1.  ¿Neeski Kʼéri Babilonia?

2.  ¿Káni xarharapirini Mesíasi?

3.  Prosedimientuecha nani enga iurhiri úrakuarhejka

4.  Jurajperakueri ambe

5.  Kʼuínchikuecha

6.  Pʼamenchakuecha engaksï kéritpejka

7.  Negosiuecheri ambe ka engaksï uétarhiaka kʼuiripuecheri leicha

 1. ¿Neeski Kʼéri Babilonia?

¿Andichisï uandajki eska “K’éri Babilonia” relijioni no jurhimbitichani arhikuekaasïnga? (Jaŋaskuecha 17:5). Ju je exeni tanimu ambe.

• Iámu parhakpinirhu jarhasti ka no sési ambe úxati. Uandanhasïndi eska ima uaxakatixaka ‘uánikua kʼuiripuecharhu ka nasionicharhu’ ka eska “juramukua jatsi[s]ka para iámindu reichani jingoni engaksï parhakpinirhu jaka” (Jaŋaskuecha 17:15, 18).

• No uaati jindeeni kʼéri juramuti ma politikeri ni kʼérati negosiuecha. Eska na uandajka Biblia, “parhakpini anapu reicha” ka ‘íntspikuarhiricha’ tsípitiksï jauati enga i kʼamajkunhaaka (Jaŋaskuecha 18:9, 15).

• No sési pakatasïndi Tata Diosïni. Arhisïndiksï “ísku jándi” jimboka juramuticha jingoni úkuarhisïnga paraksï sentabu íntskuni o máteru ambe (Jaŋaskuecha 17:1, 2). Interu parhakpinirhu anapu kʼuiripuechani támisï jánhastaasïndi ka úsïndi eska uánikua kʼuiripu uarhiaka (Jaŋaskuecha 18:23, 24).

K‘uanhatsentani jorhenguarhikuarhu 13, puntu 6

 2. ¿Káni xarharapirini Mesíasi?

Biblia uandarixaptia eska 69 semanecha nitamapiringa ante de janoni Mesíasi (arhinta je Daniel 9:25).

• ¿Kániksï ueenaski 69 semanecha? Uéxurhini 455 jimbo ante de Jesúsi. Inde uéxurhini jimbo, juramuti Neemiasi niáraspti Jerusaléni para ‘sési peentani ka tarhatantani’ iretani (Daniel 9:25; Nehemías 2:1, 5-8).

• ¿Na xánksï durarispi 69 semanecha? Máru profesiecharhu engaksï Bibliarhu jaka, ma jurhiatikua, ma uéxurhinksï arhikuekasïndi (Números 14:34; Ezequiel 4:6). Ísï jimbo, ma semana arhikuekasïndi 7 uéxurhini. Jiájkani, 69 semanecha enga i profesia uandajka niárasïndi 483 uéxurhinicheni (69 pori 7).

• ¿Kániksï kʼamakurhiski 69 semanecha? Engachi kuenta pʼikuntaska 483 uéxurhini desde 455 uéxurhini jimbo ante de Jesúsi, niárasïngachi uéxurhini 29 jimbo despuesi de Jesúsi. a Meru i uéxurhini itsï atakuarhisti Jesúsi ka niárasti Mesíasiini (Lukasʌ 3:1, 2, 21, 22).

K‘uanhatsentani jorhenguarhikuarhu 15, puntu 5

 3. Prosedimientuecha nani enga iurhiri úrakuarhejka

Jarhastiksï prosedimientuecha enga ima mismu kʼuiripueri iurhiri úrakuarhejka enga pʼamenchani jarhajka, joperuksï kristianuecha no iámindu jiókuarhiasïndi. Pori ejemplu, nóchi íntspisïnga iurhiri, nijtuchi jurajkujki eska juchaari iurhiri patsanhaaka para tátsekua úrakuarheni engachi operarinhapiringa (Deuteronomio 15:23).

Joperuchi úpiringa jiókuarhini máteru ambe, komu iurhiriri analisichani, hemodiálisis, hemodilución o engaksï mákina ma úrajka para tántani iurhirini o circulación extracorpórea (o bomba de derivación cardiopulmonar). Mándani kristianu jatsisti para erakukuarhini néna enga úrakuarheaka imeeri iurhiri enga operarinhaaka, analisisi ma úminhani o enga tratamientu ma intsïnhani jauaka. Jamberi mándani doktori ménderueni úrauati ini tratamientuechani. Ísï jimbo, kristianu ma jatsisti para sési míteni néna úrakuarhea imeeri iurhiri ante deksï operarini, analisisi ma úkuni o enga tratamientu ma intsïnhaaka. Kurhamarhikuarhi je arhini ambe:

• Enga ma parti juchiiti iurhiri uérapiringa juchiiti kuerpurhu ka engaksï anhaxustapiringa ma ratu, ¿konsiensiarini jurajkupirini parani ísï exeni eska inde iurhiri útasï juchiiti kuerpurhu anapueska ka eska no jatsiska para ‘echerirhu tsïtanhani’? (Deuteronomio 12:23, 24).

