Owe lọ Wefọ lẹ He Nọ Gọalọ Nado Nọgbẹ̀ Di Klistiani na hẹn ẹn bọawuna we nado nọ mọ wefọ po otàn Biblu tọn lẹ po, he gán gọalọna we nado duto avùnnukundiọsọmẹnu he a na pehẹ lẹ ji. E nasọ gọalọna we nado nọ mọ wefọ Biblu tọn he sọgbe lẹ, ehe a na yí do na tuli mẹdevo lẹ bosọ gọalọna yé nado basi nudide lẹ he na gbògbéna Jehovah. Yì hogo he jlo we ji poun, bo gbadopọnna kanbiọ he to glọ na ẹn lẹ gọna zẹẹmẹ kleun kandai Biblu tọn he e bẹhẹn lẹ tọn. (Pọ́n apotin lọ “ Lehe A Gán Yí Owe Ehe Zan Do.”) A na mọ ayinamẹ yọ́n-na-yizan, anademẹ gọna homẹmiọnnamẹ he wá sọn Ohó Jiwheyẹwhe tọn mẹ susu yí. A nasọ mọ nudagbe he a na má hẹ mẹdevo lẹ—vlavo wefọ he na jlọ yé dote lẹ, he na gọalọna yé nado pehẹ nuhahun yetọn lẹ, gọna ayinamẹ po tulinamẹ po.

Owe ehe ma bẹ wefọ lẹpo hẹn do hogo dopodopo ji. Amọ́, e na gọalọna we taun nado basi dodinnanu yinukọn dogọ. (Hwh 2:1-6) Nado dindonanu dogọ, nọ yí alọdlẹndonu ṣẹnṣẹn mẹ tọn Biblu tọn lẹ, podọ etlẹ yin adà nupinplọn tọn Owe Wiwe lẹ—Lẹdogbedevomẹ Aihọn Yọyọ Tọn lẹ zan, eyin yé tin-to-aimẹ to ogbè he a sè de mẹ. Nọ yí Anademẹwe Dodinnanu Tọn Na Kunnudetọ Jehovah Tọn Lẹ kavi Index des publications des Témoins de Jéhovah zan nado gbadopọnna zẹẹmẹ wefọ de tọn kavi yọ́n-na-yizan etọn to gigọ́ mẹ. Basi dodinnanu to zinjẹgbonu agọe pete tọn lẹ mẹ nado hẹn ẹn diun dọ a tindo nukunnumọjẹnumẹ agọe tọn do nugbo Owe-wiwe tọn lẹ ji.

Ojlo mítọn wẹ yindọ Wefọ lẹ He Nọ Gọalọ Nado Nọgbẹ̀ Di Klistiani ni hẹn nuyọnẹn, oyọnẹn gọna nukunnumọjẹnumẹ he to Owe Wiwe lẹ mẹ họnwun na we dogọ. Dile a to owe ehe yizan, a na kudeji hugan gbede pọ́n dọ “ohó Jiwheyẹwhe tọn tin to ogbẹ̀ bo tindo huhlọn.”—Heb 4:12.