Namumutan na mga Tugang:

An pagkamuot sa Diyos saka sa mga tawo nagmomotibar sa sato na maghulit asin “gumibo . . . nin mga disipulo sa mga tawo kan gabos na nasyon, na binabawtismuhan sinda.” (Mat. 28:​19, 20; Mar. 12:​28-31) An bakong makasadiring pagkamuot mapuwersa. Puwede iyan makapahiro sa mga tawo “na igwang pusong nasa tamang kamugtakan para sa buhay na daing katapusan.”​—Gibo 13:48.

Kaidto, nagpopokus kita sa pagtuom nin mga presentasyon asin pagwalat nin mga literatura. Ngunyan kaipuhan tang hinguwahon na pauswagon an satong mga kakayahan sa pakikipag-ulay. Gusto tang ipahiling an pagkamuot sa iba paagi sa pakikipag-ulay manungod sa mga tema na interesante para sa sainda. Nangangahulugan iyan na kaipuhan tang magin handa na ibagay an satong presentasyon asin na pag-isipan na marhay an mga ikinakahadit asin pinagkakainteresan kan lambang nakakaulay ta. Paano makakatabang sato an brosyur na ini na magibo iyan?

An brosyur na ini igwa nin 12 leksiyon na nagtatampok nin mga kuwalidad na kaipuhan tang pauswagon tanganing maipahiling an pagkamuot asin makagibo nin mga disipulo. An kada leksiyon nakabasar sa sarong pagkasaysay sa Bibliya kun sain si Jesus o iba pang ebanghelisador kan inot na siglo nagpahiling nin sarong partikular na kuwalidad sa ministeryo. An pasuhan kaini, bako para magtuom nin mga presentasyon, kundi tanganing maghanap nin mga paagi para maipahiling an satong pagkamuot sa mga tawo. Dawa ngani kaipuhan sa gabos na aspekto kan satong ministeryo an lambang kuwalidad na iyan, tutukaron sa brosyur na ini kun paano an sarong partikular na kuwalidad lalo nang kaipuhan sa pagpuon nin pakikipag-ulay, pagdalaw liwat, o pagkondukta nin mga pag-adal sa Bibliya.

Mantang pinag-aadalan mo an lambang leksiyon, pag-isipan na marhay kun paano mo maipapahiling an kuwalidad sa leksiyon na iyan pag nakikipag-ulay sa mga tawo sa lugar nindo. Pagmaigutan na pararumon an saimong pagkamuot ki Jehova asin sa mga tawo. Urog pa sa ano man na pamamaagi, an pagkamuot na iyan makakatabang saimo na maabot an pasuhan mo na gumibo nin mga disipulo.

Pinapahalagahan mi an dakulang pribilehiyo na makaibanan kamo sa paglilingkod. (Sof. 3:9) Lugod na abunda kamong bendisyunan ni Jehova mantang padagos nindong namumutan an mga tawo asin naggigibo nin mga disipulo!