1.  Wat is Babilon, dai Groot?

2.  Wonair däir dai Messias kåme?

3.  Dokterig wat blaud benutse

4.  Uutenanergåen

5.  Fijrdåg un feste fijre

6.  Krankhëte wat anhake

7.  Geschäft un gericht daile

 1. Wat is Babilon, dai Groot?

Wosoo waite wij dat “Babilon, dai Groot” bedüürt dai falsche religione? (Apocalipse 17:5) Denk hijr ais an:

• Sai hät kraft un macht upe ganse wild. Ine Bijbel stäit dat Babilon, dai Groot sit up ‘feel gëgende’. Sai hät ‘ain regirung oiwer dai regirungs upe Ër’. (Apocalipse 17:15 un 18)

• Sai bedüürt ni dai politik un uk ni dai hanelrig. Wij waite dit weegen ‘dai regirungs fone wild’ un ‘dai wat hanle daue’, daue leewig blijwe wen sai uutrot wart. (Apocalipse 18:9 un 15)

• Sai däit dai lüür weglenke fon God. Sai wart neent as ain huur weegen sai däit dai regirungs bijståe taum gild un andrer daile krijge. (Apocalipse 17:1 un 2) Sai däit feel lüür upe wild bedraige. Sai hät schuld oiwer feel lüür sijne dood. (Apocalipse 18:23 un 24)

Trööguut gåe nå dem kapitel 13 numer 6

 2. Wonair däir dai Messias kåme?

Dai profesijr oiwer dai 69 weeke däit oos helpe saie wonair as dai Messias kåme däir. (Lees Daniel 9:25)

• Wonair häwe dai 69 weeke anfånge? Is in dem jår 455 airer as Kristus sijn tijd wääst. In dat jår is Neemias kåme in Jerusalém taum dai stad ‘nåarbëre un nåbuuge’. (Daniel 9:25, Neemias 2:1 un 5 bet 8)

• Wolang däire dai 69 weeke uuthule? In wek profesijrs fone Bijbel, air dag bedüürt air jår. (Números 14:34 un Ezequiel 4:6) Den, jërer wek bedüürt soiwen jåre. In dës profesijr, 69 weeke sin oiwerain as 483 jåre (69 weeke x 7 dåg).

• Wonair däire dai 69 weeke anhule? Wen wij tele daue 483 jåre fon 455 airer as Kristus sijn tijd an, dat giwt hen dat jår 29 nå Kristus sijn tijd a. In dit jår, Jësus is tauwt woore un is dai Messias woore! (Lucas 3:1, 2, 21 un 22)

Trööguut gåe nå dem kapitel 15 numer 5

 3. Dokterig wat blaud benutse

In wek dokterig wart benutst dem aigen mësche sij blaud taum forsuike der kurijre. Åwer dai kristen daue wek fon dës dokterig ni anneeme, soo as blaud afgeewe urer upwåre taum nåheer benutst ware in aim operijren. (Deuteronômio 15:23)

Åwer andrer dokterig kan sin ware annåme. Soo as blaud exame måke, hemodiálise, hemodiluição, recuperação intraoperatória de células urer benutse dai máquina coração-pulmão. Jërer krist mut for sich selwst uutsuike wosoo sij aigen blaud benutst wart wen dai operijrt wart, exame mökt urer in anerd dokterig. In al dës daile, kan sin dai dokters daue ni oiwerain dårin arbëre. Soo, airer as air krist anneeme däit sich operijre låte, exame urer anerd dokterig måke, dai mut genau waite wat måkt wart mit sijn aigen blaud. Den fråg dij:

• Un wen wat fon mijn blaud afloope wart un dat blaud up ain tijdlang anhült in mijn körper loope, däir mij forstand erlaube dat ik dat blaud werer anneeme däir, urer däir ik forlange dat ‘upt ër schüre’? (Deuteronômio 12:23 un 24)

• Wen in aim dokterig wat fon mijn blaud ruutermåkt wart, formischt wart un werer rinermåkt wart in mijne körper, wosoo gäit mijn forstand dat an?

Trööguut gåe nå dem kapitel 39 numer 3

 4. Uutenanergåen

Doir dai Bijbel ware dai forfrigte lüür formånt dat sai ümer t’hoopblijwe daue. Stäit gans klår ine Bijbel dat dai wat uutananergåe daue döre ni werer frijge. (1 Coríntios 7:10 un 11) Åwer, wekmåls kan wat passijre dat wek kristen uutsuike uutananergåe.

• Wen dai kërl sich up kain årt bekümert taum dai familg ernääre dat dai familg kair gild un eeten hät. (1 Timóteo 5:8)

• Wen dai kërl urer fruug sër oft slåe wart dat dat kan gefärlig sin tau dem kërl urer fruug sijn gesundhët un sogår tau dem sij leewend. (Gálatas 5:19 bet 21)

• Wen dai kërl urer fruug wat mökt dat hai urer sai up kain årt Jehovaa sijne wile måke kan, un dat kan dem sijne ümgang mit Jehovaa sër wat schåre. (Atos 5:29)

Trööguut gåe nå dem kapitel 42 numer 3

  5. Fijrdåg un feste fijre

Dai kristen daue kain fijrdåg fijre wat Jehovaa ni gefale. Åwer, wekmåls kan wat upkåme woo jërer krist na sijm forstand wat inlërt is nane Bijbel mut uutsuike wat dai måke däit. Soo as:

• Wen air sägt tau dij: “Fröölig wijnachte!”. Duu kast säge: “Dankeschöön!” Åwer, wen dai mësch waite wil woweegen as duu ni der wijnachte urer fijrdåg fijre däist, duu kast dem dat uutdüüre.

