Bukhu ino yakuti Malemba Toera Kuaphatisira mu Umaso Wathu Wacikristu inakuphedzani toera kugumana mavesi na pitsandzo pya m’Bhibhlya pinapangiza kuti munakwanisa tani kupirira nyatwa zinatamba imwe ntsiku na ntsiku. Bukhu ino inakuphedzanimbo toera kugumana mavesi akuti munakwanisa kuaphatisira toera kubalangaza na kuphedza anango toera acite pisankhulo pyakuti pinapasa mbiri Yahova. Mungagumana nsolo unafuna imwe, tawirisani kuti mibvundzo na pitsandzo pinango pinalongwa m’Bhibhlya pikutsogolereni. (Onani bokosi “ Tinaphatisira Tani Bukhu Ino.”) Mwakukhonda dembuka imwe munakwanisa kugumana mavesi mazinji akuti anakuphedzani toera kugumana uphungu wadidi na cibalangazo. Imwe munakwanisambo kugumana mphangwa zadidi kakamwe toera kupanga anango, mavesi a m’Bhibhlya akuti anaatsandzayisa, kuaphedza mu nyatwa zawo, pontho kuapasa uphungu na ciwangiso.

Bukhu ino nkhabe mavesi onsene a mphangwa zinafuna imwe. Mbwenye iyo inakuphedzani kakamwe toera kugumana mphangwa zinasaka imwe. (Mis 2:1-6) Toera kudziwa pizinji, phatisirani pidzindikiro pinagumanika m’Bhibhlya ya Dziko Ipswa pinapangiza malemba anango a m’Bhibhlya akuti asabverana na vesi inaleri imwe na pidzindikiro pyapantsi pya Bhibhlya ya pfundziro khala iripo mu cilongero cinadziwa imwe. Phatisirani Bukhu Inaphatisira Mboni za Yahova Pakufufudza peno Índice das Publicações da Torre de Vigia toera kudziwa mwadidi mabvekero a vesi peno toera kudziwa kuti munaiphatisira tani. Sakani m’mabukhu athu mphangwa zidabuluswa cincino toera mukhale na cinyindiro cakuti pinadziwa imwe pisabverana na kubvesesa kwathu kupswa undimomwene wa m’Bhibhlya.

Tisadikhira kuti bukhu ino yakuti Malemba Toera Kuaphatisira mu Umaso Wathu Wacikristu inakuphedzani toera kudziwa mwadidi malemba, kuthimizira udziwisi wanu na luso yanu yakubvesesa mphangwa za m’Bhibhlya. Mu ndzidzi unaleri imwe bukhu ino, cinyindiro canu cakuti “mafala a Mulungu ndi a m’maso na amphambvu,” cinathimizirika kakamwe.—Ahe 4:12.