Ẹkpo ri Baibol vwọ kẹ Akpeyeren rẹ Inenikristi cha nẹrhẹ ọ lọhọ wọ sa vwọ guọnọ ẹkpo vẹ ikuegbe ri Baibol sansan re sa cha wẹ uko vwo yerin ghene ebẹnbẹn wo hirharoku. Vwọba, ọ cha cha wẹ uko vwọ guọnọ ẹkpo ri Baibol ri fori wọ sa reyọ vwọ bọn ihwo efa gan je nẹrhẹ ayen brorhiẹn ro che brọghọ phiyọ Jihova oma. Sanẹ uyovwinrota ro je we, enọ vẹ ọdjẹkoko rẹ ikuegbe ri Baibol na cha vwẹ ukecha kẹ wẹ. (Ni ekpeti na “ Obo ra sa vwọ Reyọ Ọbe Nana vwo Ruiruo.”) O che kri wọ ke mrẹ ẹkpo ri Baibol re sa vwẹ uchebro vẹ ọbọngan ru wọ guọnọre vwọ kẹ wẹ-ẹ. Vwọba, wọ je cha mrẹ efe eghanghanre ru wọ sa vuẹ ihwo efa kpahen​​—ẹkpo ri Baibol re sasa ohwo ẹwẹn, re sa cha ayen uko vwẹ ebẹnbẹn rayen, je vwẹ uchebro vẹ ọbọngan vwọ kẹ ayen.

Ọ dia ẹkpo ri Baibol eje rehẹ uyovwinrota ọvuọvo yen ọbe nana vwọphia-a. Ẹkẹvuọvo e ruro rere wọ sa vwọ reyọ vwo ru ehiahiẹ. (Isẹ 2:​1-6) Wọ sa vwọ hiẹ kodophiyọ, reyọ asan rọ rionbọ kpo ẹdia efa vwẹ Baibol na kugbe study notes rọhẹ New World Translation of the Holy Scriptures vwo ruiruo. Wọ sa vwọ nabọ vwo ẹruọ rẹ ẹkpo ri Baibol vẹ obo ra reyọ vwo ruiruo wan, ni Research Guide for Jehovah’s Witnesses yẹrẹ Watch Tower Publications Index. Ni ẹbe ra vwọphia o krinọ-ọ na wo se vwo vwo ẹruọ kpokpọ rẹ ukoko na vwọphia kpahen iyota rehẹ Baibol na.

E jẹ ọbe na Ẹkpo ri Baibol vwọ kẹ Akpeyeren rẹ Inenikristi cha wẹ uko vwọ mrẹ aghwanre, ẹruọ kugbe erianriẹn rehẹ Isiesi Ọfuanfon na. Wọ vwọ vwẹ ọbe nana vwo ruiruo na, wo che vwo imuẹro nẹ “ota rẹ Ọghẹnẹ herọ yerẹn, ọ je vọn vẹ ẹgba.”​​—Hib 4:12.