ആമുഖം
ക്രിസ്തീയ ജീവിതത്തിനുള്ള ബൈബിൾതത്ത്വങ്ങൾ എന്ന ഈ പുസ്തകത്തിൽ പ്രശ്നങ്ങൾ കൈകാര്യം ചെയ്യാൻ സഹായിക്കുന്ന ബൈബിൾ വാക്യങ്ങളും വിവരണങ്ങളും നിങ്ങൾക്കു വളരെ എളുപ്പം കണ്ടെത്താം; മറ്റുള്ളവരെ പ്രോത്സാഹിപ്പിക്കാനും നിങ്ങൾക്ക് ഈ പുസ്തകം ഉപയോഗിക്കാം. കൂടാതെ, യഹോവയെ മഹത്ത്വപ്പെടുത്തുന്ന നല്ല തീരുമാനങ്ങളെടുക്കാൻ അവരെ സഹായിക്കാനും ഈ പുസ്തകം ഉപകരിക്കും. ആദ്യം, നിങ്ങൾക്കു വേണ്ട വിഷയം എടുക്കുക. അതിലെ ചോദ്യങ്ങളും ചെറിയ ബൈബിൾവിവരണങ്ങളും മുന്നോട്ടുപോകാൻ നിങ്ങളെ സഹായിക്കും. (“ ഈ പുസ്തകം എങ്ങനെ ഉപയോഗിക്കാം” എന്ന ചതുരം ചതുരം കാണുക.) അപ്പോൾ ഉപദേശവും ആശ്വാസവും തരുന്ന ധാരാളം ബൈബിൾവാക്യങ്ങൾ നിങ്ങൾക്കു കാണാം. കൂടാതെ, മറ്റുള്ളവരുമായി പങ്കുവെക്കാവുന്ന വിലയേറിയ ആത്മീയനിധികളും നിങ്ങൾ കണ്ടെത്തും. അവ അവരുടെ മനസ്സിനെ തൊട്ടുണർത്തും; പ്രശ്നങ്ങൾ പരിഹരിക്കാൻ അവരെ സഹായിക്കും; അവർക്ക് ഉപദേശവും പ്രോത്സാഹനവും നൽകും; തീർച്ച!
ഈ പുസ്തകത്തിൽ ഓരോ വിഷയത്തിലും അതിനെപ്പറ്റിയുള്ള എല്ലാ ബൈബിൾവാക്യങ്ങളും കണ്ടെന്നുവരില്ല. എന്നാൽ ഗവേഷണം തുടങ്ങാൻ നിങ്ങളെ സഹായിക്കുന്ന ഒന്നാന്തരം ഒരു ഉപകരണമാണിത്. (സുഭ 2:1-6) ആഴത്തിൽ കുഴിച്ചിറങ്ങാൻ, വിശുദ്ധ തിരുവെഴുത്തുകൾ—പുതിയ ലോക ഭാഷാന്തരത്തിന്റെ പഠനക്കുറിപ്പുകളും ഒത്തുവാക്യങ്ങളും ഉപയോഗിക്കുക. ഒരു വാക്യത്തിന്റെ അർഥമോ അതു ജീവിതത്തിൽ പ്രാവർത്തികമാക്കുന്നത് എങ്ങനെ എന്നോ നന്നായി മനസ്സിലാക്കാൻ യഹോവയുടെ സാക്ഷികൾക്കുവേണ്ടിയുള്ള ഗവേഷണസഹായി, വാച്ച്ടവർ പ്രസിദ്ധീകരണ സൂചിക (ഇംഗ്ലീഷ്) എന്നിവ സഹായിക്കും. അടുത്ത കാലത്ത് ഇറങ്ങിയ പ്രസിദ്ധീകരണങ്ങൾ നോക്കി ബൈബിൾസത്യത്തെക്കുറിച്ചുള്ള ഏറ്റവും പുതിയ വിവരങ്ങൾതന്നെ ആണ് നിങ്ങൾ കണ്ടെത്തുന്നതെന്ന് ഉറപ്പുവരുത്തുക.
ക്രിസ്തീയ ജീവിതത്തിനുള്ള ബൈബിൾതത്ത്വങ്ങൾ എന്ന ഈ പുസ്തകം വിശുദ്ധതിരുവെഴുത്തുകളിലെ ജ്ഞാനവും അറിവും വിവേകവും കണ്ടെത്താൻ നിങ്ങളെ സഹായിക്കട്ടെ. ഇത് ഉപയോഗിക്കുമ്പോൾ “ദൈവത്തിന്റെ വാക്കുകൾ ജീവനുള്ളതും ശക്തി ചെലുത്തുന്നതും” ആണെന്നു നിങ്ങൾക്ക് ഒന്നുകൂടി ഉറപ്പാകും.—എബ്ര 4:12.