Paagi sa libro nga Mga Teksto Para sa Aton Cristianong Pagkabuhi, mas mahapos mo makita ang mga teksto kag kasaysayan sa Biblia nga makabulig sa imo nga masarangan ang mga kabudlayan. Makabulig man ini sa imo nga makita ang mga teksto nga magamit mo para palig-unon ang iban kag buligan sila nga makahimo sing desisyon nga nagapadungog kay Jehova. Pangitaa ang topiko nga kinahanglan mo. Ang kada topiko may ara sing mga pamangkot kag malip-ot nga sumaryo sang kasaysayan sa Biblia. (Tan-awa ang kahon ang “ Kon Paano Gamiton Ini nga Publikasyon.”) Makita mo ang madamo nga laygay, giya, kag paumpaw halin sa Pulong sang Dios nga makabulig sa imo. Magamit mo man ini para buligan ang iban—may mga teksto nga makapaumpaw sa ila, makabulig sa ila mga problema, kag makapabakod sa ila.

Ini nga publikasyon wala nagalista sang tanan nga teksto sa kada topiko. Pero maayo ini nga gamiton sa imo pag-research. (Hul 2:​1-6) Para sa dugang nga impormasyon, gamita ang mga marginal reference sang Bag-ong Kalibutan nga Badbad sang Balaan nga Kasulatan kag ang mga study note. Puede mo man gamiton ang Giya sa Pagtuon Para sa mga Saksi ni Jehova ukon ang Watch Tower Publications Index para sa dugang nga paathag sa teksto ukon kon paano mo ini maaplikar. Tan-awa ang bag-o nga mga reperensia para masigurado mo nga amo ini ang pinakabag-o nga paathag sa isa ka teksto.

Kabay nga makabulig sa imo ang Mga Teksto Para sa Aton Cristianong Pagkabuhi para makita mo ang kaalam, ihibalo, kag paghangop sa Balaan nga Kasulatan. Samtang ginagamit mo ini nga publikasyon, mangin kumbinsido ka pa gid nga “ang pulong sang Dios buhi kag gamhanan.”​—Heb 4:12.