Bọn Ute Irieen̄ mè Ibaan̄:

Ima eji ekaan̄be me lek Awaji melek ebi ene okibieen̄ eji ibe eji ‘eje esi erọ inyi otutuuk ebi ido geelek me inyọn̄ yi enere ebi udun̄ kè Karais mè etap ema me mun̄.’ (Mat 28:​19, 20; Mak 12:​28-31) Ata ima ikikaan̄ unye enenen. Mokọt ikaan̄ mgbaan̄ me lek ebi ikakaan̄ ata ejit mè iweek ikakaan̄ ugwem ikakaan̄ge itata.—Ikwaan̄ 13:48.

Me mgbọ oraraka, eji ekito chieen̄ me lek ikakaan̄ ibot usem ge me ibot mè iyaka ire inyinyi ikpa. Ire, me mgbọ keyi, igbe ibe eji ekaan̄ ata uka isasa ikigọọk ebi ene ikpa usem. Eji ekiweek ikekijeen̄ ima me lek ebi ofifi ife sa me ikekitumu ibot usem ema ekaan̄be ulọk me lek. Eyi isibi ibe ke eji ebekisasa me ugbalachieen̄ ikikpọ inu ge ge okaan̄be ulọk me lek mè ikilọkọ lek igọọk inu ya. Ike owa ke broshọ yi obosa itap ubọk inyi eji ekọt erọ eyi ni?

Broshọ yi ikaan̄ akọp mè inu nkween̄ iba echi okijeen̄ eru ogbegbe ibe eji ekaan̄ inyi eji ekọt ekejeen̄ ima mè ekerọ ene ebi udun̄ kè Karais. Inu nkween̄ chi ge ge iyaka lek imaan̄ me lek mfufuk ge ofolek Jisọs mè iyaka ire ofifi ogwu ololook ata etip me adasi ukot, ogwu ojejeen̄ mbet lek eru ya me ikwaan̄ uko kan̄. Inu ekaan̄be me ejit ikare ibeben ubọk ibene ukpatu ge me ibot, kpan̄asi ikeya, ire iweweek ubọk eji ebesa ijeen̄ ima eji ekaan̄be me lek ebi ene. Ubọk geelek ibe ke otutuuk eru chi ikup ufiak me otutuuk agọọk eji ekisa ilook ata etip, eji ebekpa ubọk eru chi osabe ikup ufiak me mgbọ eji ebebene ukpatu, mgbọ eji ekisi nje nchak mè iyaka ire mgbọ eji ekisun̄ nkween̄mkpọ Baibul.

Ike okifuk inu nkween̄ chi ge ge, riọọn̄ ubọk kikeek mkpọ ofolek ubọk obokọt ikijeen̄ eru chi me mgbọ okigọọk ebi ene ikpa usem me agan̄ olukbe. Sa mè rọ inyi ima okaan̄be me lek Jioba mè ebi ene ikimin. Ima yi motap ubọk inyi okọt orọ mkpọ otobe me isi orere, irọrọ ene ebi udun̄ kè Karais.

Eji minwọọn̄ irek ilile yi eji ekaan̄be ikekigọọk owu ikisi ikwaan̄ me ejit ge. (Jefan 3:9) Kè Jioba igbana owu ike okupbe inye ikima ebi ene mè ikirọ ema ebi udun̄ kè Karais!