Endnotes
1. How We Fit Know Babylon the Great?
How we fit know say “Babylon the Great” stand for all lie-lie religion? (Revelation 17:5) Make we see some reasons:
-
E dey everywhere for the whole world. Bible talk say Babylon the Great de sitdown ontop “crowds and nations.” And e get “kingdom over the kings of the earth.”—Revelation 17:15, 18.
-
E no fit be government or big business for the world. “The kings of the earth” and “the plenty business people” survive when them de destroy Babylon the Great.—Revelation 18:9, 15.
-
E de make people think bad about God. Bible call-am prostitute because e de do things with government so that e go get money and favor from them. (Revelation 17:1, 2) E de deceive people from all countries. And e don kill plenty people.—Revelation 18:23, 24.
2. Which Time the Messiah Show for This Earth?
Bible don talk before say e go reach 69 weeks before the Messiah come.—Read Daniel 9:25.
-
Which time the 69 weeks start? Na for the year 455 B.C.E. That time, Governor Nehemiah “go repair Jerusalem and build-am again.”—Daniel 9:25; Nehemiah 2:1, 5-8.
-
How long the 69 weeks last? For some place for Bible, one day stand for one year. (Numbers 14:34; Ezekiel 4:6) So, each week, stand for seven years. This 69 weeks wey Bible talk go be 483 years (69 weeks x 7 days).
-
Which time the 69 weeks end? If we start de count 483 years from 455 B.C.E., we go end for the year 29 C.E. a Na that same year Jesus baptize and come be Messiah!—Luke 3:1, 2, 21, 22.
3. Treatments Wey Them De Use Blood
Some treatments dey wey them de use the blood of the person wey de sick. Christians no de accept some of this treatments. For example, some people de give their blood make they use for other people or them de give their blood make they keep-am and use for their own operation later. But Christians no de do like that.—Deuteronomy 15:23.
But some other things dey wey them de use blood do wey Christians fit decide to accept. Things like blood test, hemodialysis, hemodilution, or to use cell-salvage machine or heart-lung bypass machine. Na each Christian go decide how they go use e own blood when them de do operation, do test, or treatment wey them de do for that particular time. Each doctor fit do-am for different way. So before each Christian go accept to do any operation, test, or treatment, e go need to know exactly how the doctor go use e blood. Make we see some questions:
-
What if they connect something for my body and my blood de flow outside of my body for sometime or even stop to move for some time? My conscience go make me see this blood as still part of my body, or my conscience go make me feel say they suppose pour the blood “for ground”?—Deuteronomy 12:23, 24.
-
What if them de do operation and they take some of my blood, change some things inside the blood, and put-am back for my body? From wetin I don learn from Bible, my conscience go trouble me, or allow me make I take this kind treatment?
4. Wetin Fit Make Husband and Wife Separate?
Bible talk say make husband and wife no separate and e make-am clear say if they separate, they no get right to marry another person. (1 Corinthians 7:10, 11) But some situations dey wey don make some Christians decide to separate.
-
When husband no gree provide: When husband decide say e no go provide for e family, sotey e family no get the important things wey they need.—1 Timothy 5:8.
-
If one of them de treat the other one for very bad way: If husband de treat e wife or wife de treat e husband for bad way, sotey the life of the wife or husband dey for danger.—Galatians 5:19-21.
-
If the relationship wey the wife or husband get with Jehovah dey for big danger: If the husband or wife de make-am difficult for one of them to serve Jehovah.—Acts 5:29.
5. Celebrations Wey People De Do
Christians no de join do celebrations wey no de make Jehovah happy. But each Christian go use e conscience wey e don train with Bible to decide wetin e go do when people de do celebration. Make we see some examples.
-
Person de wish you happy celebration wey them de do. You fit just say “Thank you.” And if the person want know more, you fit explain why you no de do the celebration.
-
Your husband or wife wey no be Jehovah Witness invite you make you come join chop with e family people when them de do one celebration. If your conscience gree make you go, you fit explain for your husband or wife before the time say, if them go do anything wey Bible no support, you no go join do-am.
-
Your master for work dash you something for the period wey them de do celebration. You go reject the gift? Sometimes you fit no reject-am. Your master de see the gift as part of the celebration, or e just de give you something to show say e like the good work wey you de do?
-
Person give you gift for the period wey them de do celebration. The person fit talk say: “I know say you no de do this celebration, but I just want give you this gift.” E fit be say the person just dey kind. Or you get any reason to think say the person de try test your faith, or e want make you join for the celebration? After you don check this one, na you go decide whether you go take the gift or you no go take-am. For all our decisions, make we dey sure say wetin we choose na the one wey go give us clean conscience and make us dey faithful to Jehovah.—Acts 23:1.
6. Sickness Wey Fit Spread
Because we love people, we want dey careful make we no share sickness wey fit spread to other people. Whether we get sickness wey fit spread or if we think say we don catch sickness wey fit spread, e go good make we dey careful. We de do like this because Bible talk say: “You must love your neighbor as you love yourself.”—Romans 13:8-10.
How person wey get this kind sickness fit show this kind love? Make person wey get sickness wey fit spread to other people, no try to hug or kiss other people. Make e no vex if person no invite-am come e house because e want protect e family. And before e baptize, make e tell the coordinator of the body of elders so that they go arrange how e go baptize to protect other people wey de baptize. If person de suspect say e don get sickness wey fit spread, make the person go do blood test before e start marriage friendship with another person. When you do this one, you show say you care about other people just as Bible talk say: “As wuna no just de look for wetin go benefit wunaself but wetin go benefit other people.”—Philippians 2:4.
7. Business and Matter Wey Concern Law
We no go get problem with people if we write agreement when we de do business even if na our Christian brother or sister. (Jeremiah 32:9-12) Even with that one, sometimes Christian fit get small-small problem with other Christians about money or other matter. Make they settle the matter quick-quick, make peace, and make they no tell other people.
But how we fit settle serious matter like when person cheat us or talk wicked lie about us? (Read Matthew 18:15-17.) Jesus give us three steps wey we fit follow:
-
Make wuna try settle the matter among wunaself.—Check verse 15.
-
If that one no work, take one or two mature person for congregation to go with you.—Check verse 16.
-
If the matter no still settle, na that time you go talk to the elders for congregation.—Check verse 17.
For most of the situation, we no suppose carry our Christian brother go court because that one go give Jehovah and the congregation bad name. (1 Corinthians 6:1-8) But for some situations, we go need to settle some matter for court, like: divorce matter, who pikin go stay with, money wey court talk say make husband de pay give wife or make wife de pay give husband if they divorce or separate, money wey insurance company go pay, money wey person borrow and no fit pay back, or how they go share property after person die. Any Christian wey use court to settle this kind matter and still do e best to make peace, e no go against the things wey Bible talk.
If na serious matter like to rape person, to treat pikin for bad way, to beat person, to thief for big way, or to kill person, Christian wey report this kind matter to government no go against the things wey Bible talk.
a From 455 B.C.E. to 1 B.C.E. na 454 years. From 1 B.C.E. to 1 C.E. na one year (zero year no dey). And from 1 C.E. to 29 C.E. na 28 years. When we add all of them together, e go give us 483 years.
