1.  Nkene to vulu okundhindhilika mo Babilon oshinene

2.  Mesiasa okwa li a holoka uunake?

3.  Omilandu dhepango dha kwatela mo ombinzi

4.  Okutopoka

5.  Omasiku gomafudho niituthi

6.  Omukithi gwomukwawu

7.  Oongeshefa niinima yopaveta

 1. Nkene to vulu okundhindhilika mo Babilon oshinene

Otu shi shi ngiini kutya “Babilon oshinene” otashi thaneke omalongelokalunga agehe giifundja? (Ehololo 17:5) Natu tale kiinima tayi landula:

• Osha kwata ko uuyuni awuhe. Babilon oshinene otashi popiwa sha kuutumba kombanda ‘yiigwana noongundu.’ Osho tashi “pangele aakwaniilwa yokombanda yevi.” — Ehololo 17:15, 18.

• Kashi shi ehangano lyopapolotika nenge lyopangeshefa. “Aakwaniilwa yokombanda yevi” nosho wo “aahalithi” otaya ka hupa pehanagulo lyasho. — Ehololo 18:9, 15.

• Kashi lile po Kalunga. Babilon oshinene ohashi ithanwa ohonda kamana, oshoka ohashi longele kumwe nomapangelo, omolwiimaliwa nomaliko galwe. (Ehololo 17:1, 2) Otashi pukitha aantu yomiigwana ayihe muuyuni. Osho nokuli shi na ondjo yombinzi yaantu oyendji. — Ehololo 18:23, 24.

Shuna koshileshwa 13 oshitsa 6

 2. Mesiasa okwa li a holoka uunake?

Ombiimbeli oya hunganeka kutya otapu ka pita iiwike 69 sigo Mesiasa a holoka. — Lesha Daniel 9:25.

• Iiwike 69 oya li ya tameke uunake? Oya li ya tameke momumvo 455 K.E.N. Pethimbo ndyoka omunashikandjo Nehemia okwa thiki muJerusalem a ‘tungulule’ oshilando. — Daniel 9:25; Nehemia 2:1, 5-8.

• Iiwike 69 oya kala po ethimbo li thike peni? Momahunganeko gamwe gOmbiimbeli, omumvo gumwe ogu lile po esiku limwe. (Numeri 14:34; Hesekiel 4:6) Sha hala okutya, oshiwike shimwe oshi lile po omimvo heyali. Mehunganeko ndika, iiwike 69 oyi thike pomimvo 483 (iiwike 69 x omasiku 7).

• Iiwike 69 oya hulu uunake? Ngele otwa yalula omimvo 483 okuza pomumvo 455 K.E.N., otashi tu e ta pomumvo 29 E.N. a Momumvo moka, omo naanaa Jesus a ninginithwa e ta ningi Mesiasa. — Lukas 3:1, 2, 21, 22.

Shuna koshileshwa 15 oshitsa 5

 3. Omilandu dhepango dha kwatela mo ombinzi

Opu na omilandu dhimwe dhepango, ndhoka hadhi pula ku longithwe ombinzi yomuvu ye mwene. Tu li Aakriste, ihatu gandja ombinzi yetu yi ka tulwe yalwe nenge yi pungulwe, opo tu ke yi tulwe, sho tatu ka tandwa. — Deuteronomium 15:23.

Nonando ongawo, opu na omilandu dhimwe ndhoka Aakriste taya vulu okulandula. Omilandu ndhono odha kwatela mo omakonakono gombinzi, o-hemodialysis, o-hemodilution, o-cell-salvage nenge okutulwa keshina ndyoka hali longithwa pehala lyomutima nomapunga pethimbo lyetando. Ngele tashi ya pomilandu dhetando, pomakonakono gopaunamiti nenge pepango lyontumba, Omukriste kehe oku na okuhogolola nkene ombinzi ye tayi ka longithwa. Oondohotola otashi vulika dhi longithe omilandu ndhoka momukalo gwa yoolokathana kashona. Onkee ano, wu li Omukriste, manga inoo zimina omulandu gwontumba gwetando, ekonakono lyopaunamiti nenge epango lyontumba, owa pumbwa wu kale wu shi kutya ombinzi yoye otayi ka longithwa ngiini. Ipula omapulo taga landula:

• Ngele ombinzi yandje oya zi mo molutu, e tayi kala itaayi kunguluka we uule wokathimbo, mbela eiyuvo lyandje otali ka pitika ndje ngaa ndi tale ko ombinzi ndjoka yi li oshitopolwa sholutu lwandje noinayi pumbwa okutilwahi “pevi”? — Deuteronomium 12:23, 24.