• Engajtsïni prosedimientu ma jimbo pʼitapiringa iurhiri ka mójtakunksï sáni ka ménderujtsïni jatsirantani oksï úrani komu tratamientu ma juchiiti kuerpurhu, ¿no sési pʼikuastapirini juchiiti konsiensiani enga Biblia jimbo jorhendakata jaka o jiókuarhipirini?

K‘uanhatsentani jorhenguarhikuarhu 39, puntu 3

 4. Jurajperakueri ambe

Biblia uandasïndi eskaksï temungurhiricha no jámaaka jurhajperani ka engaksï jurajperaaka eskaksï no uaaka tembuchantani (1 Korintu 7:10, 11). Joperuksï máru kristianuecha, ménisï eratsesïndi jurajperani máru ambe jimbo.

• No uékani mantenerini familiani: Enga acheeti no uékajka kéndani imeeri familiani ni sikiera imani ambe enga sánderu uétarhinchajka (1 Timoteo 5:8).

• Kánikua no sési kánhani: Engaksï nemani xáni no sési kámaaka engaksï jimbo úpiringa pʼamenchakua ma úkuni o asta sáno uándikuni (Galasia 5:19-21).

• Enga jimbo úpiringa tsïtani imeeri pájperakua Tata Diosï Jeobani jingoni: Kristianu no úsïndi marhuakuni Tata Diosïni, jimboka témba o uámba meru no jurajkusïnga (Ukuecha 5:29).

K‘uanhatsentani jorhenguarhikuarhu 42, puntu 3

  5. Kʼuínchikuecha

Kristianuechaksï no nirasïndi kʼuínchikuecharhu enga Tata Diosï Jeoba no jaiapanheantajka. Mándani kristianu jatsisti para kurhajchani imeeri konsiensiani enga Biblia jimbo jorhendakata jaka para míteni ambe úni engaksï kʼuiripuecha uántauaka kʼuínchikuechani. Exea je arini ejempluechani.

• Nemaksïni arhisïndi eskajtsï sési nitamakuarhiaka kʼuínchikua ma jimbo. Jamberijtsï nomasi uaaka arhini “diosmaiamu”. Enga kʼuiripu uékapiringa sánderu ambe míteni, uaakajtsï aianguni andijtsïsï no úntajki indeni kʼuínchikuani.

• Engaksïni chaari acheeti o uarhiiti enga no Jeobaeri testigueka arhiaka eskajtsï niuaka tʼireni familiaricha máru jingoni ima jurhiatikua engaksï kʼuínchikua ma úntaaka. Engaksïni chaari konsiensia no no sési pʼikuastaaka parajtsï nirani, uaakajtsï tʼuini arhinia, eskajtsï chá no uaaka imani ambe engaksï relijioni no jurhimbiticha újka.

• Engaksïni chaari patroni intsïkuarhiaka sentabu oksïni sánderu uékani maiamuni kʼuínchikua ma jimbo. ¿Nóchi jiókuarhipirini? Uétarhipirindi exeni máru ambe. ¿Íntskuxakiksïni sentabu indeni kʼuínchikua jimbo? ¿O jimboka uékasïnga xarhatani eska jukaparharasïnga chaari ánchikuarhitani?

• Nemaksïni intsïkuarhisïndi ambe ma kʼuínchikua ma jimbo. Jamberiksïni kʼuiripu arhiati: “Míteska eskari no úntasïnga ini kʼuínchikuani, perukini uékasïni intsïkuarhini ambe ma”. Jamberi jimboka ambakiti kʼuiripu máeska. Joperu, ¿jindee jimboka uékaxaka tsʼéjkuni juchaari jakajkuani o jimboka uékaxaka eskachi indeni ambe uaaka? Engajtsï na sési eratsentaakia, chájtsï exeaka sintsï jiókuarhia o nómbe. Ambe engachi erakuaka úni, uékasïngachi eska inde ambe no no sési pʼikuastaaka juchaari konsiensiani ka ístu eskachi kurhajchaaka Tata Diosï Jeobani (Ukuecha 23:1).

