Кару ака-эјелер!

Иисус: «Барыгар, ончо калыктардаҥ ӱренчиктер белетегер. Олорды... сууга чӧҥӱри[гер]» — деп јакылта берген (Матф. 28:19, 20, ЈТ; Марк 12:28—31). Иисустыҥ бу јакылтазын бӱдӱрерге, Кудайга ла улуска сӱӱжис кӱӱнзедер. Акту јӱректеҥ сӱӱгени сӱреен јаан ийде-кӱчтӱ болот. Андый сӱӱш «ӱргӱлји јӱрӱмге апаратан чындыкты» алынгадый улустыҥ јӱректерин томултардаҥ айабас (Ап. ижи 13:48, ЈТ).

Алдында ӧйдӧ бис улусла куучындажар арганы ӱренип алала, олорго библиялык бичиктер артыргызып салатан амадулу болгоныс. Је эмди дезе куучындажатан темигӱлеристи тыҥыдарга ӱренедис. Оныҥ учун улусла куучындажып, олорго јарап турган неме керегинде айдып турзаас, сӱӱжисти кӧргӱзип јадыс. Мыны эдерге, олор не керегинде сананып турган, олорды не санааркадып турганын оҥдоорго албаданып, эпчил болор керек. Биске бу амадуларга јединерге бу брошюра болужар.

Бу брошюрада улуска сӱӱжисти кӧргӱзип, ӱренчиктер белетеерге, 12 урок берилген. Олор 12 кылык-јаҥга учурлалган. Кажы ла урок Иисустыҥ ол эмезе баштапкы чакта јӱрген јарчылардыҥ јӱрӱминде болгон учуралдардыҥ ӱзӱгине тӧзӧлӧнгӧн. Бу уроктор бистерге куучын баштаарга, келер тушта оны оноҥ ары улалтарга ла ӱредӱлер ӧткӱрерге болужар. Брошюрада кӧргӱзилген 12 кылык-јаҥ улуска сӱӱжисти кӧргӱзетен аргалар бедиреерге болужар.

Бойоордыҥ јереерде улусла куучындажып турала, кажы ла кылык-јаҥды «мен канайып кӧргӱзер эдим» деп шӱӱп сананып туругар. Анайда ок Иеговага ла улуска сӱӱжеерди тыҥыдарга албаданыгар. Нениҥ учун дезе ӱренчиктер белетеерге, ӱренип алган кандый бир темигӱлер эмес, је јӱк ле сӱӱш болужар.

Биске слерле кожо ӧмӧ-јӧмӧ иштенери јаан кӱндӱ (Соф. 3:9). Улуска сӱӱшти тыҥыдып, олорды оноҥ ло ары ӱредигер. Бис слердиҥ албаданып эдип турган ижеерге Иегова Кудайыс арбынду алкыжын берзин деп мӱргӱйдис.