Kitabo Bisonekwa Bikwasha Mwine Kidishitu mu Būmi kisa kukukwasha upēlelwe kusokola bisonekwa bya mu Bible bīsambila pa myanda yotanwa nayo difuku ne difuku. Kadi kisa kukupa muswelo wa kusokola bukidi bonka mavese mafwaninwe amba ubwanye kukankamika nao bakwabo ne kwibakwasha bakwate butyibi bulēmekeja Yehova. Abe tala’tu kishima kikatampe kyosaka, shi ubafika’po, bipangujo ne binenwa bīpi bya bimfwa bya mu Bible bidi’po ke bikuludika. (Tala kapango “ Muswelo wa Kwingidija Kino Kitabo.”) Ne kwija kwine mpika, usa kusokola myanda ya kamweno ikupa madingi, bulombodi, ne busengi bitamba mu Kinenwa kya Leza. Usa kutana’mo ne byabulēme bya kwisamba na bakwabo—ke mavese a mu Bible kadi, akebasenga, kwibakwasha mu bikoleja byabo, kwibapa madingi ne kwibakankamika.

Kino kitabo kekitelelepo bisonekwa byonso bitala mwanda ne mwanda. Inoko i kingidilwa kiyampe mpata mu kushilula nakyo bukimbi nansha shi koenda ku bikwabo. (Nki 2:​1-6) Shi ukimba kukola, nabya ingidija bya kunyemena’ko bya mufula ne bilembwa bya kwifunda bidi mu Bisonekwa Bijila—Bwalamuni bwa Ntanda Mipya. Shi usaka kuyuka buluji bonso bwa kisonekwa ne mwa kwikingidijija, tala Dibuku dya Bukimbi dya Batumoni ba Yehova nansha Index des publications des Témoins de Jéhovah. Kimba byobya bilupwilwe panopano mwa kutanina myanda idi’mo mwivwanino wa panopano wa bubine bwa mu Bible.

Tulomba’mba kitabo Bisonekwa Bikwasha Mwine Kidishitu mu Būmi kikukwashe usokole tunangu, buyuki, ne ñeni bitanwa mu Bisonekwa Bijila. Poingidija kino kitabo, ukemwena amba bine ne bine ponka, “kinenwa kya Leza i kyūmi kadi kidi na bukomo.”—Bah 4:12.