Ọne ebe nan natiọle Adia Ne Ribhi Baibo Ne Ha Sabọ Rẹkpa Uwẹ, dẹ re ọle lẹkhẹ nin uwẹ rẹ miẹn ije kẹkẹ bhi Baibo ne ha sabọ rẹkpa uwẹ rẹ khọn ọnọghọ kẹkẹ nin uwẹ miẹn bhi iẹnlẹn. Ọ dẹ yẹ rẹkpa uwẹ rẹ miẹn ije kẹkẹ bhi Baibo nin uwẹ ha rẹ re izebhudu nin ẹbho, yẹ rẹkpa ele lu ebe ha ti Jehova bhọ. Uhọnmhọn-ọta kẹkẹ, ele ribhi ọne ebe. Zẹ uhọnmhọn-ọta kẹkẹ nọn hi ki rẹ khin nọn yẹẹ uwẹ. Bhi odotọ ọne uhọnmhọn-ọta, uwẹ dẹ miẹn inọnta bi okha eso bhi Baibo ne ha sabọ rẹkpa uwẹ. (Fẹ ọne ẹkpẹti nọn yọle “ Ebi Uwẹ Ha Rẹ Ha Noo Ọne Ebe Nan Yẹ.”) Ọne ebe nan dẹ wo rẹkpa uwẹ rẹ miẹn adia, ibhude, bi ikoudure bhi ọta nọnsi Osẹnobulua. Uwẹ dẹ yẹ miẹn ije kẹkẹ bhi Baibo nin uwẹ ha rẹ rẹkpa ẹbho nin egbe lọle, ẹbho ne ribhi ọnọghọ, bi ẹbho ne guanọ adia.

Lẹn sẹbhọ ghe, ọ i yi ijerebhe bhi Baibo ne rẹtẹ ene uhọnmhọn-ọta a gbẹn dagbare. Ọkpakinọn, ene a gbẹn dagbare nan dẹ rẹkpa uwẹ. (Pr 2:​1-6) Ahamiẹn uwẹ guanọ nin uwẹ manman guanọ otọ ọne uhọnmhọn-ọta, diọbhi Baibo nan sounun ọlẹn bhi ọne ebe nan, uwẹ ha tie study note, bi ulọnlẹn ebhebhe bhi Baibo ne diẹn mun ọne uhọnmhọn-ọta. Uwẹ dẹ yẹ sabọ noo ebe natiọle Research Guide for Jehovah’s Witnesses la Watch Tower Publications Index rẹ gua otọ ebi a re ẹmhọn nọn ribhi ọne Baibo ta. Ebe nin agbotu la zẹ ele egbe dagbare, ele uwẹ ha fẹghe, beji uwẹ ha da lẹn uwedẹ ọsọgbọn nan rẹ talọ ọbhi ọne ẹmhọn.

Mhan bhii Jehova, nin ọne ebe nan rẹkpa uwẹ rẹ miẹn ẹwanlẹn bi ilẹn-otọ-emhin bhi ọta nọnsọle. Beji uwẹ ha rẹ ha noo ọne ebe nan, uwẹ dẹ dọ kere ghe, “ọta nọnsi Osẹnobulua nyẹnlẹnmhin, ọ yẹ manman mhọn ahu.”—Hib 4:12.