E niaan kpa mun:

Ɲanmiɛn nin sran mɔ e klo be’n ti’n ‘e uka nvlenvle’m be kwlaa be nunfuɛ mun naan be kaci Zezi i sɔnnzɔnfuɛ yɛ be yo be batɛmun.’ (Mat. 28:​19, 20; Mar. 12:​28-31) Sɛ e klo sran mun kɛ nga lɛ sa’n, é kwlá úka be “nga be nin nguan m’ɔ leman awieliɛ’n fata’n.”—Yol. 13:48.

Laa’n, like nga e ko yo naan ndɛ nga é kán klé sran mun w’a ka e ti nun’n ɔ nin sran’m be fluwa manlɛ’n, yɛ be yoli e cinnjin-ɔn. Siɛn’n wafa nga e nin sran mun e kwla koko yalɛ kpa’n yɛ ɔ ti e cinnjin-ɔn. E kunndɛ kɛ e nin sran mun é kókó ndɛ ng’ɔ ti be cinnjin’n be su yalɛ. I liɛ’n, é klé kɛ e klo be naan be ndɛ lo e. I sɔ yolɛ nun’n, ɔ fata kɛ e jran sa ng’ɔ o sran’n su’n nin ndɛ ng’ɔ lo i’n be su naan y’a kan ndɛ’n y’a kle i. ?Wafa sɛ yɛ fluwa nga wá úka e-ɔ?

Fluwa nga i nun like suanlɛ’m be ti 12. Like suanlɛ sɔ’m bé wá klé e ninnge wie m’ɔ fata kɛ e si be yo naan y’a kle sran’m be kɛ e klo be naan kusu y’a uka be naan b’a kaci Zezi i sɔnnzɔnfuɛ’n. Like suanlɛ kwlaa wá fá e ɲin síe i like trele kun mɔ Zezi annzɛ Klisifuɛ klikli’m be blɛ sufuɛ kun yoli i jasin fɛ bolɛ nun’n su. Nán like nga e ko yo naan ndɛ nga é kán klé sran mun w’a ka e ti nun’n i su yɛ fluwa’n wá fá e ɲin síe-ɔ. Sanngɛ wafa nga e kwla kle kɛ e klo be’n i su yɛ ɔ́ wá fá e ɲin síe-ɔ. Ninnge kwlaa sɔ’m be ti cinnjin jasin fɛ bolɛ’n nun. Sanngɛ é wá fá e ɲin é síe i be nun wie mɔ kɛ e nin sran mun é bó yalɛ koko lɛ bo’n, annzɛ kɛ é kó nían be osu’n annzɛ kɛ é klé be Biblu’n nun like’n be kwla uka e kpa’n be su.

Kɛ á fá ɔ ɲin síe i like suanlɛ’m be su’n, bu wafa nga kɛ a nin amun asa su lɔfuɛ’m bé kókó yalɛ’n, a kwla yo like nga like suanlɛ sɔ’n kɛn i ndɛ’n i akunndan kpa. Mian ɔ ɲin naan klo Zoova nin sran’m be kpa tra laa’n. Klolɛ sɔ’n yɛ ɔ́ yó maan á kwlá úka sran mun naan b’a kaci Zezi i sɔnnzɔnfuɛ-ɔ.

Kɛ e nin amun e bo yo kun mɔ e su Zoova likawlɛ’n i sɔ’n yo e fɛ kpa. (Sof. 3:9) Like kwlaa nga amun yo naan amun a klo sran’m be kpa naan kusu amun a uka be naan b’a kaci Zezi i sɔnnzɔnfuɛ’n maan Zoova yra su!