Bug Ndiko ma Konyowa Dak Kaka Jokristo biro konyi yudo mapiyo ndiko ma nyalo konyi nyagori gi pek ma inyalo romogo. Bende, onyalo konyi yudo ranyisi mabeyo e Muma ma inyalo tiyogo e jiwo jomamoko kendo konyogi mondo gitim yiero ma miyo Jehova duong’. Yier wich ma mori. Wich ka wich oting’o penjo kod weche moko machuok ma lero ranyisi moro manie Muma. (Ne sanduk ma wiye wacho ni “ Kaka Inyalo Tiyo gi Bugni.”) Ibiro yudo weche mathoth ma biro puonji, tayi, kendo miyi hoch ma yudore e Wach Nyasaye. Bende, ibiro yudo ndiko mamoko mabeyo ma inyalo tiyogo e jiwo jomoko kendo konyogi mondo ginyagre gi chandruogegi.

Bugni ok oting’o ndiko duto motudore gi wich miwuoye. Kata kamano, en buk maber ahinya ma nyalo konyi chako timo nonro. (Nge 2:​1-6) Mondo ing’e weche momedore, inyalo somo ndiko moried e dier Muma, kata inyalo somo weche mag timo nonro manie New World Translation of the Holy Scriptures. Inyalo tiyo gi Buk Makonyo Joneno mag Jehova e Timo Nonro kata Fahirisi, mondo imed ng’eyo tiend ndiko moro kod kaka inyalo tiyo kode e ngimani. Inyalo nono weche mogo machiegni mondo ibed gadier ni mano e kaka ilero ndikono sani.

We mondo bugni okonyi fwenyo rieko kod adiera matut manie Muma. Sama itiyo gi kode, ibiro medo bedo gadier ni “wach Nyasaye ngima kendo en gi teko ma tiyo.”—Hib 4:12.