Bambandu ya Biblia yina ke sadisa beto:

• Luk 20:37, 38​—Yezu monisaka nde lufutumuku kele diambu ya kieleka, yo yina sambu na Yehowa bafwa kele na luzingu

• Yoa 11:5, 6, 11-14​—Ntangu Lazare nduku ya Yezu fwaka, Yezu tubaka nde lufwa kele bonso mpongi

• Ebr 2:14, 15​—Ntumwa Polo tendulaka nde beto fwete wa ve boma ya lufwa

Bambandu ya Biblia yina ke sadisa beto:

• Biblia ke tubila bantu 9 yina futumukaka, bantu 8 na kati na bo ta zinga diaka awa na ntoto. Masolo yai yonso ke pesa kikesa na bantu yina me fwila muntu mpi masolo yango ke ndimisa beto nde na bilumbu ke kwisa bafwa ta futumuka

  • 1Bn 17:17-24​—Profete Eliya futumunaka mwana-bakala ya mufwidi mosi na Sarefati, mbanza mosi na nziunga ya Sidoni

  • 2Bn 4:32-37​—Profete Elisha futumunaka mwana-bakala mosi na mbanza Shunemi mpi pesaka yandi na bibuti na yandi

  • 2Bn 13:20, 21​—Muntu mosi yina katukaka kufwa futumukaka ntangu nitu na yandi tutanaka ti mikwa ya profete Elisha

  •  Luk 7:11-15​—Na mbanza Naini, Yezu telemisaka bantu yina vandaka kunata mvumbi ya mwana-bakala ya mufwidi mosi mpi Yezu futumunaka yandi

  • Luk 8:41, 42, 49-56​—Yezu futumunaka mwana-nkento ya Yairusi, mfumu mosi ya sinagoga

  • Yoa 11:38-44​—Yezu futumunaka nduku na yandi Lazare mpi Lazare kutanaka diaka ti bampangi na yandi zole ya bankento, Marta ti Maria

  • Bis 9:36-42​—Ntumwa Piere futumunaka Dorkasi, Mukristu yina bantu vandaka kuzola mingi sambu yandi vandaka kusadila bantu mambu ya mbote

  • Bis 20:7-12​—Ntumwa Polo futumunaka Etike, mwana-bakala yina bwaka na fenetre ya zulu mpi fwaka

• Yezu Kristu futumukaka ti nitu ya kimpeve yina ta fwaka diaka ve, yo ke ndimisa beto nde na bilumbu ke kwisa bafwa mpi ta futumuka

  • Bis 17:31; 1Pi 3:18

• Yezu kele muntu ya ntete yina futumukaka sambu na kukwenda na zulu; yandi kele mpi muntu ya ntete yina Yehowa pesaka nitu yina ta fwaka diaka ve; kansi balongoki na yandi 144 000 yina bo me tulaka mafuta ke futumukaka mpi ti nitu yina ta fwaka diaka ve

  • 1Bk 15:20, 23, 51-53; 1Te 4:16, 17; Kus 14:1