar deba darohku manggunahon mesin janah soh tongkin mesin ai? Anggo ipamasuk do use daroh ai hu angkulangku halani huahap darohku do ai, janah lang porlu iuseihon “hu tanoh”, sonaha ma panggora ni uhurhu?​—5 Musa 12:23, 24.

• Sonaha ma anggo ibuat darohku ai, iubah kandunganni janah ipamasuk use bani angkulangku? Targanggu do panggora ni uhurhu? Atap hujalo do perawatan sisonai?

Mulak hu parlajaran 39 nomor 3

 4. Suami Istri na Padaoh-daoh

Bibel mangkatahon lang boi suami istri padaoh-daoh. Tapi anggo maningon padaoh-daoh do sidea, seng boi sidea marhajabuan pakon halak na legan. (1 Korint 7:10, 11) Age pe sonai, adong do piga-piga situasi na mambahen halak Kristen padaoh-daoh.

• Suami na lang ra mansarihon kaluargani: Gabe lang adong be duit atap pe sipanganon ni kaluargani.​—1 Timoteus 5:8.

• Kejam pambahenan ni pasanganni: Isiksa pasanganni ia ronsi boritan atap ronsi laho matei.​—Galatia 5:19-21.

• Ilanglangi manombah Jahowa: Gabe lang boi be ia manombah Jahowa halani ilanglangi atap pe iancam pasanganni.​—Lahoan 5:29.

Mulak hu parlajaran 42 nomor 3

  5. Hari Raya pakon Perayaan

Halak Kristen lang dihut manrayahon hari raya na lang iharosuhkon Jahowa. Tapi bani piga-piga situasi, maningon ibahen halak Kristen do haputusan domu bani panggora ni uhurni na dob ilatih Bibel. Pardiateihon ma piga-piga contohni.

• Anggo adong halak na mangkatahon selamat bamu. Hatahon ma “Tarima kasih”. Tapi anggo adong kesempatan, boi do ipatorang nasiam mase lang dihut nasiam manrayahon ai.

• Anggo iarahkon pasanganmu na lang Saksi Jahowa nasiam rup mangan pakon kaluarga sanggah adong perayaan. Porini laho do nasiam halani lang targanggu panggora ni uhurmu, patugah ma lobei bani pasanganmu anggo adong ijai acara na marlawanan pakon hata ni Naibata, lang boi dihut nasiam mangkorjahon ai.

• Anggo bos nasiam mambere bonus sanggah hari raya. Ai itulak nasiam do ai? Nasiam ma na mamutuskon. Tapi, maningon ipastihon nasiam do lobei sonaha pandapot ni bosmu ai pasal bonus ai. Anggo ijalo nasiam bonus ai, ai iaganni do nasiam dihut manrayahon perayaan ai? Atap, iaganni do bonus ai pitah mangkatahon tarima kasih bamu halani domma ringgas marhorja?

• Anggo adong na mambere hadiah bamu sanggah adong perayaan. Ra do adong na mangkatahon, “Hubotoh do lang dihut nasiam manrayahon hari raya on, tapi sihol do ahu mambere hadiah on bamu.” Anggo masa sisonai, pingkirhon ma on: Halani bujur do ia ase mambere ai? Atap na manguji haporsayaonmu do ia janah marusaha ase dihut ham manrayahon ai? Dob ai, boi ma iputuskon ham, ijalo ham do hadiah ai atap lang. Sanggah mambahen haputusan, totap ma hita setia bani Jahowa janah manjaga panggora ni uhurta totap borsih.​—Lahoan 23:1.

Mulak hu parlajaran 44 nomor 1

 6. Naborit na Menular

Anggo adong naboritta janah boi menular ai bani na legan, pasti jaga do hita ase ulang hona naboritta ai bani sidea. Jadi, dingat hita ma hata ni Bibel na mangkatahon, “Maningon haholonganmu do hasomanmu na legan doskon dirimu.”​—Rom 13:8-10.

Sonaha hita boi mandalankon ayat on? Anggo boritan sasahalak janah boi menular naboritni ai bani na legan, ulang ma marsalaman, ulang idahop atap pe isummah ia halak na legan. Ulang ma borit uhurni anggo lang ra halak na legan mangontang ia hu rumah ni sidea. Paima ididi, maningon ipatugah do bani koordinator badan penatua pasal naboritni ai. Dob ai boi ma sintua mambahen pengaturan ase ulang menular naboritni ai bani hasoman na laho ididi. Paima marpacaran, maningon ra do ia lobei periksa darah. Anggo ihorjahon ia ganupan ai, on bukti na holong do uhurni bani hasoman na legan. Janah idingatni do homa hata ni Bibel na mangkatahon, “Ulang ma pitah mampardiateihon na porlu bani nasiam, tapi pardiateihon ma na porlu bani na legan.”​—Pilippi 2:4.

Mulak hu parlajaran 56 nomor 2

 7. Masalah Bisnis pakon Hukum

Anggo dong urusanta pasal bisnis atap duit pakon halak na legan, termasuk pakon hasoman sahaporsayaon, dear do ibahen hita surat perjanjian ase ulang adong masalah. (Jeremia 32:9-12) Halani ra do sipata adong masalah pakon hasoman sahaporsayaon halani duit atap na leganni. Anggo dong masalah, maningon podas do ai isaloseihon. Ulang isaritahon bani na legan, janah maningon marusaha ma ase mardamei.

Tapi sonaha ma anggo adong masalah na serius, songon penipuan atap fitnah? (Basa Mateus 18:15-17.) Ipatugah Jesus do tolu langkahni:

1. Marusaha ma ase pitah nasiam na dua na pasaloseihon masalah ai.​—Tonggor ayat 15.

2. Anggo lape salosei, pindo ma sada atap dua hasomanmu na toguh haporsayaonni laho mangurupi ham manjumpahi ia.​—Tonggor ayat 16.

3. Anggo totap dope lang salosei masalah ai, pindo ma pangurupion ni sintua.​—Tonggor ayat 17.

Bani piga-piga kasus, ulang ma iboan hita hasoman sahaporsayaonta hu pengadilan laho pasaloseihon masalah. Halani boi do ai mambahen maseda goran ni Jahowa pakon hasoman i kuria. (1 Korint 6:1-8) Tapi, adong do piga-piga masalah na boi iboan hu pengadilan. Umpamani parsirangan, hak asuh anak, pembayaran tunjangan cerai, klaim asuransi, kebangkrutan, atap pasal surat wasiat. Anggo adong halak Kristen na pasaloseihon masalah sisonai i pengadilan marhasoman damei, lang manlanggar hata ni Naibata ia ijai.

Sonai ma homa, anggo adong kasus kejahatan na serius, umpamani pemerkosaan, pelecehan anak, penyerangan, manrampok, atap mambunuh. Anggo dong halak Kristen na manlaporhon ai bani pihak berwajib, lang manlanggar hata ni Naibata ia ijai.

Mulak hu parlajaran 56 nomor 3