Takeda u Er Se Dondo Kwaghwan u Bibilo ken Uma Wase Yô ne ua wase u zuan a avur a Bibilo aa zough sha zayol u u tagher a mi yô a iyolnyoon shio. Shi ua wase u u zuan a avur a Bibilo a vough a u fatyo u taver mbagen ishima shi wasen ve u eren akaa sha gbenda u Yehova una zua a icvir yô. Za hen itinekwagh i kwagh a gbe u a mi la. Hanma itinekwagh yô, i pine mbampin her shi i sav ôron akaa tiônôô a pasen kwagh u Bibilo i er la. (Nenge ngeren u kiriki u “ Er U Ker Kwagh ken Takeda Ne Yô.”) Takeda ne ua wase u, u zua a avur a Bibilo aa fatyô u wan we kwagh shi surun we ishima yô. Kpa ka cii la ga, u fatyô u zuan akaawan a injaa ken Bibilo a u er tom a mi u wan mbagenev kwagh shi taver ve ishima yô.

Takeda ne ter avur a Bibilo aa zough sha hanma itinekwagh cii ga. I gber takeda ne ér u wase u u zuan a avur a Bibilo a a hemba lun we a inja sha ma itinekwagh yô, nahan kpa, shi u fatyô u seer timen sha kwagh shon ken ityakeda yase igen kpaa. (Anz 2:1-6) Zum u u soo u seer timen sha kwagh yô, er tom a asangebaacaa a ka i nger hen ma ivur u tesen we avur agen aa ôr kwagh shon môm la, gayô er tom a ngeren u henen kwagh a mi u ken Bibilo i New World Translation of the Holy Scriptures i ken zwa Buter la. Aluer u soo u seer tôvon fan inja i ma ivur Bibilo kua gbenda u a er tom a kwagh u i ôr la kpaa yô, er tom a Takerada u Tôvon sha Kwagh ú Mbashiada mba Yehova shin takeda u Watch Tower Publications Index la. Time ken ngeren mba i sember gberen yô, sha er kwagh u u zua a mi la a lu ityesen i tse ga yô.

Yô, takeda u Er Se Dondo Kwaghwan u Bibilo ken Uma Wase Yô ne, u wase u u zuan a kwaghfan man mfe kua mkav u ken Icighan Ruamabera la. Er u lu eren tom a takeda ne la, u seer lun a jighjigh u nan taveraa wer, “mkaanem ma Aôndo ma uma shi ka ma er tahav” kpaa.—Heb 4:12.