Babaen ti Dagiti Teksto Para iti Panagbiag kas Kristiano, nalaklakam a mabirokan dagiti teksto ken salaysay iti Biblia a makatulong kenka tapno makayam dagiti pakarigatan iti biag. Mabalinmo met nga usaren daytoy a libro a mangbirok kadagiti teksto a mangparegta iti dadduma ken makatulong kadakuada nga agaramid kadagiti desision a mangparagsak ken Jehova. Piliem ti topiko a paginteresam, ken usarem dagiti saludsod ken ababa a sumario dagiti salaysay iti Biblia. (Kitaem ti kahon a “ No Kasano nga Usaren Daytoy a Publikasion.”) Adu ti masarakam a balakad, panangiwanwan, ken pammaregta iti Sao ti Dios. Makabirokka met kadagiti gameng a mabalinmo nga ibaga iti dadduma—teksto a mangpalag-an iti riknada, makatulong iti problemada, ken mangiwanwan ken mangparegta kadakuada.

Saan a nailista iti daytoy a publikasion ti amin a teksto para iti maysa a topiko. Ngem nagsayaat a pangrugian daytoy iti panagsukimatmo. (Pr 2:​1-6) Tapno ad-adu pay ti maammuam, usarem dagiti marhinal a reperensia ti Baro a Lubong a Patarus ti Nasantuan a Kasuratan ken dagiti study note ti New World Translation of the Holy Scriptures, no adda dayta iti sabali a lengguahe a maawatam. Usarem ti Giya iti Panagsukimat Para Kadagiti Saksi ni Jehova wenno ti Watch Tower Publications Index tapno ad-adda a maawatam ti kaipapanan ti maysa a teksto ken no kasanom a mayaplikar dayta. Usarem dagiti kabaruan a reperensia tapno masiguradom a ti pannakaawatmo kadagiti kinapudno iti Biblia ket maitunos iti kabaruan a pannakailawlawagna.

Sapay koma ta matulongannaka ti Dagiti Teksto Para iti Panagbiag kas Kristiano a mangbirok iti sirib, pannakaammo, ken pannakaawat nga adda iti Nasantuan a Kasuratan. Bayat nga us-usarem daytoy a publikasion, mas kombinsidokanton a “ti sao ti Dios ket nabiag ken nabileg.”—Heb 4:12.