Nyɛmimɛ Nɛ Wa Suɔ:

Suɔmi nɛ wa ngɛ kɛ ha Mawu kɛ adesahi ɔ woɔ wɔ he wami nɛ wa ‘yaa nɛ wa ya peeɔ nihi nɛ a ngɛ je ma amɛ tsuo a mi ɔ Yesu kaseli, nɛ wa baptisiɔ mɛ.’ (Mat. 28:​19, 20; Maak. 12:​28-31) Ke wa jeɔ suɔmi nɛ osato be mi kpo ɔ, lɔ ɔ ma ha nɛ́ waa ye bua “nihi nɛ a ngɛ su kpakpa nɛ ma ha nɛ a ná neneene wami” ɔ.—Níts. 13:48.

Be ko nɛ be ɔ, wa ngɔɔ wa juɛmi kɛ maa bɔ nɛ wa maa je ní sɛɛmi sisi ha kɛ womi nɛ wa ma ha nɔ ko ɔ nɔ. Se amlɔ nɛ ɔ, e sa nɛ waa bɔ mɔde wawɛɛ nɛ waa ya wa hɛ mi ngɛ bɔ nɛ waa kɛ nihi sɛɛɔ ní ha a mi. Wa suɔ nɛ wa je suɔmi kpo kɛ tsɔɔ ni kpahi kɛ gu munyuhi nɛ a bua jɔ he nɛ waa kɛ mɛ maa sɛɛ he ní ɔ nɔ. Enɛ ɔ tsɔɔ kaa e sɛ nɛ waa pee kpɛii mohu ɔ, e sa nɛ waa ngɔ wa he kɛ wo si fɔfɔɛ nɛ nɔ fɛɛ nɔ ngɛ mi ɔ mi nɛ waa le níhi nɛ a bua jɔ he. Mɛni blɔ nɔ nɛ womiyo nɛ ɔ maa ye bua wɔ konɛ waa pee jã?

Ní kasemi 12 lɛ ngɛ womiyo nɛ ɔ mi, nɛ e tsɔɔ suhi nɛ e sa kaa wa ná bɔ nɛ pee nɛ wa nyɛ nɛ wa je suɔmi kpo kɛ tsɔɔ nihi, nɛ waa pee mɛ kaseli. A kɛ ní kasemi ɔ eko fɛɛ eko da Baiblo mi sane ko nɔ. Baiblo mi sane nɛ tu su pɔtɛɛ ko nɛ Yesu aloo Kristofo no ko nɛ e hi si ngɛ kaseli ɔmɛ a be ɔ mi ɔ je kpo ngɛ fiɛɛmi ní tsumi ɔ mi ɔ he munyu. E sɛ nɛ waa kase bɔ nɛ waa kɛ nihi maa je ní sɛɛmi sisi ha a kɛ wo wa yi mi. Mohu ɔ, oti nɛ e sa kaa wa kɛ ma wa hɛ mi ji kaa wa ma hla blɔhi a nɔ nɛ wa maa gu kɛ je suɔmi kpo kɛ tsɔɔ nihi. E ngɛ mi kaa su nɛ ɔmɛ eko fɛɛ eko he hia ngɛ wa fiɛɛmi ní tsumi ɔ fã slɔɔto ɔmɛ a mi mohu lɛɛ, se wa ma susu nɔ́ he je nɛ e sa kaa wa ná su pɔtɛɛ komɛ titli ke waa kɛ nihi maa je ní sɛɛmi sisi, ke wa kpale ya slaa mɛ aloo ke waa kɛ mɛ ngɛ Baiblo ɔ kasee ɔ he.

Ke o ngɛ o he dlae ngɛ ní kasemi ɔ eko fɛɛ eko mi ɔ, mo susu bɔ nɛ o ma je su nɛ ngɛ jamɛ a ní kasemi ɔ mi ɔ kpo ha ke o kɛ nihi nɛ a ngɛ o kpɔ ɔ mi ɔ ngɛ ní sɛɛe ɔ he. Moo bɔ mɔde wawɛɛ nɛ o ha nɛ suɔmi nɛ o ngɛ kɛ ha Yehowa kɛ adesahi ɔ mi nɛ wa. Suɔmi ji su nɛ ma nyɛ maa ye bua mo konɛ o su oti nɛ o kɛ ma o hɛ mi kaa o maa pee nihi kaseli ɔ he.

Wa bua jɔ he blɔ nɛ wa ná kaa waa kɛ nyɛ maa pee kake kɛ tsu ní ɔ he wawɛɛ. (Zef. 3:9) Yehowa nɛ jɔɔ nyɛ be mi nɛ nyɛ yaa nɔ nɛ nyɛ jeɔ suɔmi kpo nɛ nyɛ peeɔ nihi kaseli ɔ!