O le a fesoasoani lenei lomiga Taʻiala a le Tusi Paia mo Kerisiano ina ia faigofie ai ona e maua mau ma tala o le Tusi Paia e taulima ai luʻi o loo e fesagaʻia. O le a fesoasoani foʻi iā te oe e maua ai mau o le Tusi Paia e faalaeiau ai isi ma mafai ai ona latou faia faaiʻuga e faamamaluina ai Ieova. Ia filifili se mataupu o loo e fia faitau i ai, e tofu le mataupu ma ni fesili ma faamatalaga pupuu o tala o le Tusi Paia. (Tagaʻi i le pusa “ Le Auala e Faaaogā ai Lenei Lomiga.”) O le a e maua ai le tele o fautuaga, taʻiala, ma faamāfanafanaga mai i le Afioga a le Atua. O le a e aʻoaʻoina ai foʻi ni ʻoa tautele e faasoa atu i isi, e pei o mau o le Tusi Paia e faamalosiau iā i latou, fesoasoani i o latou faafitauli, ma latou maua ai fautuaga ma faalaeiauga.

E lē o lisiina atu i lenei lomiga mau uma e fesootaʻi i mataupu taʻitasi, ae o se faavae lelei e amata ai ni au saʻiliʻiliga. (Fat 2:​1-6) E mafai ona e faaaogāina le Tusi Taʻiala mo Saʻiliʻiliga a Molimau a Ieova, ina ia e malamalama atili ai i le uiga o se mau ma lona faatatauga. Ia faitau i lomiga lata mai, e faamautinoa ai o loo e maua le tatou malamalamaga o loo iai i le taimi nei e faatatau i upu moni o le Tusi Paia.

Tau ina ia fesoasoani lenei lomiga Taʻiala a le Tusi Paia mo Kerisiano e te aʻoaʻoina ai le atamai, poto, ma le malamalamaga o loo iai i le Afioga a le Atua. O le iʻuga, o le a atili ai ona e mautinoa “o loo ola le afioga a le Atua ma e matuā malosi foʻi.”—Epe 4:12.