Diospaq hina kawsakunapaq bibliapa nisqankuna sutiyuq libroqa kawsakuyninchikpi yanapawaqninchik textokunata chaylla tarinapaqmi yanapawasun. Yanapawasuntaqmi hukkunata kallpanchanapaq textokunata tarinapaqpas chaynataq Jehova Diospa munasqanman hina imatapas tantianankupaq yanapanapaqpas. Chaypaq munasqayki yachachikuyta maskaykuy, chaypim kachkan tapukuykuna hinaspa textokunapa ima nisqankuna (qaway recuadropi “ Imaynata kay qillqawan yanapachikunamanta” niqta). Chayllam tarinki yanapasuqniki textokunata hinaspa bibliapi consejokunata. Tarinkitaqmi qampaq chaynataq hukkunata yanapanaykipaq yachachikuykunatapas.

Kay libropiqa mayqin yachachikuymantapas manam lliw textokunachu kachkan. Aswanqa huk textokunatapas hinalla maskanaykipaqmi yanapasunki (Pr 2:​1-6). Astawan yachanaykipaq Musuq allpa pachapi kawsaqkunapaq bibliapi maskay uray patanpi utaq chawpinpi kaq textokunata, utaq castellano bibliapi notas de estudio nisqanta. Yanapasunkimantaqmi Jehova Diospa testigonkunapa qillqankunapi maskanapaq chaynataq Índice de las publicaciones Watch Tower nisqanpas. Chaykunam yanapasunki textokunapa ima ninan kasqanta astawan entiendenaykipaq hinaspa imaynata kasukunaykipaq. Chay maskasqayki yachachikuykuna chayllaraq lluqsimuq kasqanta segurakuykuy.

Munanikum kay qillqata servichikuspayki bibliapa yachachikuyninkunata astawan yachanaykita hinaspa yuyayniyuq chaynataq yachayniyuq kanaykita. Kay qillqata servichikusqaykiman hinam manapuni iskayrayankichu ‘Diospa palabranqa kawsasqanta hinaspa atiyniyuq’ kasqanmanta (Heb 4:12).