Mwene otyipuka omukanda ou walingwa matyikukwatesako okuvasa liwa onotesitu mb’Ombimbiliya mambukukwatesako tyina una ovitateka. Muna onotesitu upondola okutangela vakwenyi uvepameke, nokuvekwatesako okusoka nawa tyina vena etyi vahanda okulinga. Mwene upondola vala okukoya osapi mohande, opo yatyo movasi omapulo, neevi vialingailwe novanthu vamwe vapopiwa m’Ombimbiliya. (Tala okakasa kati “ Oñgeni Movasi Ovipuka Momukanda Omu?”) Movasi-mo onotesitu mambukukwatesako tyina una etyi uhanda okulinga, noombu mambukuungumanesa nokukupameka. Tupu movasi-mo ovipuka oviwa upondola okupopila vakwenyi, hamwe otesitu imwe maivepameka, aa maivekwatesako motyitateka tyimwe vena-tyo.

Momukanda ou kamuvasiwa onotesitu mbatyo ambuho mb’Ombimbiliya. Mahi maukukwatesako okuvasa etyi uhanda okunoñgonoka. (Omih 2:1-6) Ine uhanda okunoñgonoka nawa otesitu imwe, enda umwe m’Ombimbiliya, otange vali onotesitu ononkhwavo mbuvasiwa-po. Okuti hatyo, otange outoi uvasiwa m’Ombimbiliya Yokulilongesa Moputu. Tupu upondola okutala Momukanda Wokuovolola wo Nombangi mba Jeova, oo mo Índice das Publicações da Torre de Vigia. Otyiwa utange umwe omikanda omipe mokonda pamwe ovipuka ankho tupopia kohale twevipilulula.

Omukanda ou maukukwatesako okuvasa ounongo, nenoñgonoko, nekungunyiko livasiwa Mondaka ya Huku. Tyina utanga omukanda ou, motyimono umwe okuti “ondaka ya Huku ina omwenyo, nononkhono ononene.” — Heb 4:12.