Gi buku nga Averesi Tipa gu Raka Nga ga AKristano re nika saha foro taata mo ini bara averesi nga ga Baibiri gbiati gaha apangbanga nga gu rengbe ka undo ro mo mangipai kuti agu akpakarapai mo agbia tiro na ni. Si nika undo ro a mo gbia kina boro gu veresi rogo Baibiri yo nga gu rengbe mo ka ngarasa kura aboro na ni na ki undo yo i mangi wene adiaberã nga gu nika fu taarimo fu Yekova. Mo sia gu riipai ngba tiro, riiapai ni basasa dunduko na wene asanahe gbiati asakapai tipa agu apangbanga nga ga Baibiri nga gu du na undo tini. (Mo bi gu kekeapai nga, sanduki nga “ Wai ka Mangasunge na gi Waraga Re.”) Mo nika gbia agu averesi nga gu nika fu gu rugute na wasa foro nga gu mo aidaha. Na mo nika gbia wene arugute a rogo Baibiri yo nga gu rengbe mo ka mangasunge na ni ka undo kura aboro na ki ngarasi yo.

Ono tie, tipa ai riipai, dungu kura averesi kinaho tipaha susi agu i natangaraha rogo gi waraga re. I mbakadihe tipa si undo ro mo gbia agu averesi du na undo ti ni, na mo ima rengba ka mangasunge na kura aũsunge ka manga wetekapai ka si dunga si naidaha wo. (Snz 2:1-6) Ka mo aaida ka weteka dungu apai, mo mangisunge na marginal references nga gu du rogo gu Baibiri nga New World Translation of the Holy Scriptures gbiati study notes. Tipa ka ino dungu apai tipa kura veresi, mo ngere tii gu riipai nga “Scriptures Explained” rogo Research Guide for Jehovah’s Witnesses watadu rogo Watch Tower Publications Index. Agu aũsunge re nika yugo agu awaraga foro ani nakusihe tipa gu veresi re, agu awaraga kusiyo ho barambeda nika yugo gaani vovo giarogopai yo tipa gu veresi re.

Gi buku nga Averesi Tipa gu Raka Nga ga AKristano re undongo ro aundo mo inipa gu tatamana, inohe, na rugatinapai du rogo Ziazia Kekeapai yo. Wa mo nikaa mangasunge na gi waraga re, mo nika du na bakere kido nga “gu pai nga ga Mbori du na unga, ki du na tandu.”​—Eb 4:12.