Ye Mmeliyema Mmenyia Nɩɩ Mmaalɛ:

Ɔlɔlɛ mɔɔ yɛwɔ yɛma Nyamɩnlɩ nɩɩ mmenii nɩ kã yɛ ma yedidi Bayɩbʋlʋ yɩ ahyɛdɩ mɔɔ ise “bɔhɔ bɛyɛ manlɩ yɩ munwatĩĩ mɩ adʋwavʋlɔ, bonluma bɛ” nɩ zʋ. (Mt. 28:​19, 20, NWT; Mk. 12:​28-31) Ɔlɔlɛ mɔɔ angʋmidi íni numɔ nɩ wɔ tumi paa. Na “bɛzabɛ mɔɔ bɔwɔ ahʋnlɩnɩba mɔɔ ɩkɔhʋla ɩkɛma bekenyia nnwʋanlɩ mɔɔ íni awielɩyɛ” nɩ, ɔlɔlɛ eyi kɔhʋla kɛhã bɛ ahʋnlɩnɩ.—Egy. 13:​48, NWT.

Mmɩlɩ be mɔ ɩɣa ɩzɩ̃ ɩhɔ nɩ, yɛvalɩ yɛ adwɩnɩ yeziyeli kezimɔ yekohwi mɔɔ yɛkɔhʋla yɛkɛhã wɔ dasɩlɛlilɛ nu nɩ yekogua ye ti nu nɩɩ kezimɔ yɛkɛva buuku yɛkɛma nɩ zʋ. Naasʋ̃ sikalɛ yɩ, yɛpɛ kɛɛ yetu mpʋnɩ wɔ kezimɔ yɛ nɩɩ mmenii bɔ nkɔmmɔ nɩ nu. Yɛpɛ kɛɛ yɛ nɩɩ mmenii bɔ nkɔmmɔ mɔɔ ɩfalɩ mɔɔ bɛ anyɩ deli nwʋmɔ nɩ nwʋ yɛfa yekile kɛɛ yɛdɔ bɛ. Eyi kile kɛɛ yɛkɛlanɩlanɩ ye ndwokɔ nu, na yɛazunzu mɔɔ bɛzabɛ mɔɔ yeyiyia bɛ nɩ anyɩ deli nwʋmɔ nɩɩ mɔɔ ɩha bɛ nɩ nwʋ bʋwɔ. Kɛ blohyʋɔ eyi kɔwʋwa yɛ ma yɛkɛyɛ eyi yekeze a?

Blohyʋɔ eyi lɛ ozumalɛdɩyɛ 12. Ozumalɛdɩyɛ eyimmɔ kehilehile yɛ subanɩ azʋlɔtʋ mɔɔ ɩsɛ kɛɛ yenyia na ama yɛahʋla yɛala ɔlɔlɛ ali na yɛayɛ mmenii adʋwavʋlɔ. Ozumalɛdɩyɛ bela gyĩ subanɩ be mɔɔ Gyisɛsɩ anzɛnyɩɩ Kilisinyiamaa mɔɔ beli bɔmʋnlɩ nɩ bo nu be lalɩ yɩ ali wɔ bɛ dasɩlɛlilɛ egyima yɩ nu nɩ zʋ. Kɛ yɛ bʋtayɩ yɛ lɛ kɛɛ yekohwi mɔɔ yɛkɔhʋla yɛkɛhã wɔ dasɩlɛlilɛ nu nɩ yekogua ye ti nu a, mfomi yɛkɛbɩbɛ ahʋanɩ azʋlɔtʋ mɔɔ ɩkɛma yɛkɛla ɔlɔlɛ mɔɔ yɛwɔ yɛma mmenii nɩ ali. Ɩwɔ numɔ kɛɛ yehyinyia subanɩ azʋlɔtʋ eyi munwala wɔ yɛ dasɩlɛlilɛ yɩ ɔfʋã azʋlɔtʋ yɩ munwala nu dɩyɛ, naasʋ̃ yɛkɔnwʋ kezimɔ subanɩ azʋlɔtʋ be nwʋ kehyinyia paa mmɩlɩ mɔ yɛbɔɔ nkɔmmɔwɔlɛ tʋ, yɛyɛɛ siakehila anzɛnyɩɩ Bayɩbʋlʋ dɩyɛzumanlɛ nɩ.

Mmɩlɩ mɔ osunzuu ozumalɛdɩyɛ bela nwʋ nɩ, ɩyɛ a, dɩdagyɩ sunzu kezimɔ ɛkɛla subanɩ eyi ali mmɩlɩ mɔ ɛ nɩɩ mmenii mɔɔ bɛda wʋ apaa yi nu bɔbɔɔ nkɔmmɔ nɩ. Bɔ mmɔdɩnɩ kɛɛ ɛkɛhyɛ ɔlɔlɛ mɔɔ ɔwɔ ma Gyehova nɩɩ mmenii mvʋlɔ yɩ nu ɛzɩzɩbɛ. Ɔlɔlɛ mɔɔ ɩdɩ ɔzɔ nɩ kɔwʋwa wʋ ma okodwu wʋ bʋtayɩ mɔɔ mɛyɩ yɛ lɛ kɛɛ ɛkɛyɛ mmenii adʋwavʋlɔ nɩ nwʋ.

Yɛ anyɩ sɔ nwʋmɔ ɔhʋanɩ kezile mɔɔ yɛlɛ kɛɛ yɛ nɩɩ mʋnlʋmmɔ kɔwɔ numɔ kɛyɛ egyima wɔ ɔkʋ̃yɛlɛ nu nɩ paa. (Zɛf. 3:9) Gyehova ɩhɔ́ ɔzʋlɔ iyila mʋnlʋmmɔ baaba baaba paa mmɩlɩ mɔ bogua ɔzʋlɔ bɛdaa ɔlɔlɛ ali bekile mmenii na bɛyɛɛ mmenii adʋwavʋlɔ nɩ!