E nehenehe te buka Te Bibilia e te oraraa Kerisetiano e tauturu ia outou ia ite ohie mai i te mau irava Bibilia e te mau aamu Bibilia no te faaruru i te mau fifi. E tauturu atoa te reira ia outou ia ite mai i te mau irava tano no te faaitoito ia vetahi ê e ia rave ratou i te mau faaotiraa o te faahanahana ia Iehova. A maiti i te tumu parau ta outou e hinaaro, e no te tumu parau tataitahi e tauturu atu te mau uiraa e te mau faataaraa poto o te mau aamu Bibilia. (A hiˈo i te tumu parau tarenihia: “ E nafea ia faaohipa i teie buka?”) E ite mai outou i te mau irava faufaa o te horoa i te mau aratairaa e te tamahanahanaraa hinaarohia e outou no ǒ mai i te Bibilia. E ite atoa mai outou i te mau faaueraa tumu faufaa o te Bibilia o ta outou e nehenehe e faaohipa no te tauturu e faaitoito ia vetahi ê.

Aita teie buka e faahiti ra i te mau irava atoa horoahia i roto i te hoê tumu parau. E haamataraa papu râ te reira no te rave i ta outou maimiraa. (Mas 2:1-6) No te faahohonu atu â, a faaohipa i te mau irava faahororaa. A faaohipa i te Maimiraa Bibilia no te mau Ite no Iehova aore ra te Index des publications des Témoins de Jéhovah no te ite atu â te auraa o te hoê irava aore ra te faaohiparaa. A hiˈo i tei piahia e ere i te mea maoro no te ite i te mau haamaramaramaraa apî no nia i te pue parau mau.

Ia tauturu te buka Te Bibilia e te oraraa Kerisetiano ia outou ia noaa te paari, te ite e te maramarama e vai ra i roto i te Bibilia. Ia faaohipa outou i teie buka e papu ia outou “mea ora . . . te parau a te Atua e te puai rahi.”—Heb 4:12.