Nɔviŋsu koɖo Nɔvinyɔnu veviwo:

Lɔnlɔn ci mìɖo nɔ Mawu koɖo agbetɔwo dɔ yí ‘mìyi yí ɖonɔ dɔkplaviwo le jukɔnwo pleŋ mɛ yí donɔ wo eshi mɛ.’ (Mat. 28:​19, 20; Maki 12:​28-31) Lɔnlɔn akun-akun ɖo ŋsɛn. Atɛnŋ awa dɔ do “mɛ ciwo shi yí eji nɔnɔmɛ nywi le nɔ agbe mavɔ kpɔkpɔ” ji.—Edɔ. 13:​48, NWT.

Sasaɔ, mìlénɔ kpɔwɛ seŋkannyɔwo do susu mɛ, yí nanɔ wema amɛwo. Ecɛyɛɔ, ele mɔ mìatrɔ alɔ nɔ lé mìxonɔ nuxu koɖo amɛwo do. Mìji mɔ mìaxonɔ nuxu so enu ciwo yí jɔnɔ ji nɔ amɛwo nu yí asɔ dasɛ lɔnlɔn ci mìɖo nɔ wo. Edasɛ mɔ sɔ koɖo mɛɖekaɖeka ʒanwoɔ, mìatrɔnɔ do nɔnɔmɛ lɔwo nu. Lé wemagbaja cɛ akpedo mì nu mìawɛ doɔ?

Enukplakpla wuive yí le wemagbaja cɛ mɛ. Wokpla mì nɔnɔmɛ ciwo ele mɔ mìaɖo keŋ atɛnŋ alɔn amɛwo yí aɖo nukplaviwo. Wosɔ enukplakpla ɖekaɖeka le Bibla xolɔlɔ ciwo mɛ Yesu alo exwe sanŋdi ŋkɔtɔ mɛ Kristotɔwo dasɛ nɔnɔmɛ nywiwo le kunuɖeɖedɔ lɔ mɛ le. Mìwo susu denyi mɔ mìalé kpɔwɛ seŋkannyɔwo do tamɛ o, vɔ mìaji emɔ ciwo ji mìadasɛ mìwo lɔnlɔn nɔ amɛwo le. Ci nɔnɔmɛ ɖeshiaɖe ʒan le akpaxwe lɔwo pleŋ nɔ mìwo kunuɖeɖedɔ lɔ can ɔ, mìakpɔ lé nɔnɔmɛ ɖewo le veviɖe wu nɔ mìjikɔ atɔ seŋ kankan, wakɔ trɔtrɔyiwo, alo wakɔ Bibla nukplakplawo.

Nɔ èɖo nukplakpla ɖe jiɔ, wa ɖaŋ abu tamɛ kpɔ so lé àwɛ adasɛ nɔnɔmɛ ci nu exo nuxu so, nɔ èxokɔ nuxu koɖo amɛwo le fini èle. Tekpɔ nɔ lɔnlɔn ci èɖo nɔ Yehowa koɖo amɛwo asɛnŋ doji. Lɔnlɔn cɛ ci yí sɛnŋ wu alɔkpa ɖekpokpui ci àzan, akpedo eo nu naɖo tajinu ci yí nyi nukplaviwo ɖoɖo gbɔ.

Jijɔ enyi nɔ mì mɔ mìɖo mɔnukpɔkpɔ gangan cɛ yí wakɔ dɔ koɖo mí alɔlealɔ mɛ. (Zef. 3:9) Yehowa acu shi nɔ mí haan, ci míɖokɔ lɔnlɔn nɔ amɛwo yí ɖokɔ nukplaviwo!