• Wen dij kërl urer dijn fruug, wat ni Tüüge fon Jehovaa is, dij nööge däit taum an fijrdag wat eete in der fründe sij huus. Wen dijn forstand dat nischt schåre däit wen’s duu dår hen gäist, duu kast tau dijn kërl urer fruug uutdüüre dat wen dår wat måkt wart, wat besägen hät mit falsch religion duu däist dårin ni mitmåke.

• Wen dij schef däit dij mër loon anbaire wen dat jår bald uut is. Is dat forkërd dat anneeme? Dat kümt up an wat dij schef denke däit. Denk hijr an: Däit dij schef denke dat höört tau tau dem fijrdag? Urer wil hai dij bloos danke for dijne arbëd in dem jårlang?

• Wen dij air beschenke wil ine wijnachtstijd. Kan sin dai däit säge: “Ik wait dat’s duu dat ni fijre däist, åwer lijkerst soo ik wil dij dat geewe.” Kan sin dai wil bloos gaud sin mit dij. Åwer, is gaud dij fråge: “Wil dai mijne gloobe pruiwe? Wil dai dat ik mij inlåte schal mite fijrdåg?” Nåheer dat’s duu hijr oiwer dacht häst duu must uutsuike dat anneeme urer ni. In ales wat wij uutsuike wij wile aine rëgen forstand häwe un reäl tau Jehovaa sin. (Atos 23:1)

Trööguut gåe nå dem kapitel 44 numer 1

 6. Krankhëte wat anhake

Wat kan man måke wen wij ain krankhët häwe wat der andrer anhake kan? Wij lijbe dai lüür, dårweegen daue wij uppasse taum der andrer kain krankhët anhake. Wij passe up lijkerst wen wij oos ni sicher sin of wij soo’n krankhët häwe wat anhakt. Wij måke dat weegen ine Bijbel stäit: “Lijb dijne näigste soo as dij selwst.” (Romanos 13:8 bet 10)

Wat däit dat bedüüre? Air mësch wat ain krankhët hät wat anhakt dört ni mit wile’s an andrer ranerfåte taum beschöönen, soo as hand raike, drüke urer pusse. Dai dört dat uk ni slecht fijne wen wek der mësche ni nööge taum na eer huus kåme, dat sai eer familg behüüte wile. Airer as sich soo’ne mësch tauwe löt, dai mut dem wat dai grup ülster lenket beschaid säge oiwer sijn krankhët. Soo, kan ales inricht ware taum dai andrer behüüte wat sich uk tauwe låte dat sai ni krank ware. Un wen dai mësch sich ni sicher is of dai ain krankhët hät wat anhakt? Wat mut dai måke airer as sich ain bruud urer aine bruudman neeme? Dai mut uutm wile blaud exame måke. Soo däit dai wijse dat dai sich bekümre däit mit dai andrer. Ine Bijbel stäit: “Suikt ni bloos wat jij wile, åwer uk wat dai andrer wile.” (Filipenses 2:4)

Trööguut gåe nå dem kapitel 56 numer 2

 7. Geschäft un gericht daile

Feel problëms koine besijdlåte ware wen wij ale weegen air papijr måke låte oiwer dat wat besägen hät mit geschäft urer hanelrig, lijkerst wen dat mite bruirers un swesters is. (Jeremias 32:9 bet 12) Nog soo, wekmåls kan foirkåme dat dai kristen weegen geschäft urer gild sich ni inenaner forståe daue. Wen soo wat passijrt dat best is dat glijk int raich bringe, im freere un bloos sai bëd.

Åwer, wosoo wat slimes int raich bringe, soo’s bedraigen urer uplaigen? (Lees Mateus 18:15 bet 17) Jësus hät inlërt wij schåle 3 daile måke:

1. Forsuike dat tüschen juuch bëd int raich bringe. (Sai der spruch 15)

2. Wen dat ni richtig giwt, forlang dat air urer twai wat stark im gloobe sin mit dij mitkåme taum mit dem mësche fortele. (Sai der spruch 16)

3. Wen lijkerst soo dat ni int raich bröcht wart, den is nischt wijrer bij as dat tau dai ülster säge. (Sai der spruch 17)

Oos bruirers un swesters forklåge upm gericht kan måke dat dai lüür slecht oiwer Jehovaa un oiwer dai gemaind denke. (1 Coríntios 6:1 bet 8) Åwer, weegen wek daile, kan sin muite wij upt gericht gåe taum dat int raich bringe. Soo’s uutenanersrijwen, taum uutsuike wee dai kiner behule däit un gild geewe mut taum dai ernääre, wen air mësch uuttålt ware mut, taum wirtstchaft indaile urer wen ain geschäft pangeråt wart. Air krist wat upt gericht gäit taum soo’n daile int raich bringe un mökt ales wat dai kan taum der freere hule, is ni gëgen dat wat dai Bijbel inlërt.

Un wen sër wat slechtes passijrt, soo as mit gewald aim angåe taum seks måke, kiner trasijre urer kwääle, aine forslåe, steelen un doodmåken? Wen air krist upt gericht gäit taum soo wat angeewe, dat is ni forkërd urer gëgen dai formånen fone Bijbel.

Trööguut gåe nå dem kapitel 56 numer 3