• Mbela eiyuvo lyandje ndyoka lya dheulwa kOmbiimbeli otali ka nyenyetela ndje, ngele ombinzi yandje oya kuthwa mo pethimbo lyetando, e tayi tulwa iinima yontumba yopaunamiti nokushunwa mo ishewe molutu lwandje?

Shuna koshileshwa 39 oshitsa 3

 4. Okutopoka

Ombiimbeli oya popya sha yela kutya aaihokani kaye na okutopoka nando. Oya popya wo kutya ngele oya topoka kaye na uuthemba wokuya ishewe mondjokana nagulwe. (1 Aakorinto 7:10, 11) Ihe opu na oonkalo tadhi vulu okuningitha aaihokani ya topoke.

• Okutinda okusila oshimpwiyu aanegumbo: Uuna omusamane a tindilila okusila oshimpwiyu aanegumbo lye palutu, sigo taya kala kaaye na we iimaliwa nenge iikulya ya sha. — 1 Timoteus 5:8.

• Okweehameka kolutu: Omusamane nenge omukulukadhi otashi vulika a kale e na onyanya nohe ehameke nayi mukwawo kolutu, shoka tashi tula uukolele we nomwenyo gwe moshiponga. — Aagalati 5:19-21.

• Ekwatathano lyomuntu naJehova li li moshiponga: Otashi vulika omusamane nenge omukulukadhi e shi ninge oshidhigu kumukwawo a longele Jehova. — Iilonga 5:29.

Shuna koshileshwa 42 oshitsa 3

  5. Omasiku gomafudho niituthi

Aakriste ihaya kutha ombinga momasiku gomafudho ngoka inaaga hokiwa kuJehova. Ihe Omukriste oku na okulongitha eiyuvo lye lya dheulwa kOmbiimbeli, a tokole kutya ota ka ninga po shike ngele tashi ya pomasiku gomafudho. Natu tale kiiholelwa yimwe po.

• Uuna gumwe e ku halele omahaleloyambeko. Oto vulu owala okutya, “Onda pandula.” Ngele omuntu okwa hala okuuva kutya omolwashike ihoo dhana esiku lyefudho ndyoka, oto vulu oku mu yelithila.

• Uuna kuume koye kopandjokana, ngoka kee shi Onzapo, e ku hiya mu ka lye pamwe naakwanezimo mesiku lyefudho lyontumba. Ngele eiyuvo lyoye otali ku pitike wu ye, owu na oku mu yelithila kutya ngele aantu otaya ka kutha ombinga momikalondjigilile dhoshipagani sho taya li, ngoye ito ka kutha ombinga.

• Uuna omugandji gwiilonga tashi vulika e ku pe obonasa mesiku lyefudho lyontumba. Mbela oto ke yi tinda? Aawe, ihe oshi ikolelela kunkene omugandji gwoye gwiilonga a tala ko obonasa. Mbela okwe yi tala ko yi li oshitopolwa shesiku lyefudho? Nenge ohe yi gandja owala a pandule aaniilonga ye?

• Uuna gumwe te ku pe omagano mesiku lyefudho. Otashi vulika a tye: “Ondi shi kutya iho dhana esiku lyefudho ndika, ihe onda hala oku ku pa omagano ngaka.” Otashi vulika owala omuntu ngoka e hole okugandja. Nenge pamwe tashi vulika te shi ningi owala a tale ngele owu li omudhiginini keitaalo lyoye nenge a hala wu kuthe ombinga mesiku lyefudho. Shampa wa dhiladhila kwaashihe shoka sha kwatelwa mo, ongoye mwene to ka tokola ngele oto taamba ko omagano ngoka nenge hasho. Kutya nduno oto ningi etokolo lini, kambadhala okukala wu na eiyuvo lya yela nokukala omudhiginini kuJehova. — Iilonga 23:1.

