Kọ Mẹ Ruẹrẹ Oma Kpahe No?
Kọ Mẹ Ruẹrẹ Oma Kpahe No re Me Kuomagbe Ukoko na Ta Usi Uwoma?
O sae jọnọ whọ ruẹrẹ oma kpahe no re whọ jọ owhowho-uvie nọ ọ re họ-ame he otẹrọnọ . . .
Who bi wuhrẹ Ebaibol na kẹse kẹse, whọ rẹ lẹ, je kpohọ iwuhrẹ ukoko.
Eware nọ who bi wuhrẹ na e were owhẹ, whọ rọwo e rai, whọ tẹ jẹ gwọlọ vuẹ amọfa kpahe ae.
Who you Jihova, yọ ahwo nọ a you Jihova ọvo họ egbẹnyusu ekpekpe ra.
Who siomano isuẹsu akpọ na hayo egagọ erue kpobi no.
Who bi koko izi Jihova evaọ uzuazọ ra, whọ tẹ jẹ gwọlọ nọ whọ rẹ jọ omọvo Isẹri Jihova.
Who te roro nọ whọ ruẹrẹ oma kpahe no re who kuomagbe ukoko na ta usi uwoma, oniọvo nọ o bi wuhrẹ owhẹ Ebaibol na ọ sai ru re who lele ekpako na ta ẹme kpahe epanọ whọ sai ro muhọ.
Kọ Mẹ Ruẹrẹ Oma Kpahe Kẹ Ame-Ọhọ No?
O sae jọnọ whọ ruẹrẹ oma kpahe no re whọ họ-ame otẹrọnọ . . .
Whẹ yọ owhowho-uvie nọ ọ re họ-ame he.
Whọ be ta usi uwoma kẹse kẹse wọhọ epanọ ẹgba ra o te.
Who bi fiobọhọ kẹ “ọrigbo nọ a re fievahọ nọ o wo areghẹ na” je bi ru eware nọ ọ ta. —Matiu 24:45-47.
Whọ roma ra mudhe kẹ Jihova no evaọ olẹ, whọ tẹ jẹ gwọlọ nọ whọ rẹ gọe bẹdẹ bẹdẹ.
Who te roro nọ whọ ruẹrẹ oma kpahe no re whọ họ-ame, oniọvo nọ o bi wuhrẹ owhẹ Ebaibol na ọ sai ru re who lele ekpako na ta ẹme kpahe epanọ whọ sae rọ họ-ame.
