ယမၤန့ၢ်လံဧါ
ယဟးစံၣ်တဲၤတဲလီၤသကိးတၢ်ဃုာ်ဒီး တၢ်အိၣ်ဖှိၣ်ဖိတဖၣ်န့ၢ်လံဧါ
ဒ်သိး နကကဲထီၣ် ပှၤစံၣ်တဲၤတဲလီၤတၢ်ဖိလၢ တဒိးဘျၢဘၣ်ထံဒံးဘၣ်အဂီၢ် . . .
နကဘၣ် ဖးလံာ်စီဆှံ, ဃ့ထုကဖၣ် ဒီးထီၣ်တၢ်အိၣ်ဖှိၣ်ထီဘိ.
နကဘၣ် ပာ်လုၢ်ပာ်ပှ့ၤ ဒီးနာ် တၢ်လၢနမၤလိဘၣ်တဖၣ်. ဒီးနကဘၣ်သးအိၣ် တဲဘၣ်ပှၤဂၤလၢ တၢ်လၢနမၤလိဘၣ်တဖၣ်.
နကဘၣ် အဲၣ်ယဟိဝၤယွၤ ဒီးဃုထၢနသကိး လၢအအဲၣ်ယဟိဝၤယွၤ.
နကဘၣ် ထုးထီၣ်ကွံာ်နမံၤ လၢတၢ်ကရၢကရိ လၢအဘၣ်ဃးဒီး ထံဂ့ၢ်ကီၢ်ဂ့ၢ် ဒီးတၢ်ဘူၣ်တၢ်ဘါ လၢအကမၣ်တဖၣ်အပူၤ.
နကဘၣ် အိၣ်မူဒ် ယဟိဝၤယွၤ အတၢ်သိၣ်တၢ်သီ အိၣ်ဝဲအသိး ဒီးသးအိၣ်ကဲထီၣ် ယဟိဝၤပှၤအုၣ်အသးတဂၤ.
နမ့ၢ်ဆိကမိၣ်လၢ နတုၤထီၣ်ထီၣ်ဘးလၢ ကဟးစံၣ်တဲၤတဲလီၤသကိးတၢ်ဃုာ်ဒီး တၢ်အိၣ်ဖှိၣ်ဖိလံန့ၣ် ပှၤလၢအမၤလိ လံာ်စီဆှံဒီးနၤတဂၤ ကရဲၣ်ကျဲၤဝဲလၢ နကထံၣ်လိာ်သးဒီး တၢ်အိၣ်ဖှိၣ်သးပှၢ်တဖၣ်. ဒီးဒ်သိး နဟးစံၣ်တဲၤတဲလီၤသကိးတၢ်ဃုာ်ဒီး တၢ်အိၣ်ဖှိၣ်ဖိ ကန့ၢ်အဂီၢ် နကဘၣ်မၤဒ်လဲၣ်န့ၣ် အဝဲသ့ၣ် ကတဲသကိးတၢ်ဒီးနၤ.
ယဒိးဘျၢထံန့ၢ်လံဧါ
တချုးလၢ နဒိးဘျၢထံန့ၢ်ဒံးဘၣ်န့ၣ် . . .
နကဘၣ်ကဲ ပှၤစံၣ်တဲၤတဲလီၤတၢ်ဖိလၢ တဒိးဘျၢဘၣ်ထံဒံးဘၣ်.
နကဘၣ် ဂုာ်ကျဲးစၢးမၤ တၢ်စံၣ်တဲၤတဲလီၤတၢ်မၤ လၢအဂ့ၤကတၢၢ်.
နကဘၣ် ဆီၣ်ထွဲ “ကုၢ်လၢအတီ ဒီးအကူၣ်တၢ်သ့” ဒီးမၤထွဲ အတၢ်ဟံးစုနဲၣ်ကျဲ.—မးသဲ ၂၄:၄၅-၄၇.
လၢတၢ်ထုကဖၣ်အပူၤ နကဘၣ် ဟ့ၣ်လုၢ်ထီၣ်နသး လၢယဟိဝၤယွၤ အအိၣ် ဒီးတဲအီၤလၢ နအဲၣ်ဒိး ဘူၣ်ထီၣ်ဘါထီၣ်အီၤ လီၤထူလီၤယိာ်.
နမ့ၢ်ဆိကမိၣ်လၢ နတုၤထီၣ်ထီၣ်ဘးလၢ တၢ်ဒိးဘျၢထံလံန့ၣ် ပှၤလၢအမၤလိ လံာ်စီဆှံဒီးနၤတဂၤ ကရဲၣ်ကျဲၤဝဲလၢ နကထံၣ်လိာ်သးဒီး တၢ်အိၣ်ဖှိၣ်သးပှၢ်တဖၣ်. ဒီးဒ်သိး နဒိးဘျၢထံကန့ၢ်အဂီၢ် နကဘၣ်မၤဒ်လဲၣ်န့ၣ် အဝဲသ့ၣ် ကတဲသကိးတၢ်ဒီးနၤ.
