Biblu’n nun ndɛ mɔ be kwla uka e’n:

• 1Fa 18:​36-38—Kɛ Ɲanmiɛn nuan ijɔfuɛ Eli nin Baali i nuan ijɔfuɛ’m be yiali Kaamɛli oka’n su lɔ mɔ Eli srɛli Zoova’n, ɔ ka lɛ tɛli i su.

• Mat 7:​7-11—Zezi wlali e fanngan kɛ e srɛ Ɲanmiɛn titi naan Zoova m’ɔ ti e Si m’ɔ klo e’n ɔ́ síe i su tíe.

Biblu’n nun ndɛ mɔ be kwla uka e’n:

• Zoz 24:​9, 10—Zoova w’a tieman Balaamun i srɛlɛ’n, afin like ng’ɔ srɛli’n ɔ nin i klun sa’n be kɔman likawlɛ.

• Eza 1:​15-17—Kɛ mɔ Zoova i nvle nunfuɛ’m be su i gblɛ nun mɔ be kun sran mun ti’n, w’a tieman be srɛlɛ’n kun.

Biblu’n nun ndɛ mɔ be kwla uka e’n:

• 1Ɲo 29:​10-19—Kɛ Izraɛlifuɛ’m be mannin be klunklo like naan be fa kplan Ɲanmiɛn i sua’n, Famiɛn Davidi jrannin be ɲrun srɛli Ɲanmiɛn mannin be.

• Yol 1:​12-14—Zezi i akoto mun, nin i niaan mun, nin i nin Mari, ɔ nin bla uflɛ wie mɔ be su Ɲanmiɛn kpa’n, be yiali Zerizalɛmun lɔ sua ba kun m’ɔ o nglo’n i nun be srɛli Ɲanmiɛn likawlɛ.

Biblu’n nun ndɛ mɔ be kwla uka e’n:

• Dan 6:​6-10—Kannzɛ bɔbɔ Ɲanmiɛn nuan ijɔfuɛ Daniɛli si kɛ sɛ ɔ srɛ Ɲanmiɛn’n be kwla kun i’n, sanngɛ w’a yacimɛn i srɛlɛ.

• Lik 18:​1-8—Sunnzun ase nga Zezi fali’n nun’n, bla kun ko wunnin jɔlɛ difuɛ kun m’ɔ timan kpa’n i wun kpɛ sunman. I waan ɔ di i ndɛ’n i kpa mɛn i. Kɛ mɔ bla’n jin i wun’n ti’n ɔ kplinnin su. Zezi fali sunnzun ase sɔ’n fa kleli kɛ e Si m’ɔ ti kpa’n, ɔ́ tɛ́ i sufuɛ mɔ be srɛ i titi’n be su.

Biblu’n nun ndɛ mɔ be kwla uka e’n:

• 2Fa 22:​11-13, 18-20—Kɛ mɔ Famiɛn Zoziasi kɛnnin i wun ase m’ɔ kunndɛli kɛ ɔ́ yó Zoova i klun sa’n ti’n, Zoova sili i aunnvɔɛ yɛ ɔ yoli i ye dan.

• 2Ɲo 33:​10-13—Kɛ mɔ Famiɛn Manase kɛnnin i wun ase kpatali Zoova ti’n, Zoova yacili i wun sa’n cɛli i yɛ ɔ yoli maan ɔ sɛli i sin dili famiɛn ekun.

Biblu’n nun ndɛ mɔ be kwla uka e’n:

• 1Fa 3:​11, 12—Kɛ Famiɛn Salomɔn srɛli Zoova kɛ ɔ mɛn i ngwlɛlɛ’n, ɔ yoli Zoova i fɛ dan. I ti’n, ɔ mɛnnin i ngwlɛlɛ dan kpa.

Biblu’n nun ndɛ mɔ be kwla uka e’n:

• Lik 10:21—Zezi mɛnmɛnnin i Si nzra nun afin ɔ yili ndɛ nanwlɛ’n i nglo kleli be nga be kan be wun ase’n.

• Ngl 4:​9-11—Anzi’m be manman Zoova yɛ be yi i ayɛ, afin Zoova nin i sɔ’n fata.

Biblu’n nun ndɛ mɔ be kwla uka e’n:

• 1Fa 18:​25-29, 36-39—Kɛ Ɲanmiɛn nuan ijɔfuɛ Eli seli Baali i nuan ijɔfuɛ’m be kɛ be kle kɛ be ɲanmiɛn’n le tinmin’n, be kpan flɛli be ɲanmiɛn’n lelee sanngɛ ɔ yoli ngbɛn.

• Yol 19:​32-41—Efɛzi lɔ amuin sɔfuɛ wie’m be kpan flɛli be amuin bla Atemisi lele dɔ nɲɔn. I ti’n, lika’n sanngannin kpa. Sanngɛ b’a ɲanman like fi. I kpa bɔbɔ’n, kputulɛ yɛ klɔ’n nun ndɛ’m be klɛfuɛ’n kputuli be-ɔ.