Ko e Ngaahi Konga Tohi Tapu ki he Moʻui Faka-Kalisitiané te ne ʻai ke faingofua hoʻo maʻu ʻa e ngaahi konga Tohi Tapu mo e ngaahi talanoa Fakatohitapu te ne lava ʻo tokoniʻi koe ke ke fekuki ai mo e ngaahi pole ʻokú ke fehangahangai mo iá. Te ne toe tokoniʻi foki koe ke maʻu ʻa e fakamatala Fakatohitapu tofu pē ʻoku fiemaʻu ke ke fakalototoʻaʻi ʻaki ʻa e niʻihi kehé pea ke tokoniʻi kinautolu ke fai ʻa e ngaahi fili ʻoku fakalāngilangiʻi ai ʻa Sihová. Kumi pē ki he kaveinga ʻokú ke fiemaʻú, pea tuku ke tataki koe ʻe he ngaahi fehuʻí mo e fakamatala nounou ʻo e ngaahi talanoa Fakatohitapú. (Sio ki he puha “ Founga ke Ngāueʻaki Ai ʻa e Tohi ko Ení.”) Te ke maʻu leva ha ngaahi faleʻi, tataki mo e fakafiemālie mātuʻaki mahuʻinga mo ʻaonga mei he Folofola ʻa e ʻOtuá. Te ke toe maʻu foki mo ha ngaahi koloa ke vahevahe atu ki he niʻihi kehé—ko e ngaahi konga Tohi Tapu te ne langaʻi honau laumālié, tokoniʻi kinautolu ʻi heʻenau ngaahi palopalemá pea ʻoange kiate kinautolu ʻa e faleʻi mo e fakalototoʻa.

ʻOku ʻikai ʻomai ʻi he tohi ia ko ení ha lisi ʻo e ngaahi konga Tohi Tapu kotoa pē fekauʻaki mo ha kaveinga. Ka ko ha tohi lelei ʻaupito ia ke kamata ai hoʻo fekumí. (Pal. 2:​1-6) Ke keli loloto ange, ngāueʻaki ʻa e ngaahi fakamatala ʻi he tafaʻakí pea mo e nouti ako ʻi he Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní ʻo ka ala maʻu ʻi ha toe lea ʻoku mahinoʻi ʻe he kau lautohí. Ngāueʻaki ʻa e Tataki Fakaefekumi Maʻá e Kau Fakamoʻoni ʻa Sihová pe ko e Watch Tower Publications Index ke ako lahi ange ki he ʻuhinga ʻo ha konga Tohi Tapu pe ko hono ngāueʻakí. Fekumi ʻi he meʻa kuo toki pulusi ki muí ni maí ke fakapapauʻi ʻokú ke maʻu ʻa e mahino fakamuimui taha ki he ngaahi moʻoni Fakatohitapú.

ʻOfa ke tokoniʻi koe ʻe he Ngaahi Konga Tohi Tapu ki he Moʻui Faka-Kalisitiané ke ke maʻu ʻa e poto, ʻilo mo e mahino ʻoku maʻu ʻi he Tohi Tapu Māʻoniʻoní. ʻI hoʻo ngāueʻaki ʻa e tohi ko ení, te ke toe falala pau lahi ange ai “ko e folofola ʻa e ʻOtuá ʻoku moʻui pea ko e koto mālohi.”—Hep. 4:12.