Bɔ nɛ o ma ná Baiblo mi ní kasemi nɛ ɔmɛ a he se ha
Kekleekle ɔ, moo hyɛ bɔ nɛ a to ní kasemi ɔ he blɔ nya ha a. Lɔ ɔ se ɔ, mo je VIDEO ɔ.
KEKLEEKLE FÃ
Ke o ma o he dlami kɛ ha ní kasemi ɔ eko fɛɛ eko ɔ, moo kane kekleekle fã a. Sane bimihi nɛ a kɛ ningma agboagbo ɔmɛ ngma a (A) kɛ ngmami ɔmɛ (B) maa oti ɔmɛ a nɔ mi. O maa na nɛ a kadi ngmami ɔmɛ ekomɛ kaa o “kane.”
FÃ ENYƆNE
Munyu nɛ ngɛ (D) Moo Kase Babauu blɔ he ɔ maa tsɔɔ mo níhi nɛ nyɛ maa kase kɛ tsa nɔ. Munyuyi nyafinyafi ɔmɛ (E) tsɔɔ nɔ́ nɛ nyɛ ma susu he. Nɔ nɛ kɛ mo ngɛ ní ɔ kasee ɔ ma ha nɛ nyɛɛ kane ngmami ɔmɛ. Lɔ ɔ se ɔ, o ma ha sane bimi ɔmɛ a heto, nɛ nyɛ maa hyɛ video ɔmɛ.
VIDEOHI kɛ MUNYUHI NƐ A FIAA NƐ A BUƆ TUE nɛ ngɛ ní kasemi nɛ ɔ mi ɔ maa ye bua mo konɛ o nu ní kasemi ɔ sisi saminya. Video ɔmɛ ekomɛ ji níhi nɛ ya nɔ nitsɛnitsɛ. Ekomɛ hu ji dramahi nɛ a pi níhi nɛ ya nɔ nitsɛnitsɛ, se a ji si fɔfɔɛhi nɛ nihi kɛ ma nyɛ maa kpe.
Mo susu foni ɔmɛ kɛ munyuhi nɛ ngɛ a sisi ɔ he (Ɛ), nɛ o hyɛ kaa kɛ o ma ha munyu nɛ ngɛ Ni Komɛ Deɔ Ke blɔ he ɔ heto ha kɛɛ (F).
NYAGBE FÃ
Nya Mwɔmi kɛ Mi Nylɔmi (G) blɔ he ɔ maa mwɔ ní kasemi ɔ nya. O maa ngma be nɛ o gbe jamɛ a ní kasemi ɔ nya a kɛ fɔ si. Nɔ́ Nɛ O Ma Tsu He Ní (H) blɔ he ɔ maa tsɔɔ mo nɔ́ ko nɛ e sa kaa o pee. Ní Kpahi Nɛ Maa Ye Bua Mo (I) blɔ he ɔ maa tsɔɔ mo womi kpahi nɛ o ma nyɛ maa kane loo videohi nɛ o ma nyɛ maa hyɛ.
Mi Ní
|
|
|
|
Bɔ nɛ o maa pee ha kɛ na ngmamihi nɛ a tsɛ se ɔmɛ
Womi nyafinyafihi 66 lɛ peeɔ Baiblo mluku ɔ tsuo. A gba mi enyɔ: Kekleekle fã a ji Hebri kɛ Aram Ngmami ɔmɛ (“Somi Momo ɔ”) nɛ fã enyɔne ɔ ji Hela Ngmami ɔ (“Somi He ɔ”).
Ke a tsɛ ngmami ko se ngɛ womi nɛ ɔ mi ɔ, ngmami nɛ a tsɛ se ɔ tsɔɔ Baiblo mi womi ɔ (A), lɔ ɔ se ɔ, e yi (B), kɛ kuku loo kukuhi (D).
Kaa nɔ hyɛmi nɔ́ ɔ, Yohane 17:3 ɔ tsɔɔ Yohane womi ɔ, yi 17, kuku 3.
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
