1.  Jatun Babilonia

2.  ¿Imaymi Mesiasca licalimunan cala?

3.  Imacunactam doctorcunaca ayveces yawarnïquiwan lulanman

4.  Laquinacuyca

5.  Fiestacuna ñatac costumbrincuna

6.  Palcacü ishyaycuna

7.  Negociocuna lulay ñatac quejanacuy

 1. Jatun Babilonia

¿Imapïmi ninchic “Jatun Babiloniaca” llapan pantaśha religiuncunaca caśhanta? (Apocalipsis 17:5). Chaypimi yaćhaycuśhun.

• Enterun allpaćhumi cayan. Bibliami niyan, “Jatun Babiloniaca” walminü täcuyan ‘llapa nunacunaćhu, nasyuncunaćhu’, ñatac ‘walmica cay pachäćhu mandacücunäta munaśhanta lulayächin’ (Apocalipsis 17:15, 18).

• Manam gobiernäcunachu nï negocio lulacunachu. Bibliaca nishannü, “Jatun Babiloniaca” chincacuptin ‘pachäćhu mandacücunaca’ ñatac “nigusyanticunaca”, jinallam cawsapäcun’a (Apocalipsis 18:9, 15).

• Diospa śhutintam pin’ayman julun. Bibliaćhu nin, “Jatun Babilonia” ‘chuchumeca walminü’ caśhanta. Chaymi nin illaylaycu ñatac imalaycupis gobiernucunata yanapayalcan (Apocalipsis 17:1, 2). Yan’almi Diospi yaćhachin, ñatacmi achca nunacuna wañuśhampi juchayü (Apocalipsis 18:23, 24).

Cutiy 13 yaćhachicuycäta, 6 puntuman

 2. ¿Imaymi Mesiasca licalimunan cala?

Bibliaca nilañam, Mesiasca licalimunanpä 69 semanacunam pasanan cala (liguicuy Daniel 9:25).

• ¿Imaymi allaycula 69 semanacunaca? 455 manalapis Jesucristo captin. Chay wataćhumi Nehemías gobernadorca ćhala Jerusalén malcäta ‘śhalcachinanpä’ (Daniel 9:25; Nehemías 2:1, 5-8).

• ¿Ayca tiempum cala 69 semanacunaca? Ayveces Bibliaćhu niyan juc muyuncätam juc wata nin (Números 14:34; Ezequiel 4:6). Chaymi, juc semanaca 7 watacunam cala. Chayurá 69 semanacunaca 483 watacunam (69 x 7).

• ¿Imaymi camacala 69 semanacunaca? 455 watapi 483 watacama cuentaptinchic, ćhaśhunmi Jesuspa tiempunman 29 wataman. a Chay wataćhumi Jesús bautisacula ñatac Mesiasman muyula (Lucas 3:1, 2, 21, 22).

Cutiy 15 yaćhachicuycäta, 5 puntuman

 3. Imacunactam doctorcunaca ayveces yawarnïquiwan lulanman

Diospa siervuncuna manam ćhulachicunchicchu yawarta, manatacmi juccunamanpis unchicchu, manam awninanchicchu yawarninchicta julumananchicta chaypi’a ćhulamananchicpä operamaptinchic. (Deuteronomio 15:23).

Cristianucunaca yawarninchicta analisista lulachicuchwanmi, hemodiálisis, hemodilución o recuperan yawarcäta juc maquinawan. Cada cristianum decidicunanchic imacta lulananchicpä yawarninchicta operachicuptinchic o jampichicuptinchic. Manam llapan doctorcunaca igualllachu jampicun, chaymi manala operachicul o jampichicul allinta yaćhananchic yawarninchicta imacta lulananta. Tapucuy cayta:

• Yawarninchicta jululuptin ratullapämi can’a juc lädućhu, yapa cuerpunchicman cuticachimuptin, ¿jawcachun conciencianchic canman? (Deuteronomio 12:23, 24).

• Imacta jampimananpäpis doctorca yawarta julamaptin chayta cuticachimaptin Bibliaćhu yawarcäpi yaćhaśhawan, ¿jawcachućh caman?

Cutiy 39 yaćhachicuycäta, 3 puntuman

 4. Laquinacuyca

Bibliaca nishannü, manam allinchu casuducunaca laquinaculcanan, mayanpis laquinaculul manam jucwan casaracunmanchu (1 Corintios 7:10, 11). Pero waquin hermanucuna decidipäcunmi laquinacuyta, ¿imacuna captinmi laquinaculcan?

• Familianta mana mantenita munaptin: Waquin esposucuna manam illayta uyta munanchu familiancunacta nï micunanpä, nï mudananpä (1 Timoteo 5:8).

• Esposuca o walmica alli ma’äśha captin: Laquinacunman allicta ma’alcul wañuchinanpïmi (Gálatas 5:19-21).

• Jehovata servinanta pasaypi mana munaptin: Esposuca o walmica laquinacunman allicta contraptin Jehovata servinanta ñatac sasam canman Jehovata cäsucunanpä (Hechos 5:29).

