كىرىسپە
«ماسىحشىلەرگە قاجەت تارماقتار» كىتابىنىڭ كومەگىمەن قيىن شاقتا وزىڭىزگە قاجەتتى كيەلى كىتاپ تارماقتارىن وڭاي تاباسىز. يا بولماسا بىرەۋدى جىگەرلەندىرۋ نەمەسە بىرەۋگە دۇرىس شەشىم قابىلداۋعا كومەكتەسۋ قاجەت بولعاندا، وسى كىتاپتى قولدانساڭىز بولادى. الدىمەن، قاجەتتى تاقىرىپقا كىرىڭىز، ول جەردە سۇراقتار مەن كيەلى كىتاپتاعى وقيعالار كەلتىرىلەدى (« باسىلىمدى قولدانۋ نۇسقاۋلىعى» دەگەن قورشاۋدى قاراڭىز). تارماقتاردان تۋرا ٴسىزدىڭ جاعدايىڭىزدا پايدالى بولاتىن كەڭەستەر مەن نۇسقاۋلار جانە جۇباتاتىن ويلار تابا الاسىز. سونداي-اق وندا باسقالاردىڭ رۋحىن كوتەرۋ ٷشىن، قيىندىقتارىن شەشۋگە كومەكتەسۋ ٷشىن، كەڭەس بەرۋ نە جىگەرلەندىرۋ ٷشىن دە قاجەت بولاتىن تارماقتار بار.
كىتاپتىڭ ىشىندەگى تاقىرىپتاردا تاقىرىپقا قاتىستى تارماقتاردىڭ ٴبارى ەمەس، ەڭ نەگىزگىلەرى كەلتىرىلەدى. تاعى دا باسقا تارماقتاردى ٶزىڭىز ىزدەنىپ تاپساڭىز بولادى (ن.س 2:1—6). مىسالى، تارماقتاردىڭ توعىسپالى سىلتەمەلەرىن اشىپ قاراڭىز جانە قولجەتىمدى بولسا، زەرتتەۋگە ارنالعان كيەلى كىتاپتاعى مالىمەتتەردى دە وقىڭىز. ال تارماقتىڭ ماعىناسىن جانە ومىردە قولدانۋ جولدارىن تەرەڭىرەك زەرتتەۋ ٷشىن، «ەحوبا كۋاگەرلەرىنىڭ ىزدەنىس قۇرالىن» نە «كۇزەت مۇناراسى باسىلىمدارىنىڭ كورسەتكىشىن» قولدانىڭىز. اسىرەسە سوڭعى شىققان مالىمەتتەرگە ٴمان بەرسەڭىز، جازبالارداعى جاڭا تۇسىنىكتەردەن حاباردار بولىپ جۇرەسىز.
«ماسىحشىلەرگە قاجەت تارماقتار» كىتابى سىزگە قۇداي سوزىندە جاتقان دانالىقتى، تۇسىنىك پەن ٴبىلىمدى قازىپ تابۋعا كومەكتەسە بەرسىن! وسى باسىلىمدى قولدانعان سايىن، «قۇدايدىڭ ٴسوزى ٴتىرى، اسەرى دە كۇشتى» ەكەنىنە كوزىڭىز جەتەدى (ەۆ 4:12).