Ŋmalɛi Ni Waa Wɔ Ni Wɔhi Shi Akɛ Kristofoi lɛ baahã efee mlɛo kɛhã bo akɛ obaana Biblia mli ŋmalɛi kɛ saji ni baaye abua bo kɛtsu daa gbi shihilɛ mli naagbai ni okɛkpeɔ lɛ ahe nii. Kɛfata he lɛ, ebaawa bo ni ona Biblia mli saji tuuntu ni obaanyɛ okɛwo mɛi krokomɛi hewalɛ, ni agbɛnɛ hu okɛye obua amɛ ni amɛkpɛ yiŋ ni saa Yehowa hiɛ. Nɔ ni ehe baahia ni ofee nɔŋŋ ji, ni oya saneyitso ni otao lɛ nɔ. Sanebimɔi kɛ Biblia mli saji kukuji yɛ saneyitso fɛɛ saneyitso shishi ni baaye abua bo ni ona nɔ ni otaoɔ lɛ. (Kwɛmɔ akrabatsa ni ji “ Bɔ Ni Obaafee Ona Saji Ni Otaoɔ Lɛ Yɛ Wolo Nɛɛ Mli.”) Ebaawa bo ni ona ŋaawoi kpakpai, gbɛtsɔɔmɔi, kɛ saji ni shɛjeɔ mɔ mii yɛ Nyɔŋmɔ Wiemɔ lɛ mli oya. Agbɛnɛ hu, ebaahã oná jwetrii ni obaanyɛ ogba mɛi krokomɛi—no ji, obaaná Biblia mli ŋmalɛi ni okɛtswa amɛ oma shi, okɛwo amɛ hewalɛ, okɛye obua amɛ kɛtsu amɛnaagbai ahe nii, ni okɛwo amɛ ŋaa hu.

Kɛ́ okɔ saneyitso ko lɛ, jeee ŋmalɛi fɛɛ ni kɔɔ he lɛ obaana yɛ wolo nɛɛ mli. Shi afee wolo nɛɛ koni eye ebua bo ni ona ŋmalɛi titrii ni he hiaa lɛ, kɛkɛ lɛ no sɛɛ lɛ, obaanyɛ okɛ niiamlitaomɔ dɛŋdadei krokomɛi atsu nii kɛtao ehe saji krokomɛi. (Abɛ 2:​1-6) Kɛ́ ootao okase pii ofata he lɛ, okɛ ŋmalɛi krokomɛi ni kɔɔ ŋmalɛi ni okaneɔ lɛ he ní akɛ alfabɛtai ekadi lɛ, ni ji marginal references lɛ kɛ study notes ni yɔɔ Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ Blɔfo nɔ lɛ mli lɛ atsu nii. Kɛ́ ootao onu ŋmalɛ ko shishi jogbaŋŋ loo ona bɔ ni abaanyɛ akɛ nakai ŋmalɛ lɛ atsu nii ahã lɛ, kwɛmɔ Niiamlitaomɔ Wolo Kɛhã Yehowa Odasefoi loo Watch Tower Publications Index lɛ mli. Kɛ́ okɛ woji nɛɛ eko miitsu nii lɛ, kwɛmɔ woji ni atsɛ yisɛɛ yɛ mli lɛ ateŋ nɔ ni akala etsɛko kwraa lɛ, ejaakɛ nomɛi baahã ona shishinumɔ ni wɔhiɛ amrɔ nɛɛ yɛ nakai ŋmalɛ lɛ he.

Eba akɛ wolo nɛɛ, ni ji Ŋmalɛi Ni Waa Wɔ Ni Wɔhi Shi Akɛ Kristofoi lɛ baaye abua bo koni oná hiɛshikamɔ kɛ nilee ni yɔɔ Ŋmalɛ Krɔŋkrɔŋ lɛ mli lɛ, ni onu ŋmalɛi lɛ ashishi jogbaŋŋ. Be ni okɛ wolo nɛɛ tsuɔ nii lɛ, ebaahã nɔmimaa ni oyɔɔ akɛ “Nyɔŋmɔ wiemɔ lɛ hiɛ kã ni eyɛ hewalɛ” lɛ mli awa waa fe tsutsu.—Heb 4:12.