Embo Omanyolo ngoka tage tu kwathele tu longele Jehova, olye shi ninga oshipu wu vule okumona oovelise nomahokololo gomOmbiimbeli, ngoka taga vulu oku ku kwathela wu ungaunge nomashongo ngoka to iyadha mugo. Otali ke ku kwathela wo wu mone omanyolo ngoka to vulu okulongitha wu tse yalwe omukumo noku ya kwathela ya ninge omatokolo taga simanekitha Jehova. Konga oshikundathanwa shoka wa hala okulesha. Oshikundathanwa kehe oshi na omapulo nengongo lyehokololo lyOmbiimbeli. (Tala oshimpungu “ Nkene to vulu okulongitha oshileshomwa shika.”) Oto ka mona nziya omayele, ewiliko nosho wo ehekeleko okuza mOohapu dhaKalunga. Oto ka vula wo okumona omakotampango taga longo, ngoka to vulu okulongitha, opo wu kwathele yalwe noku ya tsa omukumo ya vule okuungaunga nomaupyakadhi gawo.

Odhoshili kutya moshileshomwa shika kamu na omanyolo agehe ngoka ga pamba oshikundathanwa kehe. Ihe osha nyanyangidhwa nelalakano lyoku ku kwathela wu mone omanyolo ngoka to vulu okulongitha nowu ninge omapekapeko to longitha iikwathitho yilwe, opo wu ilonge oshindji. (Omayel 2:1-6) Longitha Embo lyokukonga uuyelele lyOonzapo dhaJehova, nenge o-Watch Tower Publications Index, opo wu konakone muule eityo lyomanyolo, nonkene to vulu oku ga tula miilonga. Iilongitho mbyoka otayi ke ku ulukila shoka twa nyanyangidha po kombinga yenyolo ndyoka; tala iileshomwa mbyoka opo ya piti, wu mone uuyelele wopamanyolo wu li pethimbo.

Embo Omanyolo ngoka tage tu kwathele tu longele Jehova nali ku kwathele wu likole owino, wu mone ontseyo nowu kale neuvoko lyOmanyolo Omayapuki. Sho to ka longitha oshileshomwa shika, oto ka kala wa tompwa kutya “oohapu dhaKalunga odhi na omwenyo nodhi na oonkondo dhokulonga sha.” — Heb 4:12.