Maṅwalo Ane A Livhisa Vhakriste i ḓo ni thusa u wana Maṅwalo ane a nga ni thusa kha thaidzo dzine na nga ṱangana nadzo ḓuvha ḽiṅwe na ḽiṅwe. I ḓo dovha ya ni thusa uri ni wane Maṅwalo o teaho ane na nga ṱuṱuwedza vhaṅwe ngao na u vha thusa uri vha ite phetho dzine dza takadza Yehova. Ni nga khetha tshiṱoho tshine na tshi takalela. Tshiṱoho tshiṅwe na tshiṅwe tshi na mbudziso na tsumbo dzi bvaho Bivhilini dzine dza nga ni thusa. (Sedzani bogisi “ Nḓila Ine Na Nga Shumisa Ngayo Heyi Bugu.”) Ni ḓo wana maṅwalo ane a nga ni livhisa, u ni ṱuṱuwedza na u ni khuthadza. Ni ḓo dovha na wana maṅwalo ane na nga thusa na u ṱuṱuwedza vhaṅwe ngao.

Zwi tou pfala uri yeneyi bugu a i na maṅwalo oṱhe ane a amba nga ha tshiṱoho tshine na ḓo vha ni tshi khou tshi vhala. Fhedzi i ḓo ni thusa uri ni wane maṅwalo a thusaho a ambaho nga ha tshenetsho tshiṱoho. Ni nga shumisa na zwiṅwe zwishumiswa u itela u wana zwo engedzeaho. (Mir 2:1-6) U itela u guda zwo engedzeaho, ni nga sedza khoḽumu i re na maṅwalo a tshimbidzanaho na luṅwalo lune na khou lu vhala kha Ṱhalutshedzelo Ya Shango Ḽiswa Ya Maṅwalo Makhethwa. U itela u guda zwo engedzeaho nga ha luṅwalo lune na ḓo vha ni tshi khou lu vhala ni nga dovha na shumisa Research Guide for Jehovah’s Witnesses kana Watch Tower Publications Index. Zwi nga vha zwavhuḓi u sedza zwithu zwine zwa kha ḓi tou bva u bviswa zwine zwa amba nga ha lwonolwo luṅwalo.

U nga ri Maṅwalo Ane A Livhisa Vhakriste i nga ni thusa u pfesesa, u wana nḓivho na vhuṱali vhu re kha Maṅwalo Makhethwa. Musi ni tshi khou shumisa yeneyi bugu, ni ḓo tenda ngangoho uri “ipfi ḽa Mudzimu ḽi a tshila, ḽi na maanḓa.”—Hev 4:12.