Isiyani nnolamuliyeenyu upanka wiira mphwanyere ifayita usomihiya winyu Ibiiblya?
Moone citthu cinhaleenyu wiitthuca, mwamaliha usoma ula mphanttyoola, moone IVIDIYU.
MPHANTTE WOOPACERA
Nsome khula iparaagarafu ni makoho oopintariyaayo (A). Ciicammo nsome ilivuru co mbiiblyani cantikhiye “nsome.” (B) Uhiya commo, ciicammo unaareera usoma ilivuru cikhwaawe co mbiiblyani cantikhiye mparaagarafuni ukhala wiira nnyo cinthoonyihera ipontu cuulupale.
MPHANTTE WO WARIYARI
Vathiwaya nipuro nantikhiye “Muncerere Wiitthuca Winyu” amphwanyannya moolumo anthikilela mwaha wotheene (C). Isuputiitulu (D) cinttonkaca ipontu cuulupale. Wamoca ni ule noosomihani Ibiiblya, nsome iveerusu co mbiiblyani, mwaakhule makoho ni moone ividiyu.
Khula mpantta uhaana ikaaxa ineera IVIDIYU inooluma citthu cikhwaawe co uyo mwahooyo. Ividiyu cikhwaawe cinooluma citthu ciirannyeele. Ividiyu cikiinannyo cinoonihera paasi citthu cineerannya khula mahuku.
Moopele mwaha ilatarato ni moolumo amphwanyannya vathi waya (E), ni muupuwele mananna owaakhula mphantte uneera “Atthu Akiina Aneera” (F).
MPHANTTE WOOMALELA
Khula mpantta ummalela nimiphantte cineera “Uthikilela” ni “Wuupuwela” (G). Mwantikhe nihuku nimalihileenyu usoma mpanttooyo. Nipuro nantikhiye “Itthu Yoohala Upanka” (H), inttonkaciya itthu nyuuva inlamuliyeenyu upanka. Vathiwaya nipuro nantikhiye “Mwapheelaka Ucuwela Citthu Cikiina” (I) cimphwanyannya myaha awula ividiyu, cinlamuliyeenyu usoma awula woona, mwatthunaka.
Citthu cinoopeliya mwaha
|
|
|
|
Iverisiikulu co mbiiblyani cimphwanyiya cani?
Ibiiblya irinaa ilivuru 66 cooyevaca. Iyo ikawanihiye miphantte miili: Cowantikhiya Cowaarya Niiluka Iheperewu ni Aramayiku (“Itestamentu yo Khalayi”) ni Cowantikhiya Ceekristau Niiluuka Ikereeku (“Itestamentu yo Naanaano”).
Nipuro inromoliyaaya ilivuru yo mbiiblyani, nimpaceriya ncina no ilivuru yo mbiiblyani (A). Yo waakulela inkhala ikapiitulu (B), woomalihera iverisiikulu awula iveerusu (C).
Wootakihera, Joau 17:3 maanaaya ilivuru ya Joau, ikapiitulu 17, iveerusu 3.
