N̄wed emi Mme Itie N̄wed Abasi Emi Ikpadade Idu Uwem ayanam esimem fi utom ndisọp n̄kụt mme itie Bible emi ẹdin̄wamde fi ọyọ mfịna fo. N̄wed emi oyonyụn̄ an̄wam fi ọsọp okụt mme itie Bible emi ekemede ndida nsọn̄ọ mbon en̄wen idem ye enye emi edin̄wamde mmọ ẹbiere se Jehovah amade. Se edinamde edi ndikụbọde ibuotikọ oro oyomde. Mme ibuotikọ kiet kiet ẹnyene mme mbụme ye n̄kpri ikpehe emi ẹtin̄de se idude ke itie Bible oro oyomde. (Se ekebe emi “ Nte Ekemede Ndida N̄wed Emi Nnam N̄kpọ.”) N̄wed emi ọdọn̄ọ mme itie Bible emi ẹdinamde ikụt ata nti item, onyụn̄ ọdọn̄ọ mme itie Bible emi ẹdidọn̄de nnyịn esịt. N̄ko, oyokụt mme itie Bible emi akpadade an̄wam owo okop inemesịt, onyụn̄ ọsọn̄ọ enye idem man enye ọyọ mfịna esie.

N̄wed emi isiakke kpukpru itie Bible oro ẹtịn̄de n̄kpọ ẹban̄a ibuotikọ kiet kiet. Edi enye eyenen̄ede an̄wam fi anam ndụn̄ọde. (N̄ke 2:1-6) Man se ẹtịn̄de ke mme ufan̄ikọ kiet kiet enen̄ede an̄wan̄a fi, se mme itien̄wed ufọt page mme ufan̄ikọ oro ke Bible Edikabade Eke Obufa Ererimbot. Emekeme n̄ko ndikot se idude ke ikpehe “Mme Itie N̄wed Abasi Oro Ẹnamde An̄wan̄a” ke N̄wed Ndụn̄ọde Mme Ntiense Jehovah mîdịghe okot Watch Tower Publication Index man enen̄ede ọdiọn̄ọ se ufan̄ikọ kiet kiet ọwọrọde. Kot mme n̄kpọ oro esop Abasi ẹsion̄ode ndondo emi man okụt m̀mê ẹfiak ẹnam mme itie Bible oro an̄wan̄a.

Nte osụk okotde n̄wed emi, oyokụt ke se Bible etịn̄de esịne ifiọk, ọsọp an̄wan̄a owo, se enye onyụn̄ etịn̄de ekeme ndin̄wam fi. Nte afo adade n̄wed emi anam n̄kpọ, eyedikụt ke “ikọ Abasi enyene uwem onyụn̄ enyene odudu.”​—Heb 4:12.