Bot Omegiwa ki Lumegiwa me Amara:

Mar pi Lubanga ki pi dano luwotwa tugo cwinywa me ‘cito ka loko jo me rok ducu wek gudok jo ma lubo kor Kricito, kun kibatijagi.’ (Mat. 28:​19, 20; Mar. 12:​28-31) Ka watye ki mar ma kit meno pi dano, ci watwero konyo ‘jo ducu ma myero me nongo kwo ma pe tum.’—Tic 13:48.

I kare mukato angec, onongo waketo cwinywa i kom mako i wiwa kit me cako lok kacel ki poko bukke. I kare-ni dong, mitte ni watute me dongo dirowa me lok ki dano. Wamito ni wanyut mar pi jo mukene ki lok i kom jami ma gitye ki miti iye. Meno tyen lokke ni omyero wabed atera me timo alokaloka dok watam matut i kom miti pa ngat acel acel. Brocuwa man bikonyowa nining me timo meno?

Brocuwa man tye ki pwony ma romo 12 ma nyamo kit mapatpat ma mitte ni wadong wek wanyut mar dok wakony dano me doko lupwonnye. Pwony acel acel jenge i kom gin mo mutimme i Baibul, kun nyamo kit mo ma Yecu nyo ma Lakricitayo mo me cencwari me acel onyuto i tic me pwony. Yubwa pe tye me mako i wiwa kit me cako lok keken, ento me yenyo yo me nyuto marwa pi dano. Kadi bed kit magi ducu mitte i ticwa me pwony, ento wabineno kit ma diro mogo mitte tutwalle ka watye ka cako lok ki dano, dok cen ka lim, nyo kwano Baibul ki dano.

Ka watye ka nyamo pwony acel acel, tam matut i kom kit ma itwero nyuto kwede diro meno ka itye ka lok ki dano ma i wang ticwu. Tute me jingo marri pi Jehovah kacel ki pi dano. Mar meno bikonyi makato diro mo keken me cobo yubbi me loko dano me doko lupwonnye.

Watye ki pwoc madit adada me tic kacel kwedwu. (Jep. 3:9) Walego ni Jehovah ogo laane i komwu ka wumedde ki nyuto mar bot dano kun wukonyogi me doko lupwonnye!