Sinamʉ ɉina:

Niwipáw awiri ikʉ aguzʉna anameʼ, ema gaʼkʉnamʉ ayéy nari ʉnkuzoya awʉnʉngwa niweʼzʉna ni: «Pin zʉnáy akwʉn nugin wʉ zori awiri nʉʼn sí aʼzari nʉkʉriwía awʉngwasi igunámʉsa awkwa, awiri ɉwa kʉsa awkwa» (Mat. 28:​19, 20; Mar. 12:​28-31). Zaguzánʉkwa kinki neykari, ikʉ tʉkin pari duna neyka ʉnkipana kinki awʉn aʼɉúnʉya igunamʉsʉkwéy nanʉngwasi, aʼmʉkana ʉwa ni (Hech. 13:48).

Minsaʼgwiri ikʉ azi key amasey niʼkwe niweʼzari riwí, ey awiri, niwipaperi niwikʉnanʉn nuga awesʉnʉngwa niweʼzʉna narín. Ey ʉweʼki, íwari íkʉsin rimasein nʉngwa zʉʼn niweʼzʉna ni. Awiri, íkʉri azey azey diwʉ́n arúnhʉkwa nameʼ, ikʉ́nhari azi arúnhʉya nanʉnno, inʉ ingumʉ́n aguzʉna nanʉnno niweʼzari sékʉnʉn ukumʉya ni. Eymí nanʉn nusi aguzʉna chwizʉnhakumʉya ni. Ema papériri emaʼba ayéy unisi zweykwéy nanʉngwasi, niwikaʼmʉkana awʉngwa ni.

Ema paperi 12 kʉnowkwa kʉnanʉn nuga ni. Ayaʼbari iʼngeygwi gaʼkʉnamʉ kuwásʉkwa niwikawʉngeʼri azi nisi aguzʉna chwizʉnhasʉkwéy niwikʉnanʉnno niwikʉya ni. Kʉnowkwáseʼri Jesú sí awiri kʉtʉkʉnʉn kristianu winkwana neyka sí zakaʼchoʼsʉya ni. Ikʉ́nhari gaʼkʉnamʉ winʉnkʉbasa uyeʼri, ema ɉuna chwizʉnhasa una neyka sí wásʉya ni. Íwari iʼngeygwi emí key amasein nʉngwa niweʼzari riwía neki anauʼ nari, ayumeka azi nisi aguzʉna kinki chwizʉnhasʉkwéy nʉkʉnanʉnno meʼzanamʉ kawa ni. Ema yʉkweyna, gaʼkʉnamʉ ʉnkʉbasʉngeʼri unikamʉ kawʉn nuga neki, iʼngwiri asaykwa mikawʉngeʼ, eygwi rimaseykwa mikawʉngeʼ kwa Bibria sí nʉzawín nukʉngeʼ ingumʉ́n mikaʼmʉkana awʉngwa ni.

Azey azey kʉnowkwa nʉriwín nukʉngeʼri, azi nisi gaʼkʉnamʉ ʉnkʉbasʉn nʉkaniʼkwe chwizʉnhasʉkwéy nʉkʉnanʉnno meʼzánʉkwa. Jeuwá awiri ikʉ aguzʉna kinki chwizʉnhasʉkwari iʼngeygwi ɉuna uniʼkwa yʉkwa gwasi ingumʉ́n awʉtari aʼzʉna ni. Ey ʉwameʼ, azi nisi zaguzánʉkwa ingumʉ́n chwizʉnhasi zweykwéy nʉkʉnanʉnno meʼzanʉndi, iʼngeygwi Jesú sí aʼzari zweykwéy kʉnanʉngwasi nigunamʉsagwi awʉngwa ni.

Míwisin iʼba ʉnkʉnari aʼmʉkari zweykwéy niwikʉnʉnameʼ zeyzey niweʼzʉnin (Sof. 3:9). Iʼngeygwi Jesú sí aʼzari zweykwéy kʉnanʉngwasi, azi nari igunámʉsa uniʼkwe miweʼzari azoyameʼ, Jeuwá du miwingunámʉsa awʉngwa ni.