Shuna koshileshwa 44 oshitsa 1

 6. Omukithi gwomukwawu

Ohatu kambadhala okwiikwata nawa, opo kaatu taandelithe omikithi kuyalwe, molwaashoka otu ya hole. Otu na okukala hatu ikwata nawa kutya nduno otu na uushili kutya otu na omukithi gwomukwawu nenge tu uvite kutya otashi vulika tu kale tu gu na. Ohatu shi ningi, oshoka Ombiimbeli oye tu pa oshipango tashi ti: “Hola mukweni, ngaashi ngoye wi ihole mwene.” — Aaroma 13:8-10.

Oshike tu na okuninga, opo tu vulike koshipango shoka? Omuntu ngoka e na omukithi gwomukwawu ke na okukala ta papatele nenge ta hupita yalwe. Ke na okuuva nayi ngele yamwe inaye mu hiya komagumbo gawo, molwaashoka ya hala okugamena aantu yaandjawo. Manga inaa ninginithwa, na tseyithile omuunganeki gwolutu lwaakuluntugongalo kutya oku na omukithi gwomukwawu, opo pu ningwe omalongekidho gokugamena mboka taya ka ninginithwa pamwe naye. Ngele gumwe oku uvite kutya otashi vulika a kwatwa komukithi gwomukwawu, okwa pumbwa oku ki ikonakonitha, manga inaa tameka okweendelathana nagumwe. Mokuninga ngawo, otu ulike kutya ‘okwa pititha komeho uuwanawa wooyakwawo, haamboka ashike we mwene.’ — Aafilippi 2:4.

Shuna koshileshwa 56 oshitsa 2

 7. Oongeshefa niinima yopaveta

Otatu vulu okuyanda oontamanana pokati ketu nAakriste ooyakwetu, ngele otwa kala hatu nyola pombapila omauvathano gopangeshefa ngoka tatu ningi nayo. (Jeremia 32:9-12) Nonando ongawo, otashi vulika pu holoke okwaauvathana, omolwiimaliwa nenge iinima yilwe. Ngele opwa holoka oontamanana, nadhi kandulwe po nziya nomomukalo gwombili, mu li po one amuke.

Oshike tatu vulu okuninga po, uuna gumwe a lundile mukwawo nenge e mu kengelele? (Lesha Mateus 18:15-17.) Jesus okwe tu lombwela iinima itatu mbyoka tu na okuninga:

1. Kambadhala okukandula po omukundu ngoka gu li po, mu li one amuke. — Tala ovelise 15.

2. Ngele omwa hulile muunyengwi, otamu vulu okwiithana po gumwe nenge yaali megongalo ye mu kwathele. — Tala ovelise 16.

3. Ngele inashi za, uupyakadhi wu lombweleni aakuluntugongalo oyo ya ungaunge nawo. — Tala ovelise 17.

Ngele Aakriste oyi iyadha itaaya tsu ya thithe, inaya falathana kompangu, oshoka otashi ka shekitha Jehova nosho wo egongalo. (1 Aakorinto 6:1-8) Poompito dhimwe, otashi vulika Omukriste a pumbwa okutula mo oshipotha shopampangu. Omiinima yini mbela? Omiinima ngaashi okuteya ondjokana, ezimino lyopaveta lyokukala nokanona, okukwatela osapota, okumona iimaliwa komahangano gomakwashilipaleki, okupewa omukanda tagu ulike kutya ongeshefa oya mbangolota nosho wo oombapila dhomatestamendi dhaashoka a hala shi ningwe, uuna a si. Ngele Omukriste ota kongo ekwatho lyopaveta miinima yoludhi ndono, opo a pongolole po uupyakadhi momukalo gwombili, ke li ompinge nomayele gOmbiimbeli.

Ngele omuyonena ngoka gwa longwa ogwa kwata miiti, ngaashi ekwatonkonga, okuhepeka okanona, okweehameka kolutu, uufuthi nenge okudhipaga, Omukriste ngoka ta lopota oshinima shoka kopolisi, ke li ompinge nomayele gOmbiimbeli.

Shuna koshileshwa 56 oshitsa 3