Bbuku eeli lyakuti Magwalo Aagwasya Kupona Buumi Bwa Bunakristo lilapa kuti cimuubile kujana tupango twamu Bbaibbele alimwi azibalo zikonzya kumugwasya kuliyumya mubukkale bukatazya. Kunze boobo, lilamugwasya kujana Magwalo ngomukonzya kubelesya kukulwaizya bamwi akubagwasya kupanga zyakusala zilemeka Jehova. Aboobo, amusale mutwe wamakani ngomuyanda. Mutwe wamakani uuli woonse ulijisi mibuzyo alimwi abupanduluzi bufwaafwi bwazibalo zyamu Bbaibbele. (Amubone kabbokesi kakuti “ Mbomukonzya Kulibelesya Bbuku Eeli.”) Ikuti mwacita oobo, muyoojana magwalo aakonzya kumupa lulayo alimwi aluumbulizyo ndomuyandika. Kuyungizya waawo, muyoojana njiisyo zyamu Bbaibbele zyalo nzyomukonzya kubelesya kugwasya bamwi kuliyumya kumapenzi ngobajisi alimwi akubakulwaizya.

Bbuku eeli talijisi magwalo oonse aajatikizya mutwe wamakani ooyo uubandikwa. Pele ncibelesyo cibotu kapati ncomukonzya kubelesya kutalika kuvwuntauzya. (Tus. 2:​1-6) Kutegwa mwiiye zinji, amubelesye magwalo aajisi twaambo tukozyenye alimwi akubelesya ma study notes aamu Bbaibbele lya New World Translation of the Holy Scriptures. Mpoonya ikuti kamuyanda kulumvwisya kabotu lugwalo lumwi, amubelesye Bbuku Ligwasya Kuvwuntauzya lya Bakamboni ba Jehova. Bbuku eeli liyoomugwasya kubona makani aakamwaigwa kujatikizya lugwalo oolo. Kumane malifalensi aakamwaigwa caino-ino ayoomugwasya kubona mbotulumvwisya lino lugwalo oolo.

Bbuku eeli lya Magwalo Aagwasya Kupona Buumi bwa Bunakristo alimugwasye kujana busongo alimwi luzyibo luli mu Magwalo Aasalala. Mbomunooyaabulibelesya bbuku eeli, muyoosinizya ncobeni kuti “jwi lya Leza lilaabuumi alimwi lilaanguzu.”—Heb. 4:12.