Cutiy 42 yaćhachicuycäta, 3 puntuman

  5. Fiestacuna ñatac costumbrincuna

Cristianucunaca manam lulapäcunchu Jehovapa ćhiniśhan fiestacunacta. Chayurá, ¿ima nichwanmi chay fiesta muyun mayanpis felicitaycamaptinchic o regalucta uycamaptinchic? Chaypä quiquinchicmi decidinanchic Bibliapi yaćhaśhanchicmannü lulananchicpä.

• Ima nichwanmi mayanpis feliz navidad o feliz año nuevo nimaptinchic. “Gracias” niśhun jinallam. Yaćhaycächi imapï chay fiestata mana lulaśhanchicta.

• Mana testigo esposuyqui o walmiqui niśhuptiqui, linayquipä juc fiestaman micapäcunayquipä familianwan. ¿Ima ninquimanmi? ¿Linquimanchun o manachun? Linayquipä decidilul’a ninquim, manam lulaśhachu Jehovapa mana munaśhanta.

• Patronnïqui fiesta muyuncunapi masta pagayta munaśhuptiqui. ¿Ćhasquinquimanchun? Chaypä pinsanayquim, ¿imapïmi uyaśhunqui chay illaycäta? Ichapis patronnïqui uyaśhunqui trabajuyquipï agradecicul, pero manaćh fiesta caśhanpïchu.

• Fiesta muyuncunaćhu mayanpis regalucta uycuśhuptiqui. Ichaćh niśhunquiman: “Yaćhami mana fiestacta lulaśhayquita pero cayta uycuśhayqui” niśhuptiqui. Allintam pinsanayqui, ¿pruebacta ćhulayta munalchućh chayta niśhunquiman? ¿Pay participanmi fiestacunaman ninanpächućh chayta lulayanman? Chaycunacta tapuculmi, allinta decidinqui ćhasquinayquipä o mana, concienciayqui jawca cananpä ñatac Jehovata cushichinayquipä (Hechos 23:1).

Cutiy 44 yaćhachicuycäta, 1 puntuman

 6. Palcacü ishyaycuna

Nunacunata cuyalmi alli-allicta cuidacunchic mana ishyayta palcachinanchicpä. Ishyaśhanchicta yaćhalul o manala yaćhalpis manam juccunawan cusca cäśhunchu. Cayta lulanchic Bibliapa mandaśhanta cäsuculmi: ‘Quiquiquitanüy nuna-masiquita cuyaycuy’ (Romanos 13: 8-10).

Mayanpis palcacü ishyaywan cayal manam pictapis muchananchu, abrazananchu nï maquintapis chalaycunanchu. Ishyaśha cayaptinchic mayanpis mana wasinman invitamaptinchic manam senticunanchicchu. Manala bautizaculpis, palcacü ishyaywan cayal punta-lï-yaśhacunamanmi willanan chay ishyayninpi, chaymi ishyaynin mana mayanmanpis palcan’achu. Mayanpis palcacü ishyaywan cayaśhanta mana yaćhal analisistam yawarninta lulachicunman, manala mayantapis lisil casaracunanpä. Caycunacta lulalmi, ‘mana licaśhunchu quiquillanchicpä allinninchicta sinu’a juccunäpactapis licaśhunmi’ (Filipenses 2:4).

Cutiy 56 yaćhachicuycäta, 2 puntuman

 7. Negociocuna lulay ñatac quejanacuy

Mana problema cananpä illayta prestanacul hermanuwanpis o juccunawanpis papelćhumi escribinanchic acuerdo caśhanchicta (Jeremías 32:9-12). Masqui chayta lulanäcululpis hermano pulapis ćhaluchwanmi problemaman. Chaynü captinpis callpanchacuśhunmi quiquinchicpula jawcalla mana piñacuyal allichanapä.

Pero ¿imanuypam allichachwan mayanpis engañamaptinchic o mayanpis tumpamaptinchic? (Liguicuy Mateo 18:15-17). Jesús nila caycunacta lulananchicpämi.

1. Puntacta quiquinpulam limanan allichapäcunanpä (liguicuy 15 versiculuta).

2. Mana allichayta atipal’a, yanapayninta mañacuy juc hermanucta o ishcay hermanucta (liguicuy 16 versiculuta).

3. Caycunacta lulalpis mana allichal’a, chaymi ichá limanayqui punta-lï-yaśhacunawan (liguicuy 17 versiculuta).

Manam allinchu canman hermanupula quejanacul juezcaman puśhanacuy, caywan’a Diospa śhutintam pin’ayman jululunman ñatac malcantapis (1 Corintios 6:1-8). Pero caycunapi juezcanmanmi linquiman: divorciocunapä, taytanwan o mamanwan chulin quedananpä, mantencionta pasananpä, segurupi illayta ćhasquinapä, fracasuman yayculul o testamentucta lulacunapä. Caycunacta allichachwan hermanunchiccunawan juezcäćhumi, caycunacta lulaśhanchic manam Diospa-yaćhachicuyninwan contradicinchu.

Juc hermano denunciacta ćhulaptin autoridäcunaman mayanpis violaśha captin, ma’aśha captin, suwaśha captin, wañuchiśha captin ñatac urucuna abusaśha captin, manam Diospa-yaćhachicuyninwan contradicinchu.

Cutiy 56 yaćhachicuycäta, 3 puntuman