Bhuku Vhesi Jinotibesera Kuti Tishandire Jehovha, rinozomubesera pa kuwana mavhesi no muezaniso jo mu Bhaibheri jingamubesera pa kuhwisana no zvineso zvo njiku no njiku. Irona rinozomubeserazve pa kuwana muezaniso jo mu Bhaibheri jamungashandisa pa kuvangisa vamweni no kuvabesera kuti vateme zvivaringo zvinokuja Jehovha. Ejanyi basi kuwana shwiro yamunodaro, perapo mosotesesa muvhunjo no muezaniso jinoviyaro ponapo. (Vonanyi bhokiso rinoti: “ Mungashandisa Kudini Bhuku Iri?”) Ngo kukasika munozowana mavhesi mazinji o Bhaibheri angamupa mazano aushoni no embezero. Munozowanazve masoko amungavhunjavo vamweni, kuwana mavhesi anomudakajisa, anomubesera pa kutonga zvineso zvenyu, kumupa mazano no kumuvangisa.

Bhuku iri arina vhesi jese jingashandiswa pa shwiro imwe nga imwe. Asi irona rinozomupa matangiro aushoni pa kupsakisisa kwenyu. (Mazwi 2:​1-6) Kuti munase kubesereka, shandisanyi mareferensiya kruzadha no masoko o kujija anowanika mu Sandujo yo Nyika Imbza. Shandisanyi Bhuku ro Kupsakisisa ro Zvapupu zva Jehovha kana Índice das Publicações da Torre de Vigia kuti muzwisise revo yo vhesi iri yese kana mashandisire atingaita vhesi yondhoyo. Sotanyi mabhuku avha kubudiswa wari kuti muwane zwisiso imbza yo zvokadi zvo Bhaibheri.

Tinovetera kuti bhuku Vhesi Jinotibesera Kuti Tishandire Jehovha, rimubesere kuva no zivo, uzivi pomwe no zwisiso iri mu Matahwa Akacena. Pamunonga mecishandisa bhuku iri, munozova no cokwadi kamare cokuti “soko ra Mwari arifi, rino simba maningi.”—Vah 4:12.