K‘uanhatsentani jorhenguarhikuarhu 44, puntu 1

 6. Pʼamenchakuecha engaksï kéritpejka

Jimbokachi xénchaasïnga kʼuiripuechani, jingontkuchi jámasïnga parachi no nemani kéritani pʼamenchakua ma. Ísïchi úsïnga, engachi mítejka eskachi pʼamenchakua ma kámaxaka enga kéritpejka ka ístu engachi eratsepiringa eskachi jamberi kámaxaka i jásï pʼamenchakua ma. Ka ísïchi úsïnga, jimbokachi uékasïnga kurhajchani arini juramukuani enga Bibliarhu jaka: “Uékaakari máteruni eska tʼujkumindu na uékakuarhijka” (Roma 13:8-10).

¿Nénachi uaa ísï úni eska i juramukua na uandajka? Ima kʼuiripu enga pʼamenchakua ma kámani jauaka no jatsipirindi para arini ambe úni, komu putinharhikuni nemani, kamajchakuni o jupijkuni para saludarini. Ka no jatsipirindi para ikiani engaksï no pʼímarhipiringa imeeri kʼumanchikuarhu para ima kuájchakuni imeeri familiani. Antede itsï atakuarhini, jatsipirindi para aianguni orhejtsïkutini enga orhekupaajka orhejtsïkutichani eska pʼamenchakua ma kámaxaka enga kéritpejka ka ísï úni no nemani kéritani enga itsï atakuarhini jauaka. Ka enga kʼuiripu ma ménisï niárapka sáno pʼamenchakua ma pʼirani enga kéritpejka, jatsisti para estudiu ma úkuarhini iurhiriri enga uékaaka nobiu o nobia jatsini. Engachi í ambe úska, xarhatanchi jauaka eskachi jukaparharasïnga máteruechani ka eskachi no juchajku pendienti pákuarhisïnga, “sino ístu pendienti páni para máteruecha” (Filipusʌ 2:4).

K‘uanhatsentani jorhenguarhikuarhu 56, puntu 2

 7. Negosiuecheri ambe ka engaksï uétarhiaka kʼuiripuecheri leicha

Nóchi xáni problemechani jatsiasïnga engachi újka sïranda ma engachi tratu ma uaaka nema jingoni enga sentabu úrakuarheaka, asta jiáni engachi kristianu ma jingoni uaaka tratu ma (Jeremías 32:9-12). Nájkirukachi ini ambe uaaka, kristianuechaksï úpirindi arhirperata ambe jatsini sentabu jimbo o máteru ambe jimbo. Enga ísï úkuarhipiringa, jatsipirindiksï paraksï sóntku, iatsitakuarhu ka tsimarhantkuksï sési peentani.

Peru, ¿nénachi jatsipirini para sési peuantani kʼérati uandanhiatechani, komu fraudi ma o engaksï no sési ambe uandaaka juchaari ambe parajtsïni no sési pakatani? (Arhinta je Mateu 18:15-17). Jesúsi uandaspti eskachi jatsiska para tanimu ambe úni:

1. Imeecha engaksï jatsiaka problema ma, jatsistiksï para jánguarhintani sési peentani (exe je bersikulu 15).

2. Engaksï no uaaka sési peentani, uaatiksï ma o tsimani kúnguarhikuarhu anapu erachichani arhiani paraksï pámbetani engaksï ima uandontskuarheaka (exe je bersikulu 16).

3. Engaksï uaakia ini ambe ka útasïksï no úni sési peentani problemani, jiájkani, jatsipirindiksï para aianguani orhejtsïkutichani (exe je bersikulu 17).

Jatsipiringachi para jánguarhintani parachi no paani juchaari erachichani juramuticha jingoni, jimboka i ambe no sési pakatapiringa Tata Diosï Jeobani ka kúnguarhikuani (1 Korintu 6:1-8). Joperu jarhasti máru ambe engachi jimbo jatsipiringa para juramuticha jingoni nirani, pori ejemplu: para diborsiarikuarhini, para exeni né jingonksï pakaraa sapiicha, para exeni na xáni sentabu intsïnhaa para tʼirekua, para segurueri ambe exeni, para uandantani eska no uaaka maianhpeni enga kántspeni jaka o para testamentueri ambe exeni. Enga kristianu ma jánguarhintaaka iatsitakuarhu sési peentani ini jásï ambe juramuticha jingoni, ísï úni jauati eska Biblia na uandajka.

Májkueni, enga kristianu ma niuaka uandantani juramuticha jingoni enga nema no sési ambe uaaka —komu engaksï nemani biolapiringa, ísku ambe ma úkuni sapini ma, engaksï nemani uinhamu atapiringa, kʼéri ambeksï sïpakuni oksï nemani uandikuni— i ambe no jindeepirindi eska ima no kasu úxaka ambe enga Biblia uandajka.

K‘uanhatsentani jorhenguarhikuarhu 56, puntu 3